ރޯޑް ޑިވޮލޮޕްމަންޓް ކޯޕަރޭޝަން (އާރްޑީސީ) އިން ހުޅުމާލޭގައި ބަލަހައްޓަމުންދާ ހިޔާ ގައި މޯލްޑިވްސް އިމިގްރޭޝަނުން ބައިތިއްބާފައި ތިބި ބިދޭސީންނާ ގުޅޭ ގިނަ މައްސަލަތަކެއް ފެންމަތިވަމުންދާކަމަށް ރާއްޖެއެމްވީއަށް މައުލޫމާތު ލިބިއްޖެއެވެ.
މައުލޫމާތު ލިބިފައިވާ ގޮތުގައި އެ ބިދޭސީންނަކީ އިމިގްރޭޝަނުން ފުލުހުންނާ ގުޅިގެން ހިންގި އޮޕަރޭޝަނަކަށްފަހު ބައިތިއްބާފައި ތިބި ބިދޭސީންނެވެ.
އެމްޕީއެލް ހިޔާއަކީ އާރްޑީސީގެ ބެލުމުގެ ދަށުގައިވާ އިމާރާތެއް ނަމަވެސް، ބިދޭސީންގެ ކަންކަމުގައި އާރްޑީސީން ޙަވާލުވެފައިވަނީ ހަމައެކަނި އެތަން ބެލެހެއްޓުމަށް ކަމަށް ރާއްޖެއެމްވީއަށް މައުލޫމާތު ލިބިފައިވެއެވެ.
އެތަނުގައި ތިބި ބިދޭސީންގެ ކަންކަން މޮނިޓަރ ކުރުމަށް ޙަވާލުވެފައިވަނީ އިމިގްރޭޝަނަށެވެ. އެގޮތުން އޭރު އެތަނުގައި އިމިގްރޭޝަންގެ އޮފީސް ސެޓަޕެއް ހެދުމަށް މަޝްވަރާކުރި ނަމަވެސް، މިހާތަނަށްވެސް އެކަން ކޮށްފައިނުވާކަމަށް ރާއްޖެއެމްވީއަށް މައުލޫމާތު ދިން ފަރާތުން ބުންޏެވެ. މިހާރު ބިދޭސީން އެތަނުގައި ބައިތިއްބާފައި ތިބޭދާ ދެމަހަށްވުރެ ގިނަ ދުވަސްވާން ކައިރިވެފައިވާއިރު، ބިދޭސީންނާ ގުޅޭ އެތައް މައްސަލައެއް ވަނީ ފުލުހުންނަށްވެސް ހުށައަޅާފައެވެ. އެގޮތުން އެތަނުން ނުކުމެ ކައިރި ސަރަޙައްދުތަކުގެ ކޮންސްޓްރަކްޝަން ސައިޓުތަކުން ވައްކަން ކުރާ މައްސަލަތަކެއް ތަކުރާރުކޮށް ފުލުހުންނަށް ހުށައެޅިފައިވާކަމަށް ރާއްޖެއެމްވީއަށް މައުލޫމާތު ދިން ފަރާތުން ބުނެއެވެ. އަދި މަސައްކަތް ކުރާ ސައިޓުތަކުން އަމިއްލައަށްވެސް އެ މައްސަލަ އެތައް ފަހަރަކު ފުލުހުންގެ ސަމާލުކަމަށް ގެނެސްފައިވާކަމަށް މައުލޫމާތު ލިބެއެވެ.
އެކަމާ ގުޅޭގޮތުން ރާއްޖެއެމްވީން ސުވާލުކޮށްލުމުން އާރްޑީސީގެ އޮފިޝަލަކު ވިދާޅުވީ، އެފަދަ މައްސަލަތައް ތަކުރާރުވަމުންދާތީ އެކަމާ އާރްޑީސީންވެސް ނުހަނު ކަންބޮޑުވާ ކަމަށެވެ. އަދި އެފަދަ މައްސަލަތައް ރިޕޯޓު ކުރެވެމުންދާކަން އޭނާވެސް ވަނީ ކަށަވަރު ކޮށްދެއްވާފައެވެ.
މި މައްސަލައާ ގުޅޭގޮތުން ރާއްޖެއެމްވީން ސުވާލުކޮށްލުމުން އިމިގްރޭޝަންގެ މީޑިއާ އޮފިޝަލު ވިދާޅުވީ، ފޭސް2 ގައި ބިދޭސީން ބަހައްޓާފައިވާ ފެސިލިޓީއަކީ ޑިޓެންޝަން ސެންޓަރެއް ނޫން ކަމަށާއި، އެތަނުގައި ބައިތިއްބާފައި ތިބި ބިދޭސީންނަކީ ފުރަބަންދުގައި މަގުމަތިވި ބިދޭސީން ކަމަށެވެ. އަދި އެމީހުން ބައިތިއްބާފައި ތިބީ ވަގުތީ ހިޔާއެއްގެ ގޮތުގައިކަމަށް އޭނާ ވިދާޅުވިއެވެ. އަދި އެމީހުން އަނބުރާ ޤައުމަށް ފޮނުވާލެވެންދެން އެތަނުގައި ބައިތިއްބާފައި ތިބިނަމަވެސް، އެމީހުންނާ ގުޅޭ ކަންކަން ބަލަހައްޓަމުންދާނީ އިމިގްރޭޝަނުން ކަމަށް އޭނާ ވިދާޅުވިއެވެ. އޭނާ ވިދާޅުވީ، އާރްޑީސީން ބަލަހައްޓަމުންދަނީ އެމީހުން ބައިތިއްބާފައި ތިބި އިމާރާތުގެ ސެކިއުރިޓީ ކަމަށެވެ.
