"ކޮވިޑް-19އިން އަރައިގަނެވޭއިރު ބައިނަލްއަގުވާމީ އިތުރު މައްސަލަތަކަށްވެސް ހައްލު ލިބޭނެކަމަށް ބެލެވޭ"
23 ޖުލައި 2021 | ހުކުރު 14:42އދގެ އާންމު މަޖިލީހުގެ ރައީސްކަަމަށް ހޮވިވަޑައިގަތުމަށް ފަހު މިނިސްޓަރ ޝާހިދު ކުރައްވާ ފުރަތަމަ ދަތުރުފުޅުގައި އިންޑިއާއަށް ވަނީ ވަޑައިގެންފައި
މިނިސްޓަރ ޝާހިދު އިންޑިއަން ކައުންސިލް އޮފް ވޯލްޑް އެފެއާޒްގައި ވާހަކަދައްކަވަނީ
ކޮވިޑް-19އިން އަރައިގަނެވޭއިރު، ބައިނަލްއަގުވާމީ އިތުރު މައްސަލަތަކަށްވެސް ހައްލުލިބޭނެކަމަށް ބެލެވޭކަމަށް އދ. ގެ އާންމު މަޖިލީހުގެ އިންތިޚާބީ ރައީސް އަދި ރާއްޖޭގެ މިނިސްޓަރ އޮފް ފޮރިން އެފެއާޒް އަބްދުﷲ ޝާހިދު ވިދާޅުވެއްޖެއެވެ.
މިނިސްޓަރ ޝާހިދު މިފަދައިން ވިދާޅުވީ، އދގެ އާންމު މަޖިލީހުގެ ރައީސްކަަމަށް ހޮވިވަޑައިގަތުމަށް ފަހު ކުރަައްވާ ފުރަތަމަ ރަސްމީ ދަތުރުފުޅުގައި އިންޑިއާގެ ނިއުދިއްލީއަށް ވަޑައިގެން އިންޑިއަން ކައުންސިލް އޮފް ވޯލްޑް އެފެއާޒްގައި ވާހަކަ ދައްކަވަމުންނެވެ. މި ބައްދަލުވުމުގައި މިނިސްޓަރ ޝާހިދު ވަނީ އާންމު މަޖިލީހުގެ ރައީސްކަމަށް ހޮވިވަޑައިގަތުމަށް ފަހު އެންމެ ބޮޑަށް އިސްކަމެއް ދެއްވާނީ ކޮވިޑް-19އިން އަރައިގަތުމަށް ކަމަށް ވިދާޅުވެފައެވެ. ޝާހިދު ވިދާޅުވީ ކޮވިޑާއެކު ބޮޑެތި މައްސަލަތަކެއް ދިމާވެފައިވާ ކަމަށާއި އަދި މި ބަލީގެ ހާލަތު ރަނގަޅުވާން ގާތްވެސް ނުވާ ކަމަށެވެ. އެގޮތުން ކޮވިޑްގެ އާ ވޭރިއަންޓްތައް އުފެދެމުން އަންނަ އިރު ދުރު މުސްތަގުބަލުގައި ސިއްހަތަށް ލިބޭނެ ގެއްލުންވެސް އެނގިފައި ނުވާކަމަށެވެ. މި ސަބަބަށްޓަކައި ކުރަންޖެހޭ މަސައްކަތް ގިނަ ވެފައިވާއިރު، އެ މަނިކުފާނުގެ "އުންމީދު" ނުވަތަ "ޓީމް ހޯޕް"އިން މި މަސައްކަތް ކުރުމަށް ޚާއްސަ އިސްކަމެއް ދޭނެކަމަށެވެ.
ދުނިޔޭގެ އާބާދީއަށް ވެކްސިން ކަށަވަރުކޮށްދިނުމާއި އާލަމީ ވަބާގެ ސަބަބުން އެންމެ ބޮޑަށް އަސަރުކުރި ފަގީރު ގައުމުތަކަށް އެހީވުމަށް ޚާއްސަ އިސްކަމެއް ދެއްވާނެކަމަށް ވިދާޅުވިއެވެ. މިނިސްޓަރ ޝާހިދު ވަނީ ކޮވިޑުން އަރައިގަތުމަށް އދ. އިން އިތުރަށް މަސައްކަތް ކުރަން ޖެހޭއިރު، މިކަމަށް ލަސްކަމެއް އަޔަނުދިނުމަށް ކުރެވެން ހުރި ހުރިހާ މަސައްކަތްޕުޅުތަކެއް ކުރައްވާނެކަމުގެ ޔަގީންކަން ދެއްވާފައެވެ.
މިނިސްޓަރ ޝާހިދުގެ ވާހަކަފުޅުގައި އެމަނުކުފާނުވަނީ ކޮވިޑުން އަރައިގަތުމަށްފަހުގައިވެސް ގިނަ މަސައްކަތްތަކެއް ކުރަންޖެހޭކަން ހަނދާނުގައި ބަހައްޓަން ޖެހޭކަމުގައި ފާހަގަކުރައްވާފައެވެ. އެގޮތުން މޫސުމަށް އަންނަމުންދާ ބަދަލުތަކާއި، ކަނޑު ފަޅުތަކުގެ ރައްކާތެރިކަމާއި، ދުނިޔެ ހޫނުވުންފަދަ ކަންކަމަށް ދޭ ސަމާލުކަން މިއަދު ކޮންމެވެސް ވަރަކަށް ކުޑަވިޔަސް މިކަންކަން ހައްލުނުވާކަން ހަނދާންކޮށްދެއްވާފައެވެ.
މިމޭރުމުން ވާހަކަދައްކަވަމުން މިނިސްޓަރ ޝާހިދު ވަނީ ކޮވިޑް-19އިން އަރައިގަނެވޭއިރު، ބައިނަލްއަގުވާމީ އިތުރު މައްސަލަތަކަކަށްވެސް ހައްލުލިބޭނެކަމަށް ބެލެވޭ ވިދާޅުވެފައެވެ. އެގޮތުން ފަގީރުކަން ނައްތާލުމާއި، ދެމެހެއްޓެނިވި މުޖުތަމައެއް ބިނާކުރެވިގެންދާނެކަމަށް އުންމީދުކުރައްވާކަމަށް ވިދާޅުވިއެވެ.
މިނިސްޓަރ ޝާހިދު ޖުލައި 22-24 އަށް އިންޑިއާއަށް ކުރައްވާ ރަސްމީ ދަތުރުފުޅަކީ އެގައުމުގެ ސަރުކާރުގެ ދައުވަތަކަށް ކުރައްވާ ދަތުރުފުޅެކެވެ. މިއީ އދގެ އާއްމު މަޖިލީހުގެ އިންތިޚާބީ ރައީސްގެ ހައިސިއްޔަތުން އެމަނިކުފާނު ކުރައްވާ ފުރަތަމަ ދަތުރުފުޅެވެ.
