ގްރޭޓާމާލެ ގްރިޑް ސާކިޓްގެ ދެވަނަ މަސައްކަތް ކުރިއަށްދާތީ ކަރަންޓް ކެނޑިދާނެ

ގްރޭޓާމާލެ ގްރިޑްގެ ދެވަނަ ސާކިޓްގެ މަސައްކަތް ކުރިއަށްދާތީ ކަރަންޓް ކެނޑިދާނެ ކަމަށް ސްޓޭޓް އިލެކްޓްރިކް ކޮމްޕެނީ ލިމިޓެޑް (ސްޓެލްކޯ) އިން ބުނެފިއެވެ.

ސްޓެލްކޯ އިން ބުނީ ގްރޭޓާމާލެ ގްރިޑްގެ ދެވަނަ ސާކިޓްގެ މަސައްކަތް މިއަދުވެސް 17:00 އާ ހަމަޔަށް ކުރަމުންދާނެ ކަމަށާއި މި މަސައްކަތުގެ ތެރެއިން މާލެއާއި، ހުޅުމާލެއިން ކަރަންޓު ކެނޑުމުގެ ފުރުސަތު އެބައޮތް ކަމަށެވެ. ގްރޭޓާމާލެ ގްރިޑްގެ މަސައްކަތް ކުރުމަށް ކުރިން ރޭވިފައިވާ ދުވަސްތަކުގެ އިތުރުން މި މަހުގެ 23 ވާ ހުކުރު ދުވަހާއި 24 ވާ ހޮނިހިރު ދުވަހުގައި ވެސް އެ މަސައްކަތް ކުރާގޮތަށް މިހާރު ހަމަޖެހިފައިވާ ކަމަށް ސްޓެލްކޯ އިން ބުންޏެވެ. ސްޓެލްކޯ އިން އިތުރަށް ބުނީ ކަރަންޓް ކެނޑުމުގެ ފުރުސަތު އޮތީ މާލެއަށް ވުރެ ބޮޑަށް ހުޅުމާލޭގައި ކަމަށެވެ.

މީގެއިތުރުން ޓެކްނިކަލް މައްސަލައެއް ދިމާނުވާކަމަށްވާނަމަ، މި މަހުގެ 24 ވާ ހޮނިހިރު ދުވަހަކީ މި މަސައްކަތުގެ ފަހު ދުވަހަށް ވެގެންދާނެ ކަމަށާއި އަދި މި ދެ ދުވަހު ވެސް ހުޅުމާލެއާއި، މާލެއިން ކަރަންޓު ކެނޑުމުގެ ފުރުސަތު އޮތް ކަމަށް ސްޓެލްކޯ އިން ބުންޏެވެ. ސްޓެލްކޯއިން ވަނީ ގްރޭޓަރ މާލެ ގްރިޑްގެ ފުރަތަމަ ސާކިޓް އެނަރޖައިޒްކުރުމުގެ މަސައްކަތް މި މަހުގެ 18 ވަނަ ދުވަހު ވެސް ކުރިއަށްގެންގޮސްފައެވެ.

ގްރޭޓާ މާލެ ގްރިޑް ޕްރޮޖެކްޓަކީ މިހާތަނަށް ރާއްޖޭގެ ހަކަތައިގެ ސިނާއަތުގައި ހިންގޭ މިފަދަ އެންމެ ބޮޑު އެއް މަޝްރޫޢުއެވެ. މި މަސައްކަތުގައި މިހާރު ކުރިއަށް ދަނީ ޓެސްޓިން މަރުހަލާތަކެވެ. އެހެންކަމުން ކަރަންޓު ކެނޑުމުގެ ފުރުސަތު އޮންނާނެކަމަށް ސްޓެލްކޯ އިން ވަނީ ފާހަގަކޮށްފައެވެ.