މަލީހާއި ލޯޔަރު ވައްޑެ އިދިކޮޅު ކޯލިޝަނަށް

މި ސަރުކާރުގައި މިނިސްޓަރ އޮފް ކޮމިއުނިކޭޝަން، ސައިންސް އެންޑް ޓެކްނޮލޮޖީކަން ކުރެއްވި މުޙައްމަދު މަލީޙް ޖަމާލް އާއި ޤާނޫނީ ވަކީލް މުހައްމަދު ވަހީދު އިބްރާހިމް އިދިކޮޅު ކޯލިޝަނާ ގުޅިވަޑައިގެންފިއެވެ.

ޖުލައި 19 ވަނަ ދުވަހުގެ ރޭ އިދިކޮޅު ކޯލިޝަނުން ބޭއްވި ރަސްމިއްޔާތެއްގައި މި ދެބޭފުޅުން ވަނީ ޕްރޮގްރެސިވް ޕާޓީ އޮފް މޯލްޑިވްސް (ޕީޕީއެމް) އަށް ސޮއިކުރައްވައި، އިދިކޮޅު ޕްރޮގްރެސިވް ކޯލިޝަންގެ ވަގުތީ ލީޑަރު އަބްދުއްރަހީމް ޢަބްދުﷲއާ ފޯމު ޙަވާލުކުރައްވާފައެވެ. ޕީޕީއެމްއާ ގުޅިވަޑައިގެންނެވި ކުރީގެ މިނިސްޓަރ އޮފް ކޮމިއުނިކޭޝަން، ސައިންސް އެންޑް ޓެކްނޮލޮޖީ މުޙައްމަދު މަލީޙް ޖަމާލަކީ ވެސް އެޕާޓީގެ ކުރީގެ މެމްބަރެކެވެ. މަލީޙް ވަނީ ކުރީގެ ރައީސް ޢަބްދުﷲ ޔާމީން ޢަބްދުލްޤައްޔޫމްގެ ވެރިކަމުގައި 2013 އިން 2015 އަށް މިނިސްޓަރ އޮފް ޔޫތު އެންޑް ސްޕޯޓްސްކަމުގެ މަޤާމު ވެސް ފުރުއްވާފައެވެ. އެހެންނަމަވެސް އޭރުގެ ސަރުކާރާމެދު އުފެދުނު ޚިޔާލު ތަފާތުވުންތަކާއެކު، މަލީޙު ވެސް ވަނީ 2018 ވަނަ އަހަރު ބޭއްވި ރިޔާސީ އިންތިޚާބުގެ ތެރޭގައި މިހާރުގެ ސަރުކާރު ވެރިކަމަށް ގެނައުމަށް މަސައްކަތް ކުރައްވާފައެވެ. އެހެންނަމަވެސް މި ސަރުކާރުގައި މަލީޙު ފުރުއްވަމުން ގެންދެވި ވަޒީރުކަމުގެ މަޤާމުން މަލީހު ވަކިކުރެއްވުމާއެކު، މަލީޙު ގެންދަވަނީ މި ސަރުކާރަށް ވަރަށް ބޮޑަށް ފާޑުވިދާޅުވަމުންނެވެ.

ޤާނޫނީ ވަކީލް މުހައްމަދު ވަހީދު އިބްރާހިމަކީ ރައްޔިތުންގެ މަޖިލީހުގެ ނިމިދިޔަ ދައުރުގައި ތުލުސްދޫ ދާއިރާގެ މެންބަރުކަން ކުރައްވާފައިވާ ބޭފުޅެކެވެ. މުހައްމަދު ވަހީދު އިބްރާހީމަކީ މީގެ ކުރިން ވެސް ޕީ.ޕީ.އެމްގައި މަސައްކަތް ކުރައްވާފައިވާ ބޭފުޅެކެވެ. 2017 ވަނަ އަހަރު ވައްޑެ އެ ޕާޓީން ވަކިކުރެއްވިނަމަވެސް، ސުޕްރީމް ކޯޓުން ފަހުން ވަނީ ވައްޑެ އެ ޕާޓީން ވަކިނުވާކަމަށް ހުކުމްކޮށްފައެވެ. އެހެންނަމަވެސް ވައްޑެ ފަހުން ވަނީ އެ ޕާޓީން ވަކިވެވަޑައިގެން، އިދިކޮޅު ފަރާތްތަކާއެކު އެމް.ޑީ.ޕީ ކޯލިޝަން ސަރުކާރު ވެރިކަމަށް ގެނައުމަށް ކުރި މަސައްކަތުގައި ބައިވެރިވެވަޑައިގެންފައެވެ.