މުޅި މާލެއަށް ކަރަންޓު ފޯރުކޮށްދެވިއްޖެ: ސްޓެލްކޯ
ކަރަންޓު ކެނޑިފައިވަނީ ގްރިޑްގެ މަސައްކަތް ކުރަމުންދަނިކޮށް
މާލޭގެ އެކި ސަރަހައްދުތައް
މުޅި މާލެއަށް މިހާރު ކަރަންޓު ފޯރުކޮށްދެވިފައިވާކަމަށް ސްޓެލްކޯއިން ބުނެފިއެވެ.
ގްރޭޓަރ މާލެ ގްރިޑްގެ ދެވަނަ ސާކިޓް އެނަރޖައިޒް ކުރުމުގެ މަސައްކަތް ކުރަމުން ދަނިކޮށް މިއަދު މެންދުރު 12 ޖަހާކަށް ހާއިރު ވަނީ ކަރަންޓު ކެނޑިފައެވެ.
އެއަށްފަހު ސްޓެލްކޯއިން ގެންދިޔައީ މުޅި މާލެއަށް ކަރަންޓު ފޯރުކޮށްދިނުމުގެ މަސައްކަތް ކުރަމުންނެވެ. އަދި ދާދި ދެންމެއަކު މުޅި މާލެއަށް ކަރަންޓު ފޯރުކޮށްދެވިފައިވާކަމަށް ސްޓެލްކޯއިން ބުނެފައިވެއެވެ.
ސްޓެލްކޯއިން ބުނީ ގްރިޑްގެ ދެވަނަ ސާކިޓް އެނަރޖައިޒް ކުރުމުގެ މަސައްކަތް މިއަދު ހަވީރު 5:00 އާ ހަމައަށް ކުރިއަށްދާނެ ކަމަށެވެ.
ކުރިއަށް އޮތް ވަގުތުތަކުގައި ވެސް ކަރަންޓު ކެނޑުމުގެ ފުރުސަތު އެބައޮތް ކަމަށް ސްޓެލްކޯއިން ވަނީ ބުނެފައެވެ.
ސްޓެލްކޯއިން ވަނީ ގްރޭޓަރ މާލެ ގްރިޑްގެ ފުރަތަމަ ސާކިޓް އެނަރޖައިޒް ކުރުމުގެ މަސައްކަތް މި މަހުގެ 18 ވަނަ ދުވަހު ވެސް ކުރިއަށްގެންގޮސްފައެވެ.
ގްރޭޓަރ މާލޭ ގްރިޑް ކަނެކްޝަނަކީ މާލެއާއި، ހުޅުމާލެ އަދި ހުޅުލޭގެ ކަރަންޓު ވިއުގަ 132 ކޭވީ ގެ 7 ކިލޯމީޓަރުގެ ދެ ސާރކިޓްއިން ގުޅާލެވޭ މަޝްރޫޢުއެވެ.
