ހުޅުމާލޭގައި އެއްޗެއް ގޮވުން: ސަރަހައްދު ހުސްކޮށް ނުރައްކަލެއް އޮތްތޯ ބަލަނީ!
މަންޒަރު ދުށް މީހަކު ބުނީ އެއްޗެއް ގޮވި އަޑު ވަރަށް ބާރަށް އިވުނު ކަމަށް
ބާރުގަދަ އަޑަކާއެކު އެއްޗެއް ގޮވި ސަރަހައްދުގައި ފުލުހުން ހަރަކާތްތެރިވަނީ
ހުޅުމާލޭގައި ބާރު އަޑަކާއެކު އެއްޗެއް ގޮވުމާ ގުޅިގެން އެ ސަރަހައްދު ހުސްކޮށް ނުރައްކަލެއް އޮތްތޯ ބަލަމުންދާކަމަށް ފުލުހުން ހާމަކޮށްފިއެވެ.
ބާރުގަދަ އަޑަކާއެކު އެއްޗެއް ގޮވުމުގެ ސަބަބުން ފުލުހުންނާއި ސިފައިން ދަނީ ހަކާތްތެރިވަމުންނެވެ. މި ހާދިސާ ހނގާފައިވަނީ ހުޅުމާލޭ ބޯގަންވިލާ މަގުގައި ކުޅިވަރުކުޅުމަށް އޮންނަ ހުސްބިމުގައިކަމަށް ފުލުހުން ބުނެއެވެ. މި ހާދިސާގައި އެއްވެސް މީހަކަށް ޖިސްމާނީ ގެއްލުމެއް ވެފައިވާކަމުގެ މައުލޫމާތެއް ނުލިބޭކަމަށް ފުލުހުން ބުނެއެވެ.
ރާއްޖެ އެމްވީއަށް މައުލޫމާތުދިން އާއްމުންގެ މީހަކު ބުނީ އެއްޗެއް ގޮވި އަޑު ވަރަށް ބާރަށް އިވުނު ކަމަށާއި، އެވަގުތު އަލިފާން ވެސް ފެނުނު ކަމަށެވެ. އެމީހާ ބުނީ އަޑުން ހީވަނީ ގޮވާފައިވަނީ ގޭސްފުޅިއެއް ކަހަލަ އެއްޗެއްކަމަށް ލަފާކުރެވޭ ކަމަށެވެ. އެމީހާ ބުނީ އެވަގުތު ގިނަ އަދަދެއްގެ ބަޔަކު އެތަނަށް އެއްވިކަމަށާއި ފުލުހުންނާއި ސިފައިން ވެސް އެ ސަރަހައްދަށް އެޓެންޑްވެފައިވާކަމަށެވެ. .
ހުޅުމާލޭ ބޯގަންވިލާ މަގުގައި ކުޅިވަރުކުޅުމަށް އޮންނަ ހުސްބިމުގައި އެ ވަގުތު ކުޅިވަރު ކުޅެމުންދިޔަ ބަޔަކު ބުނިގޮތުން އެ ސަރަހައްދުން ވަރަށް ބާރުގަދަ އަޑަކާއެކު އެއްޗެއް ގޮވި އަޑު އިވުނުކަމަށާއި އަދި އެއްޗެހިތަކެއް ބުރައިގެން ދިޔަ މަންޒަރު ވެސް ފެނުނު ކަމަށެވެ. އަދި ޒާތަކަށް އޮތް އެއްޗެއް އެ ސަރަހައްދުން ފެނުނުކަމަށް ވެސް އެ މީހުން މައުލޫމާތު ދިނެވެ.
މި ހާދިސާގައި ލިބުނު ގެއްލުމާއި، އެކަމާގުޅޭ އިތުރު ތަފްސީލެއް ހާމަކޮށްފައެއް ނުވެއެވެ. އެއްޗެއް ގޮވާފައިވަނީ ހުޅުމާލޭ ޗައިނާ ޓައުން ސަރަހައްދުން ކަމަށް މައުލޫމާތު ލިބެއެވެ. ފުލުހުން ވަނީ މީހުންނަށް ނުވަދެވޭގޮތަށް އެ ސަރަހައްދު އެއްކޮށް ބަންދުކޮށްފައެވެ. އަދި އެ ސަރަހައްދުގައި އިތުރު ނުރައްކަލެއް އޮތްތޯ ބެލުމަށް ސިފައިން ވެސް ދަނީ ހަރަކާތްތެރިވަމުންނެވެ.
