މޯލްޑިވްސް ނޭޝަނަލް ޕާޓީގެ ނަމުގައި ސިޔާސީ ޕާޓީއެއް އުފެއްދުމަށް މަސައްކަތްކުރުމުގެ ހުއްދަ ރައްޔިތުންގެ މަޖިލީހުގެ ވިލިމާލެ ދާއިރާގެ މެންބަރު އަހުމަދު އުޝާމަށް ދީފައިވާ ކަމަށް އިލެކްޝަންސް ކޮމިޝަނުން ބުނެފިއެވެ.
މިކަމާ ގުޅިގެން މެންބަރު އުޝާމް ވިދާޅުވީ އެ ޕާޓީއަކީ ރައްޔިތުންގެ މަޖިލީހުގެ ތިމަރަފުށީ ދާއިރާގެ ޖުމްހޫރީ ޕާޓީގެ މެންބަރު އަބްދުﷲ ރިޔާޒާއި، މަޖިލީހުގެ ދަނގެތީ ދާއިރާ ޖުމްހޫރީ ޕާޓީގެ މެންބަރު މުހައްމަދު ނާޒިމްގެ އިތުރުން ނިލަންދޫ ދާއިރާގެ މިނިވަން މެންބަރު އަބްދުލްމުހްސިން ހަމީދު އަދި ނޮޅިވަރަމް ދާއިރާގެ މިނިވަން މެންބަރު މުހައްމަދު ނަޝީދު އަބްދުﷲ ގުޅިގެން އުފެއްދުމަށް މަސައްކަތް ކުރައްވަމުންދާ ސިޔާސީ ޕާޓީއެއް ކަމަށެވެ.
މެންބަރު އުޝާމު ވިދާޅުވީ ރައްޔިތުންގެ މަޖިލީހުގައި މިހާރު އޮތް ލީޑަރޝިޕްގެ ދަށުން މަޖިލީހުގައި މިނިވަން މެންބަރެއްގެ ގޮތުގައި މަސައްކަތްކުރެއްވުމުގައި ވަރަށް ބޮޑެތި ގޮންޖެހުންތަކަކާ ކުރިމަތިލައްވަންޖެހިވަޑައިންނަވާ ކަމަށެވެ.
އެގޮތުން ގާނޫނީ ގޮތުން މުހިންމު މައްސަލަތަކުގައި އެކަށީގެންވާ ގޮތެއްގައި ބަހުސްކޮށް ވާހަކަދެއްކެވުމަށް ފުރުސަތު ލިބިނުލައްވާ ކަމަށާއި، ބައެއްފަހަރު ލިބިލައްވަނީ އެންމެ 30 ސިކުންތު ކަމަށެވެ. އޭގެއިތުރުން ދާއިރާގެ ކަންކަމުގައި ސަރުކާރުގެތެރެއިން މަސައްކަތް ކުރުމުގައި ވެސް އެކަށީގެންވާ ގޮތެއްގައި އެއްބާރުލުން ހޯއްދެވުމުގައި ދަތިތަކެއް އެބަހުރި ކަމަށް މެންބަރު ވިދާޅުވިއެވެ.
މެންބަރު އުޝާމް ވިދާޅުވީ އެހެންކަމުން މި މައްސަލައަށް ހައްލެއް ހޯއްދެވުމަށް ގިނަ ފަރާތްތަކަކާ މަޝްވަރާ ކުރައްވާފައިވާ ކަމަށެވެ. އަދި މިކަމުގެ އެންމެ ރަނގަޅު ހައްލެއްކަމަށް ފެނިވަޑައިންނަވާފައިވަނީ މެންބަރުގެ ހިއްސާ އެކުލެވޭގޮތަށް ސިޔާސީ އައު ޕާޓީއެއް އުފެއްދެވުން ކަމަށެވެ.
ރާއްޖޭގެ ސިޔާސީ ދާއިރާ އަނެއްކާވެސް ވަރަށް ބޮޑަށް ހަލަބޮލި ވެފައިވާ މި ދަނޑިވަޅުގައި ކުރީގެ ރައީސް މައުމޫން ޢަބްދުލް ޤައްޔޫމްގެ އެންމެ އަރިސް ބޭފުޅުންގެ ތެރޭގައި ހިމެނިވަޑައިގަންނަވާ ޢަބްދުﷲ ކަމާލުއްދީން ވެސް ވަނީ ސިޔާސީ ޕާޓީއެއް ރަޖިސްޓްރީކުރުމަށް އިލެކްޝަންސް ކޮމިޝަނަށް ވަނީ ހުށަހަޅުއްވާފައެވެ.
މީގެ އިތުރުން އެމްޑީޕީގެ ތެރޭގައި ދެ ރައީސުންގެ ފެކްޝަނެއް އުފެދިފައިވާކަމުގެ އަޑު ވަނީ ގަދަވެފައެވެ. ރާއްޖޭގައި މިހާރު ވެސް 10 ސިޔާސީ ޕާޓީ އެބައޮތެވެ.
