ސަރުކާރު ދެމެހެއްޓުމަށްޓަކައި ޤާސިމަށް ދެއްވެން އޮތް އެއްބާރުލުން ދެއްވަން ހުންނެވީ ތައްޔާރަށް
ރައީސް ޞާލިޙަކީ ތަފާތު ބޭފުޅެއް
ޖުމްހޫރީ ޕާޓީގެ ލީޑަރ ޤާސިމް އިބްރާހީމާއި ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙް
ސަރުކާރު ހިންގުމަށް ކޯލިޝަންގައި ހިމެނޭ ޖުމްހޫރީ ޕާޓީ (ޖޭޕީ)ގެ ފުރިހަމަ އެއްބާރުލުން ރައީސް ސާލިހަށް ލިބޭނެ ކަމަށް އެ ޕާޓީން ހާމަކޮށްފިއެވެ.
ރާއްޖެޓީވީގެ ފަލަސުރުޚީ ޕްރޮގްރާމުގައި ވާހަކަ ދައްކަވަމުން އެ ޕާޓީގެ ނާއިބުރައީސް އަޙުމަދު ސައުދު ވިދާޅުވީ ސަރުކާރު ދެމެހެއްޓުމަށްޓަކައި ޖުމްހޫރީ ޕާޓީގެ ލީޑަރ ގާސިމް އިބްރާހީމް ހުންނެވީ ރައީސް ސާލިހަށް ދެވެން އޮތް އެއްބާރުލުމެއް ދެއްވަން ތައްޔާރަށް ކަމަށެވެ.
ރައީސް ސާލިޙަކީ ތަފާތު ބޭފުޅެއް ކަމަށާއި، ބުނާ ބަހުގައި އެމަނިކުފާނު ދެމި ހުންނަވާކަމަށް ސަޢުދު ވިދާޅުވިއެވެ. ކޯލިޝަން ސަރުކާރާއެކު ވެސް ކުރިއަށް ދެވޭނެކަން އެމަނިކުފާނު ސާބިތުކޮށްދެއްވަމުންދާ ކަމަށާއި، ރައީސް ޞާލިޙަކީ މަޑުމައިތިރި ހިތްޕުޅު ތިރި ބޭފުޅެއް ކަމަށް އޭނާ ވިދާޅުވިއެވެ.
ވެރިކަމަށް އައުމަށްޓަކައި ކޯލިޝަން ސަރުކާރަކާއެކު ނޫން ގޮތަށް އެއްވެސް ބަޔަކަށް މިހާތަނަށް ރާއްޖޭގެ ވެރިކަމަށް އައުމުގެ ފުރުސަތު ލިބިފައިނުވާ ކަމަށާއި، ކޯލިޝަން ސަރުކާރުގެ ފޯމިއުލާ ގިނަ މީހުންނަށް ނޭނގޭ ކަމަށް ސައުދު ވިދާޅުވިއެވެ.
ސަރުކާރު ތެރޭގައި އޮންނަ ހިތްހަމަނުޖެހޭ ކަމެއްގެ ތެރެއަށް ދުރުން އެހެން މީހަކު ވަނުމަށްވުރެ ޕާޓީގެ ތެރޭގައި ހިމެނޭ މީހުން އެކަމަށް ފާޑުކިޔުން މާ ރަނގަޅުކަން އޭނާ ފާހަގަކުރެއްވިއެވެ. ކޯލިޝަންގެ ސަރުކާރުގެ ހުރި ކަންތައްތައް ކުރީގެ ބޭފުޅުންނަށް އެނގިވަޑައިނުގަންނަވާ ކަމަށް ވިދާޅުވެ އޭނާ ވަނީ ވަރަށް ބޮޑަށް ފާޑު ވިދާޅުވެފައެވެ.
ޕާޓީ އުފެއްދުމަކީ ކޮންމެ މީހެއްގެވެސް ހައްގެއްކަމަށާއި ޖޭޕީގެ ތެރޭގައި ތިބިގެން ޕާޓީ އުފައްދަން ބޭނުންވާކަމަށް ވާނަމަ އެއީ އެންމެ ރަނގަޅު ގޮތް ނޫން ކަމަށާއި، ޖުމްހޫރީ ޕާޓީން ދިން ޓިކެޓުގައި ހިފައިގެން އެބޭފުޅުން ޕާޓީގެ އިސް މަގާމުތަކުގައި ތިބެ އެގޮތަށް ކަންތައްތައް ކުރެއްވުމުން އިތުބާރު ގެއްލިގެންދާނެ ކަމަށާއި، އަދި އެއީ އެއްވެސް ހާލެއްގައި ބަލައިގަނެވޭނެ ކަމެއް ނޫން ކަމަށް އޭނާ ވިދާޅުވިއެވެ.
ސަޢުދު މިފަދައިން ވިދާޅުވެފައި މިވަނީ މޯލްޑިވްސް ނޭޝަނަލް ޕާޓީގެ ނަމުގައި ސިޔާސީ ޕާޓީއެއް އުފެއްދެވުމަށް ރައްޔިތުންގެ މަޖިލީހުގެ ވިލިމާލެ ދާއިރާގެ މެންބަރު އަޙުމަދު އުޝާމާއި، ރައްޔިތުންގެ މަޖިލީހުގެ ތިމަރަފުށީ ދާއިރާގެ ޖުމްހޫރީ ޕާޓީގެ މެންބަރު ޢަބްދުﷲ ރިޔާޒާއި، މަޖިލީހުގެ ދަނގެތީ ދާއިރާ ޖުމްހޫރީ ޕާޓީގެ މެންބަރު މުޙައްމަދު ނާޒިމާއި، ނިލަންދޫ ދާއިރާގެ މިނިވަން މެންބަރު ޢަބްދުލްމުޙްސިން ޙަމީދު، އަދި ނޮޅިވަރަމް ދާއިރާގެ މިނިވަން މެންބަރު މުޙައްމަދު ނަޝީދު ޢަބްދުﷲ ގުޅިގެން މަސައްކަތް ކުރައްވަން އުޅުއްވާތީއެވެ. މެމްބަރު ނާޒިމާއި ރިޔާޒަކީ ކުރިން ޖޭޕީގައި މަސައްކަތް ކުރައްވާފައިވާ ބޭފުޅުންނެވެ.
ޖުމްހޫރީ ޕާޓީން މިހެން ބުނެފައިވާއިރު ކޯލިޝަންގައި ހިމެނިވަޑައިގަންނަވާ ދެ ލީޑަރުންކަމުގައިވާ ކުރީގެ ރައީސް އަދި އެމްއެމްއާރްއެމްގެ ރައީސް މައުމޫން ޢަބްދުލް ޤައްޔޫމާއި، ޢަދާލަތު ޕާޓީގެ ރައީސް އަދި ހޯމް މިނިސްޓަރ ޝައިޚް ޢިމްރާން ޢަބްދުﷲ ވެސް ވިދާޅުވެފައިވަނީ އެ ދެ ޕާޓީންވެސް ރައީސް ޞާލިޙާއެކު ކުރިއަށް ވަޑައިގަންނަވާނެ ކަމަށެވެ.
ރާއްޖެއެމްވީއާ ވާހަކަދައްކަވަމުން ރައީސް މައުމޫން ވިދާޅުވީ އެމްއެމްއާރްއެމް އިން ކުރިއަށްދާނީ ކޯލިޝަނާއެކު ކަމަށާއި، ކޯލިޝަން ރޫޅާނުލައްވާނެ ކަމަށެވެ. އަދި ކުރިއަށް އޮތް ތާނގައި ވެސް ދާނީ ރަނގަޅަށް ކަމަށާއި ރައީސް ޞާލިޙާއެކު އެމަނިކުފާނަށް ސަޕޯޓް ދެއްވައިގެން ކުރިއަށް ވަޑައިގަންނަވާނެ ކަމަށެވެ. ރައީސް މައުމޫން މިހެން ވިދާޅުވެފައިވާއިރު މިނިސްޓަރ ޢިމްރާން ވިދާޅުވީ އޭރު ޕާޓީތައް ކޯލިޝަން ހެދުމުން ރައްޔިތުންގެ އުންމީދު ވަރަށް ބޮޑު ވެގެން ދިޔަކަމަށެވެ. އަދި ކޯލިޝަންގައި ހިމެނޭ ހުރިހާ ޕާޓީތަކަށް އެކުވެގެން މަސައްކަތް ކުރެވޭނެ މާހައުލެއް އޮތް ހިނދެއްގައި ސަރުކާރާއެކު ދެމިތިބޭނެ ކަމަށެވެ. އަދި މި ސަރުކާރު ކުރިއަށްދާނީ ކޯލިޝަނާއެކު ކަމަށާއި، ކުރީގެ ރައީސް ޢަބްދުﷲ ޔާމީނާއެކު ރައީސް ޞާލިޙު ކުރިއަށް ވަޑައިގަންނަވާތަން ނުފެންނަ ކަމަށެވެ.
ސަރުކާރުގެ ކޯލިޝަންގައި ހިމެނޭ ހުރިހާ ލީޑަރުން މިހެން ވިދާޅުވެފައި މިވަނީ މިވަގުތު ގައުމަށާއި ޕާޓީއަށް އެންމެ ރަނގަޅު ގޮތަކީ އެމްޑީޕީ ޕީޕީއެމް އިއްތިޙާދެއް ކަމަށް އެމްޑީޕީގެ ރައީސް، ރައީސް މުޙައްމަދު ނަޝީދު ވިދާޅުވުމާއި ގުޅިގެންނެވެ. އެގޮތުން ނަޝީދު ވަނީ ޕީޕީއެމްއަށް ބަދަލު ތަކެއް ގެނެވި، އެ ބަދަލުތަކަކީ އިންޑިއާ އައުޓް ފަލްސަފާއާ ދުރު، ނަފްރަތުގެ ބިލަށް ތާއީދުކުރާ، މިއުޒިކަށް ވެސް އެއްބަސްވާ ބަދަލުތަކަކަށްވެ، އެ ހަމަތަކުގައި ސަރުކާރު ހިންގުމަށް ޕީޕީއެމާ އެއްބަސްވެވޭ އެމްޑީޕީ-ޕީޕީއެމް އިއްތިޙާދެއް އުފެއްދެވުމަށް ކުރީގެ ރައީސް ޢަބްދުﷲ ޔާމީންގެ އެހީއަށް އެދިވަޑައިންނެވުމަކީ މިވަގުތު އެންމެ ރަނގަޅު ގޮތް ކަމަށް ވެސް ވިދާޅުވެފައެވެ. ރައީސް ނަޝީދު އެމްޑީޕީ އެހެން މިސްރާބަކަށް ގެންދަވައި ޕީޕީއެމާއެކު މަސައްކަތްކުރައްވަން ބޭނުންފުޅުވާކަން ފައުޅުކަންބޮޑު ގޮތެއްގައި މިހާރު އަންނަނީ ހާމަ ކުރައްވަމުންނެވެ.
އެހެންނަމަވެސް މިކަމާގުޅިގެން އިދިކޮޅު ކޯލިޝަން ޕީޕީއެމް/ޕީއެންސީއިން ބުނަނީ އެ ޕާޓީން ރައީސް ނަޝީދާއެކު މަސައްކަތް ނުކުރާނެ ކަމަށެވެ.
