ވިޔަފާރި ބަނދަރު ގުޅީފަޅަށް ބަދަލުކުރުން: ބަނދަރުގެ މާސްޓަރ ޕްލޭން ނިމިއްޖެ

މޯލްޑިވްސް ޕޯޓްސް ލިމިޓެޑް (އެމްޕީއެލް)އިން ޚާއްސަ އިސްކަމެއްދީގެން ކުރަމުންދާ މަސައްކަތަކީ ވިޔަފާރި ބަނދަރު ގުޅީފަޅަށް ބަދަލުކުރުމަށް ކުރަން ޖެހޭ މަސައްކަތްތައް ކުރުން ކަމަށް އެމްޕީއެލްގެ މެނޭޖިންގް ޑިރެކްޓަރ ޝާހިދު ޢަލީ ވިދާޅުވެއްޖެއެވެ.

ކްލަބް ހައުސް މެދުވެރިކޮށް އެމްޑީޕީގެ ހަރުގެ ޖަލްސާގައި ވާހަކަދައްކަވަމުން ޝާހިދު ވިދާޅުވީ މިހާރު ރާއްޖޭގެ އިޤްތިޞާދަށް ބަލާއިރު މިހާރުގެ ވިޔަފާރި ބަނދަރަކީ އެންމެ އެކަށީގެންވާ ބަނދަރެއް ނޫން ކަމަށެވެ. ޝާހިދު ވިދާޅުވީ ސަރުކާރުގެ ވެސް އެންމެ މުހިންމު އެއްސިޔާސަތަކީ އިޤްތިޞާދަށް ބޭނުންވާވަރުގެ އަދި ރަނގަޅު ފެންވަރުގެ ބޮޑު ބަނދަރެއް ހެދުން ކަމަށެވެ.

ޝާހިދު ވިދާޅުވީ މާލޭގެ ވިޔަފާރި ބަނދަރު ގުޅީފަޅަށް ބަދަލު ކުރުމަށްޓަކައި ބަނދަރު ޑިޒައިން ކުރުމުގެ މަސައްކަތް ސަރުކާރުން ކަމާބެހޭ މުއައްސަސާތަކާއެކު ކުރިއަށް ގެންދާކަމަށެވެ. އެގޮތުން ބަނދަރުގެ މާސްޓަރ ޕްލޭން ހެދިފައިވާ ކަމަށާއި، ޑީޓެއިލް ޑިޒައިންއާ ހަމައަށް ދެވިފައިވާ ކަމަށް ޝާހިދު ވިދާޅުވިއެވެ. އަދި ކޮންޓެކްޓަރުން ޝޯޓް ލިސްޓް ކުރެވޭ ހިސާބަށް އާދެވިފައިވާކަން އޭނާ ފާހަގަކުރެއްވިއެވެ.

މާލޭގެ ވިޔަފާރި ބަނދަރުގެ އިތުރުން، ހިތަދޫ ވިޔަފާރި ބަނދަރާއި ކުޅުދުއްފުށީ ވިޔަފާރި ބަނދަރު ތަރައްގީ ކުރުމަށް ޑިވަލޮޕްމެންޓް ޕްލޭންތައް ތައްޔާރު ކުރެވިފައިވާ ކަމަށް ޝާހިދު ވިދާޅުވިއެވެ. އަދި ހުވަދުއަތޮޅުގައި އިންޓަރނޭޝަނަލް ވިޔަފާރި ބަނދަރެއް ހެދުމުމަށް ފެށި މަސައްކަތުގެ ތެރެއިން މިހާރު ފުރަތަމަ ފޭސްގެ މަސައްކަތް ނިމި ދެވަނަ ފޭސްގެ މަސައްކަތްތައް ފަށާފައިވާ ކަމަށާއި، ފިޒިކަލް އޮޕަރޭޝަންސް މިއަހަރު ފަހުކޮޅު ފެށޭނެ ކަމަށެވެ. އަދި ވިދާޅުވީ ރާއްޖޭގެ އެކިކަންކޮޅުތަކުގެ ވިޔަފާރި ބަނދަރުތައް ތަރައްގީކުރެވިގެން ދިއުމާއެކު މުދަލަށް ހެޔޮ ބަދަލުއައުމާއި، މުދާ ގެންދިއުމަށް ގިނަގުނަ ފަސޭހަތަކެއް ލިބިގެންދާނެ ކަމަށެވެ.

މިސަރުކާރު ވެރިކަމަށް އައިއިރު އެމްޕީއެލް އޮތް ހާލަތަށް އިޝާރާތް ކުރައްވައި ޝާހިދު ވިދާޅުވީ ކުންފުނީގެ ހާލަތު އޭރު އޮތީ ވަރަށް އުނދަގޫ ފައްތަރެއްގައި ކަމަށެވެ.

އޭރުގެ ތަފާސްހިސާބުތަކަށް ބަލާއިރު، ބޯޓު ފަހަރު މާލެ އައުމަށްފަހު މުދާ ބޭލުމަށް 7 ދުވަސް ނުވަތަ 8 ދުވަސް ހޭދަވާ ކަމަށެވެ. އެހެންކަމުން ބޯޓު ފަހަރަށް ނުފުރި ގިނަ ދުވަސްތަކެއް ވަންދެން މާލޭގެ ބަނދަރުގައި ކިއު ޖެހިފައި އޮންނަން ޖެހޭ ކަމަށް އޭނާ ވިދާޅުވިއެވެ. އަވަސް ޚިދުމަތެއް ފޯރުކޮށްދިނުމަށް ކުރެވުނު މަސައްކަތުގެ ތެރެއިން މިހާރު މިމައްސަލަތަކަށް ހައްލު ހޯދިފައިވާކަމަށް ޝާހިދު ވިދާޅުވިއެވެ.

ޝާހިދު ވިދާޅުވީ އެމްޕީއެލުން ފޯރުކޮށްދޭ ޚިދުމަތް ފެންވަރު ރަނގަޅުކޮށް، ޚިދުމަތް ރަނގަޅުކުރުމުގެ ސިޔާސަތުގެ ދަށުން ހަލާކުވެފައި ހުރި ވަރަށް ގިނަ އިކުއިޕްމެންޓްތަކަށް ސްޕެއަރ ޕާޓްތައް ގެނެވި މަރާމަތުކުރެވުނު ކަމަށެވެ. އަދި ކްލިއަރެންސް އޮޕަރޭޝަން ބޭނުންވާ 20 ފޯކްލިފްޓާއި، އިމީޑިއޭޓްކޮށް ހޯދަންޖެހޭ އިކުއިޕްމެންޓްތައް ހޯދާފައިވާ ކަމަށެވެ. ކާގޯ އޮޕަރޭޝަންއަށް ވަރަށް ގިނަ އަދަދެއްގެ މުއައްޒަފުން ރެކްރޫޓްކުރިކަން ފާހަގަކުރައްވައި ޝާހިދު ވިދާޅުވީ ހުރިހާ ޝިޕްޓްތަކަށް އޮންލައިން ޕްލެޓްފޯމެއްވެސް ގާއިމް ކުރެވިފައިވާ ކަމަށެވެ. އަދި މޯލްޑިވްސް ކަސްޓަމްސް ސަރވިސްއާ ގުޅިގެން އީގޭޓް ފާސް ހަދާފައިވާ ކަމަށެވެ.