ރައީސުލްޖުމްހޫރިއްޔާ ހަނިމާދޫއަށް ވަޑައިގެންފި
ހަނިމާދޫގައި މަގުތަކުގެ ތާރު އެޅުމުގެ މަސައްކަތްތައް ރައީސް ފަށްޓަވައިދެއްވާނެ
ރައީސް ސާލިހު ހދ. އަތޮޅަށް ކުރައްވާ ދަތުރުފުޅުގެ ތެރެއިން
ރައީސުލްޖުމްހޫރިއްޔާ ތިލަދުންމަތީގެ 3 ރަށަކަށް ކުރައްވާ ދަތުރުފުޅުގެ ތެރެއިން އެންމެ ފަހު މަންޒިލެއްގެ ގޮތުގައި ހަނިމާދޫއަށް ވަޑައިގެންފިއެވެ.
މިދަތުރުފުޅުގައި ހަނިމާދޫ ކައުންސިލާ ރައީސް ބައްދަލުކުރައްވައި މަޝްވަރާ ކުރައްވާނެއެވެ.
ރައީސްގެ މި ދަތުރުފުޅު ފަށްޓަވާފައިވަނީ، މި މަހުގެ 16 ވަނަ ދުވަހުއެވެ. އެންމެ ފުރަތަމަ ވަޑައިގެންނެވީ ކުޅުދުއްފުށި ސިޓީއަށެވެ. ކުޅުދުއްފުއްޓަށް ވަޑައިގެން އެ ސިޓީގައި ހުންނަ ރީޖަނަލް ހޮސްޕިޓަލަށާއި، 3 ސްކޫލަކަށް ރައީސް ޒިޔާަރަތް ކުރެއްވިއެވެ. އަދި ކުޅުދުއްފުށި ސިޓީ ކައުންސިލާއި އަތޮޅު ކައުންސިލާ ބައްދަލުކުރައްވައި މަޝްވަރާތައް ކުރިއަށް ގެންދެވިއެވެ.
އެއަށްފަހު ޖުލައި 17 ވަނަ ދުވަހު ވަޑައިގަތީ ހދ. ކުމުންދުއަށެވެ. އެރަށުގައި ވެސް ކައުންސިލާއި ޑަބްލިއުޑީސީ މެމްބަރުންނާ ބައްދަލުކުރައްވައި ރަށަށް މިވަގުތު އެންމެ ބޭނުންވާ ކަންކަމާއި ދިމާވާ ދަތިތަކަށް ހައްލުހޯދުމާ ގުޅޭގޮތުން މަޝްވަރާ ކުރެއްވިއެވެ. އަދި ކުމުންދޫގައި ޕޮލިސް ޕޯސްޓެއް ހެދުމާ ގުޅޭ ގޮތުން ވެސް މަޝްވަރާ ކުރެއްވިއެވެ. އަދި ކުމުންދޫގެ ބައެއް މަޝްރޫއުތައް ކުރިއަށްދާ ސަރަހައްދަށް ރައީސްގެ ދެކަނބަލުން ޒިޔާރަތް ކުރެއްވިއެވެ.
ކުމުންދޫއަށް ފަހު އާދިއްތަ ދުވަހު ހަނިމާދޫއަށް ވަޑައިގެން ހަނިމާދޫގައި މަގުތަކުގެ ތާރުއެޅުމުގެ މަސައްކަތްތައް ރައީސް ފަށްޓަވައިދެއްވާނެއެވެ. ހަނިމާދޫގެ މަގުތައް ހެދުމުގެ މަޝްރޫއު އެމްޓީސީސީއާ ހަވާލުކުރެވުނީ 2019 ވަނަ އަހަރުގެ މެއި މަހުގެ 22 ވަނަ ދުވަހުއެވެ. މި މަޝްރޫއުގެ ދަށުން ހަނިމާދޫގެ 20 މަގެއްގައި ތާރު އެޅުމާއި ފެން ހިންދާ ނިޒާމު ގާއިމުކުރުމާއި މަގުބައްތި ހަރުކުރުމުގެ މަސައްކަތް ވެސް ކުރިއަށް ގެންދާނެއެވެ.
މި މަޝްރޫއަކީ، 71.9 މިލިއަން ރުފިޔާގެ މަޝްރޫއެކެވެ.
