އީރާނުގެ ވެރިރަށް ތެހްރާންގައި ކޮވިޑާ ދެކޮޅަށް ހަރުކަށި ފިޔަވަޅުތަކެއް

އީރާނުގެ ވެރިރަށް ތެހްރާނާ ކައިރީގައިވާ ރަށްރަށުގައި ކޮވިޑް-19 ފެތުރުން ކޮންޓްރޯލު ކުރުމަށް ޚާއްސަ، ވަރުގަދަ ފިޔަވަޅުތަކެއް އަޅައިފިއެވެ.

އީރާނުން ފެންނަ ކޮވިޑް ކޭސްތައް އިތުރުވާން ފަށާފައިވާއިރު މި މަހުގެ ކުރީކޮޅު އެގައުމުގެ ރައީސް ޙަސަން ރޫޙާނީ ވަނީ، އެ ގައުމަށް ކޮވިޑްގެ ފަސް ވަނަ ރާޅެއް އަރާފާނެ ކަމުގެ އިންޒާރު ދެއްވާފައެވެ. ރޫޙާނީ ވިދާޅުވީ އެގައުމުގައި ވެސް ކޮވިޑްގެ ކޭސްތައް އިތުރުވަމުންދަނީ ކޮވިޑްގެ ވޭރިއަންޓެއް ކަމަށްވާ ޑެލްޓާ ވޭރިއަންޓުގެ ސަބަބުން ކަމަށެވެ.

އަޅާފައިވާ ފިޔަވަޅުތަކަށް ބަލާއިރު ތެހްރާނާއި އަލްބޯޒް ޕްރޮވިންސުގައިވާ، ސަރުކާރު އޮފީސްތަކާއި ބޭންކުތައް އަންނަ ހޯމަ ދުވަހުގެ ނިޔަލަށް ބަންދު ކުރަން އެންގުމާއި، ކޮވިޑް ހަލުވިކަމާއެކު ފެތުރެމުންދާ ސަރަހައްދުތަކުގައި ވިޔަފާރިތައް ބަންދު ކުރަން އެންގުން ހިމެނެއެވެ. މީގެ އިތުރުން ވެސް އިތުރު ފިޔަވަޅުތަކެއް އަޅާފައިވާއިރު އެގައުމުގައި މިހާތަނަށް އެގައުމުގައި ކޮވިޑް ޖެހިގެން 87,370 މީހަކު ވަނީ މަރުވެފައެވެ.

ފާއިތުވި 24 ގަޑިއިރަށް ބަލާއިރު އައު 25,441 ކޭސް ރިޕޯޓުކޮށްފައިވެއެވެ. އަދި 213 މީހަކު ބަލީގައި ފާއިތުވި 24 ގަޑިއިރު މަރުވެފައިވާއިރު، ތެހްރާނުން އެކަނިވެސް 92 މީހުން މަރުވެފައިވާ ކަމަށް ރިޕޯޓުތައް ބުނެއެވެ.