ބިދޭސީން ގެނައުމާއި އެބިދޭސީންނާ ގުޅޭ ކަންތައްތައް ބެލެހެއްޓުމަށް މީހުން ތަމްރީން ކުރަނީ
ބިދޭސީ މަސައްކަތްތެރިންނާ މެދު އަމަލު ކުރެވޭނެ ގޮތްތަކާއި ލިބިދޭ ހައްގުތަކަށް ރިޕްރެޒެންޓޭޓިވްސް އަހުލުވެރިކުރަން ޖެހޭ
ރާއްޖޭގައި މަސައްކަތްކުރާ ބިދޭސީންތަކެއް
ދިވެހިރާއްޖޭގައި ވަޒީފާ އަދާކުރަން ބިދޭސީން ގެނައުމާއި އެ ބިދޭސީންނާ ގުޅޭ ކަންތައްތައް ބެލެހެއްޓުމުގައި ރިޕްރެޒެންޓޭޓިވްސްގެ ގޮތުގައި ހަރަކާތްތެރިވާ ފަރާތްތަކުން ފުރިހަމަކުރަންްޖެހޭ ތަމްރީނު ހެދުމުގެ ފުރުސަތު ހުޅުވާލައިފިއެވެ.
އިކޮނޮމިކް މިނިސްޓްރީން ބުނީ (ދިވެހިރާއްޖޭގައި ބިދޭސީންވަޒީފާ އަދާކުރުމާބެހޭ ގަވާއިދު)ގެ 8 ވަނަ މާއްދައިގައި ބަޔާންކުރާ ވަޒީފާދޭ ފަރާތްތަކުން އައްޔަންކުރާ، އެ ފަރާތެއްގެ ނަމުގައި އެކްސްޕޯޓް ސިސްޓަމުގައި މުއާމަލާތްކުރާނެ "ރެޕްރެޒެންޓޭޓިވް" ފުރިހަމަ ކުރާންޖެހޭނެކަމަށް، އެގަވާއިދުގެ ޖަދުވަލު 1 "ދިވެހިރާއްޖެއަށް ބިދޭސީން ގެނައުމުގެ ހުއްދަ ދިނުމަށް ބޭނުންކުރާ ސިސްޓަމުގައި ރަޖިސްޓަރީވުމާއި، އެ ސިސްޓަމް ބޭނުންކުރުމުގެ އުސޫލު"ގެ 5 ވަނަ މާއްދާގައި ބަޔާންކުރާ ތަމްރީން "ސެޓްފިކެޓް އިން އެމްޕްލޯއިމަންޓް އިންޓަރމީޑިއަރީސް ކޯސް" ފުރިހަމަކޮށް ސަނަދު ހޯދުމުގެ ފުރުސަތު، މިނިސްޓްރީއާއި ދިވެހިރާއްޖޭގެ ގައުމީ ޔުނިވަރސިޓީ (އައިޔޫއެމް) ގުޅިގެން ހުޅުވާލާފައިވާ ކަމަށެވެ.
އިކޮނޮމިކް މިނިސްޓްރީން ބުނީ މި ކޯހުގެ މަގުސަދަކީ ދިވެހިރާއްޖޭގައި ވަޒީފާ އަދާކުރަން ބިދޭސީން ގެނައުމާއި އެ ބިދޭސީންނާ ގުޅޭ ކަންތައްތައް ބެހެލެއްޓުމުގައި ރިޕްރެޒެންޓޭޓިވްސްގެ ގޮތުގައި ހަރަކާތްތެރިވާ ފަރާތްތަކަށް، ކަމާ ގުޅުންހުރި ގާނޫނުތަކާއި ގަވާއިދުތައް ކިޔައިދީ، އެފަރާތްތަށް ކުރުން ލާޒިމްކުރާ ކަންތައްތަކާއި ޒިންމާތައް އަންގަދިނުން ކަމަށެވެ. އަދި މި ކޯހުގައި، މަސައްކަތު މާހައުލުގައި ބިދޭސީ މަސައްކަތްތެރިންނާ މެދު އަމަލު ކުރެވޭނެ ގޮތްތަކާއި ލިބިދޭ ހައްގުތަކަށް ރިޕްރެޒެންޓޭޓިވްސް އަހުލުވެރިކޮށްދޭނެ ކަމަށް މިނިސްޓްރީން ބުނެއެވެ.
"ސެޓްފިކެޓް އިން އެމްޕްލޮއިމަންޓް އިންޓަރމީޑިއަރީސް" ކޯހުގެ މުއްދަތަކީ 5 ހަފްތާއެވެ. މި ކޯހުގެ ފުރަތަމަ ބެޗް ކުރިޔަށް ގެންދިޔުމަށް ހަމަޖެހިފައިވަނީ ޖުލައި/އޮގަސްޓް 2021ގައެވެ. މި ކޯހުގެ ޕާރޓިސިޕޭޝަން ފީ އެއްގެ ގޮތުގައި 600ރ އަދި 200ރ އެގްޒާމް ފީ ގޮތުގައި ނެގުމަށް ވަނީ ހަމަޖެހިފައެވެ.
"އެކްސްޕެޓް އޮންލައިން ސިސްޓަމް"ގައި ރަޖިސްޓްރީވެ ސިސްޓަމް މެދުވެރިކޮށް ޚިދުމަތްތަކަށް އެދޭ ރެޕްރެޒެންޓޭޓިވްސްގެ ތެރެއިން 10 ބިދޭސީންނަށްވުރެ ގިނަ ބިދޭސީންގެ ކަންތައްތައް ބަލަހައްޓާ ހުރިހާ ރިޕްރެޒެންޓޭޓިވްސްއަށް، 2022 ޖަނަވަރީ އެއް ވަނަ ދުވަހުން ފެށިގެން "އެކްސްޕޯޓް އޮންލައިން ސިސްޓަމް" މެދުވެރިކޮށް ޚިދުމަތް ދެވޭނީ ކޯސްފުރިހަމަކޮށް، ސަނަދު ލިބުމުން ކަމަށް މިނިސްޓްރީން ބުނެއެވެ. އަދި ކޯހަށް ޝައުގުވެރިވާ މީހުން އެމްއެންޔޫގެ ދަރިވަރުންގެ އިދާރީ ޚިދުމަތްތަކާ ބެހޭ އެޕްލިކޭޝަން ފޯމާއިއެކު އައިޑީ ކާޑު ކޮޕީ ހުށަހެޅުމަށް އެދޭ ކަމަށެވެ. ނުވަތަstudentservices@mnu.edu.mv އަށް އީމެއިލް ކުރުމަށް އެދިފައިވެއެވެ.
ފޯމް ހުށަހެޅުމުގެ ސުންގަޑިއަކީ 24 ޖުލައި 2021އެވެ.
