ހަރުކަށި ފިކުރާ ގުޅޭގޮތުން ގަބޫލު ކުރެވޭނީ ރައީސް މުހައްމަދު ނަޝީދުގެ ވާހަކަފުޅު - އިންތި
ޕާޓީގެ އެހެން މީހެއްގެ ވާހަކައަށް ބުރަދަނެއް ނުދެވޭނެ
އިމްތިޔާޒު ފަހުމީ / މާފަންނު އުތުރު ދާއިރާގެ މެމްބަރު
ހަރުކަށި ފިކުރާ ގުޅޭގޮތުން ގަބޫލު ކުރެވޭނީ، ރައީސް މުހައްމަދު ނަޝީދުގެ ވާހަކަފުޅު އެކަނި ކަމަށް މާފަންނު އުތުރުދާއިރާގެ މެމްބަރު އިމްތިޔާޒު ފަހުމީ ވިދާޅުވެއްޖެއެވެ.
އިންތި ވިދާޅުވީ، މިކަމާ ގުޅޭގޮތުން ޕާޓީގެ އެހެން މީހެއްގެ ވާހަކައަށް ބުރަދަނެއް ނުދެވޭނެ ކަމަށާއި، ހަރުކަށީ ފިކުރާއި ބޮން ގޮއްވުމުގެ ޝިކާރައަކަށް ވެފައިވަނީ ރައީސް ނަޝިދު ކަމަށެވެ. އެމަނިކުފާނަށް އަމާޒުކޮށް އެ ހަމަލާ ދިނީވެސް ބޮން ގޮއްވުމާއި ހަރުކަށި ފިކުރު މި ރާއްޖޭގައި ފެތުރެމުން އަންނަ ވާހަކަ އެމަނިކުފާނު ދެއްކެވުމުން ކަމަށެވެ.
ރައީސް ނަޝީދު އަވަހާރަކޮށްލަން ދިން ޓެރަރިސްޓް ހަމަލާއާ ގުޅިގެން، މަޖިލީހުން ކުރިއަށްގެންދިޔަ ޚާއްސަ އިންކުއަރީ ހެދި 241 ކޮމިޓީގެ މުގައްރިރު ހިތަދޫ އުތުރު ދާއިރާގެ މެމްބަރު މުހައްމަދު އަސްލަމް ވިދާޅުވެފައިވަނީ، ޕާޓީގެ މައިގަނޑު މަގްސަދަކަށްވާން ޖެހޭނީ، ސަރުކާރު ދެމެހެއްޓުން ކަމުގައެވެ. ސަބަބެއް ކަމަށް ވިދާޅުވެފައިވަނީ، ސަރުކާރު އެކުލަވާލީ އެމްޑީޕީއިން ގަބޫލުކުރާ އަސާސެއްގެ މައްޗަށް ބިނާކޮށް ކަަމަށެވެ.
އަސްލަމަކީ އެމްޑީޕީގެ އިސް ސަފުގައި އެންމެ ގިނަ ދުވަސްވަންދެން މަސައްކަތް ކުރައްވަމުން ގެންދަވާ އެއްބޭފުޅެކެވެ.
އަސްލަމް ވާހަތަކަށް ރައްދު ދެއްވުމުން އިންތި ވަނީ އެކަމާއި ވަރަށް ބޮޑަށް ނުރުހުން ފާޅު ކުރައްވާފައެވެ. އިންތި ވިދާޅުވީ ރާއްޖޭގައި ހައްދުފަހަނައަޅާފައިވާ ހަރުކަށި ފިކުރު އޮތްކަމަށް ފާޅުގައި ވާހަކަދައްކަވަން ކެރޭ ހަމައެކަނި ލީޑަރު، ބޮމެއް ގޮއްވާލައި ބޮޑެތި ޒަޚަމްތަކެއް ލިބި އެހާލުގައި އޮންނަވައިގެން މިކަން ހިނގައިދިޔަ ގޮތާއި، ޤައުމު ހަމަމަގަށް އަޅުވަން ދެއްވާ ލަފައާއި ގުޅިގެން އެކަމަށް ފާޑުކިޔައި އެމްޑީޕީގެ އެއްވެސް މެމްބަރަކަށް ވާހަކަ ނުދެއްކޭނެކަމަށެވެ.
