ކަރެކްޝަންސްއާ މިސްބާހު ހަވާލުކުރުމަށް ދަނީ ތައްޔާރުވަމުން
މިސްބާހު ހައްޔަރުކުރީ އެނބުރި މާލެ އައުމުން
މިސްބާހު މުހައްމަދު
މިސްބާހު މުހައްމަދުގެ މައްޗަށް ކޮށްފައިވާ ހުކުމް ތަންފީޒުކުރަން ކަރެކްޝަންސްއާ ހަވާލުކުރުމަށް ކުރަންޖެހޭ މަސައްކަތްތައް ކުރަމުންދާކަމަށް ފުލުހުންގެ އިދާރާއިން ބުނެފިއެވެ.
ފުލުހުން ބުނީ މިދިޔަ މެއި މަހުގެ 14 ވަނަ ދުވަހު ފުލުހުން ހޯދަން އިއުލާނުކުރި މިސްބާހު ހުކުރު ދުވަހު އެނބުރި މާލެ އައިސްފައިވާ ކަމަށެވެ.
އޭނާ މާލެ އައުމާއެކު ފުލުހުންގެ ބެލުމުގެ ދަށަށް ގެންގޮސްފައިވާ ކަމަށް ފުލުހުން ވަނީ ބުނެފައެވެ. އަދި އޭނާގެ މައްޗަށް ކޯޓުން ކޮށްފައިވާ ހުކުމް ތަންފީޒުކުރުމަށް ކަރެކްޝަނަލް ސާވިސްއާ ހަވާލުކުރުމަށް ކުރަންޖެހޭ މަސައްކަތްތައް ކުރަމުންދާކަމަށް ފުލުހުން ބުނެފައިވެއެވެ.
އޭނާ މިވަގުތު ވެސް ހުރީ ފުލުހުންގެ ބެލުމުގެ ދަށުގައެވެ. އޭނާ ޕާކިސްތާނަށް ދިއުމާއި ގުޅޭގޮތުން ބަލަންޖެހޭ ކަންކަން ވަކި މައްސަލައެއްގެ ގޮތުގައި ބަލަމުންދާނެ ކަމަށް ފުލުހުން ބުނެފައިވެއެވެ.
ގިނަ ދުވަސްތަކެއް ވަންދެން ގެއްލިގެން ހޯދަމުންދިޔަ މިސްބާހު ހުރީ ޕާކިސްތާނުގައި ޑްރަގް ނެޓްވޯރކެއްގެ ބެލުމުގެ ދަށުގައި، ގެރެންޓަރ އެއްގެ ގޮތުގައި ބެލެވޭ ކަމަށް ފުލުހުން މީގެ ކުރިން ބުނެފައިވެއެވެ.
މިދިޔަ 2020 ވަނަ އަހަރުގެ ނޮވެމްބަރު 11 ވަނަ ދުވަހުގެ ރޭ 22:13 ގައި ފްލައި ދުބާއީގެ EZ1570 ނަންބަރު ފްލައިޓުން ދުބާއީއަށް މިސްބާހް މުހައްމަދު ފުރާފައިވާކަން އިމިގްރޭޝަންގެ ރެކޯޑްތަކުން ދައްކާ ކަމަށް ފުލުހުން ބުނެފައިވެއެވެ.
އޭނާ ދުބާއީއަށް ގޮސްފައިވަނީ ފުޅާ ދާއިރާއެއްގައި ރާއްޖެއަށް މަސްތުވާތަކެތި އެތެރެކޮށް، އެތަކެތީގެ ވިޔަފާރި ކުރާ ނެޓްވޯރކްތައް ރާއްޖޭގައި ހިންގި، ސ. ހުޅުދޫ ދޭލިޔާގޭ އިރުފާން ތަގިއްޔުއާއެކު ކަމަށް ފުލުހުން ބުނެއެވެ.
އިރުފާން ވަނީ 2020 ޑިސެމްބަރު 08 ވަނަ ދުވަހު "މަސްޖަރީ-2" ނަމަކަށް ކިޔާ ދޯނީގައި، ކަނޑުމަގުން ރާއްޖެއަށް 72 ކިލޯއަށްވުރެ ގިނަ މަސްތުވާތަކެތި އެތެރެކުރި ކަމުގެ ތުހުމަތުގައި ހައްޔަރުކޮށްފައެވެ.
