ބުދަ ދުވަހު 144 މީހުން ޕޮޒިޓިވްވި އިރު ގިނައީ ރަށްރަށުން ރިޕޯޓްކުރި ކޭސްތައް

ފާއިތުވި 24 ގަޑިއިރުގެ ތެރޭގައި އިތުރު 144 މީހަކު ކޮވިޑް-19ށް ޕޮޒިޓިވްވެފައިވާ ކަމަށް ހެލްތު ޕްރޮޓެކްޝަން އެޖެންސީ (އެޗްޕީއޭ)އިން ބުނެފިއެވެ.

އެޗްޕީއޭއިން އާންމުކޮށްފައިވާ ތަފާސް ހިސާބުތައް ދައްކާގޮތުން، އަންގާރަ ދުވަހުގެ ހަވީރު 6:00ން ފެށިގެން ބުދަ ދުވަހުގެ ހަވީރު 6:00ށް 6138 ސާމްޕަލް ނަގައި، ޓެސްޓް ކޮށްފައިވެއެވެ. މީގެ ތެރެއިން ޕޮޒިޓިވްވި 144 މީހުންގެ ތެރޭގައި ހިމެނެނީ މާލެ ސަރަހައްދުން ޕޮޒިޓިވްވި 36 މީހުންނާއި، ރަށްރަށުން ޕޮޒިޓިވްވި 72 މީހުންނާއި އަދި ރިސޯޓްތަކުން ޕޮޒިޓިވްވި 36 މީހުންނެވެ.

މި 24 ގަޑިއިރުގެ ތެރޭގައި 191 މީހުން ވަނީ ބަލިން ރަނގަޅުވެފައެވެ. ހޮސްޕިޓަލުގައި އެޑްމިޓްކޮށްގެން ފަރުވާ ދެމުން އަންނަ އަދަދު މި 24 ގަޑި އިރު ތެރޭގައި އިތުރުވެފައިވާ އިރު އިތުރު 4 މީހަކަށް އަލަށް ފަރުވާދޭން ފަށާފައިވެއެވެ. 2571 މީހުން އެކްޓިވް ކޭސްގެ ގޮތުގައި ފާހަގަކުރެވިފައިވާ އިރު، މީގެ ތެރެއިން ހޮސްޕިޓަލުގައި ފަރުވާ ދެމުން އަންނަނީ 12 މީހުންނަށެވެ.

އާދީއްތަ ދުވަހު ޕޮޒިޓިވްވި 144 މީހުންނާއެކު ރާއްޖެއިން މިހާތަނަށް ޕޮޒިޓިވްވި ޖުމްލަ އަދަދު 76،332ށް ވަނީ އަރާފައެވެ. މީގެ ތެރެއިން 73،531 މީހަކު ވަނީ ބަލިން ރަނގަޅުވެފައެވެ. އަދި 218 މީހަކު ވަނީ މި ބަލީގައި ނިޔާވެފައެވެ.

ކޮވިޑް-19ގެ ހަތަރު ވަނަ ރާޅަކަށްފަހު ރާއްޖޭގައި މިހާރު ކޮވިޑްގެ ހާލަތު އަންނަނީ ރަނގަޅުވަމުންނެވެ. ކޮވިޑްގެ ހާލަތު ރާއްޖޭގައި އެންމެ ގޯސްވެފައިވަނީ މެއި މަހުއެވެ. އެ މަހުގެ ތަފާސް ހިސާބަށް ބަލާއިރު މެއި މަހުގެ ތެރޭގައި 34،159 މީހަކު ވަނީ ކޮވިޑް-19އަށް ޕޮޒިޓިވްވެފައެވެ. އެއީ ދުވާލެއްގެ މައްޗަށް ގާތްގަނޑަކަށް 1101 މީހުންނެވެ. މެއި މަސް ނިމުނުއިރު ރާއްޖޭގައި މުޅި ޖުމްލަ ކޮވިޑަށް ޕޮޒިޓިވްވެފައިވަނީ 64،396 މީހުންނެވެ. ޖެހިގެން އައި ޖޫން މަހު ކޮވިޑަށް ޕޮޒިޓިވްވެފައިވަނީ 9402 މީހުންނެވެ. އަދި ޖުލައި މަހުގެ މިހާތަނަށް އައިއިރު މިމަސްތެރޭގައި ކޮވިޑަށް ޕޮޒިޓިވްވެފައިވަނީ 1885 މީހުންނެވެ.

ކޮވިޑްގެ ހާލަތު ރަނގަޅުވާން ފެށުމާއެކު މިހާރު އަންނަނީ ފިޔަވަޅުތަކަށް ލުއިތައް ދެމުންނެވެ.