ވަކީލުން ފަނޑިޔާރުންނަށް ނުފޫޒު ފޯރުވާކަމުގެ ޝަކުވާ ލިބޭ: ބާ ކައުންސިލް

ކޯޓުތަކުގައި ޝަރީއަތްތައް ކުރިއަށްދާއިރު، ގާނޫނީ ވަކީލުން ފަނޑީޔާރުންނަށް ނުފޫޒު ފޯރުވައި ވަކީލުންގެ ނަޒާހަތްތެރިކަމާ މެދު ސުވާލު އުފެދޭ ފަފަ އަމަލުތައް ހިންގަމުންދާ ކަމުގެ ޝަކުވާ ބާ ކައުންސިލްއަށް ލިބިފައިވާ ކަމަށް އެ ކައުންސިލުން ބުނެފިއެވެ.

ބާ ކައުންސިލުން ނެރުނު ނޫސްބަޔާނެއްގައި ވަނީ އެފަދަ ޝަކުވާތައް ލިބިފައިވާ ކަން ފާހަގަކޮށް ވަކީލުންގެ ނަޒާހަތްތެރިކަން ކަށަވަރުކުރުމަށާއި، ގާނޫނީ ވަކީލުންގެ ފަރާތުން މަސައްކަތުގެ ދާއިރާގައި ހިފަހައްޓަންޖެހޭ ސުލޫކީ މިންގަނޑާ ހިލާފު އަމަލުތަކުން ދުރުވެ ތިބުމަށް، ވަކީލުންނަށް އިލްތިމާސްކޮށްފައެވެ. މީގެ އިތުރަށް ވެސް އެ ކައުންސިލަށް ފާހަގަވެފައިވާ ބައެއް ކަންކަން ފާހަގަކޮށްފައިވެއެވެ.

އެގޮތުން ކޯޓުތަކުގެ ފަނޑިޔާރުންގެ ހުރުމަތް ކެނޑޭ އަދި އާންމުން ކޯޓުތަކަށް ކުރާ އިތުބާރު ގެއްލޭ ފަދަ ބައެއް ވާހަކަތައް ވަކީލުން ސޯޝަލް މީޑިއާގައި ދައްކަމުންދާކަން ފާހަގަކޮށްފައިވެއެވެ. އެއީ ކަންބޮޑުވާ ކަމެއްކަން ފާހަގަކޮށް އެ ކައުންސިލުން ބުނީ ވަކީލުން މިސްމީޑިއާގައި ހަރަކާތްތެރިވާއިރު، ގާނޫނީ ފަންނާއި އާންމު ސުލޫކީ މިންގަނޑުތައް ހިފަހައްޓައި ފަނޑިޔާރުންނާއި، ކޯޓުތަކުގެ ހުރުމަތާއި ގަދަރަށް އިހްތިރާމްކުރުން މުހިންމު ކަމަށެވެ.

މީގެ އިތުރަށް ގާނޫނީ ވަކީލުން ޢަމަލުކުރަންޖެހޭ ސުލޫކާ ހިލާފުވެއްޖެ ކަމުގެ މައުލޫމާތެއް ބާ ކައުންސިލަށް ލިބިއްޖެނަމަ، ނުވަތަ އެފަދަކަމެއް ހިންގާފައިވާކަމަށް ބާ ކައުންސިލަށް ފެނިގެން އެ މައްސަލައެއް ބާ ކައުންސިލުގެ އިސްނެގުމުގެ މަތިން ބެލުމުގެ އިހްތިޔާރު ކައުންސިލަށް ލިބިފައިވާކަން ހަނދާންކޮށްދީ އެކަންކަމުން ދުރުވެ ތިބުމަށް ނަސޭހަތްތެރިވެފައިވެއެވެ.