ކޮވިޑް-19 ބަލީގައި، އެޑްމިޓްކޮށްގެން މިހާރު ފަރުވާ ދެމުން އަންނަނީ 18 މީހުންނަށް ކަމަށް ހެލްތް ޕްރޮޓެކްޝަން އެޖެންސީ (އެޗްޕީއޭ)އިން ބުނެފިއެވެ.

އެޗްޕީއޭއިން އާންމުކޮށްފައިވާ ތަފާސް ހިސާބުތައް ދައްކާގޮތުން، ހޮނިހިރު ދުވަހުގެ ހަވީރު 6:00ން އާދީއްތަ ދުވަހުގެ 6:00ށް ހުރި ކޮވިޑްގެ އެކްޓިވް 2496 ކޭސްގެ ތެރެއިން، ހޮސްޕިޓަލުގައި ފަރުވާ ދެމުން ދަނީ 18 މީހުންނަށެވެ. މި 24 ގަޑިއިރުގެ ތެރޭގައި 6320 ސާމްޕަލް ނަގައި ޓެސްޓް ކޮށްފައިވާ އިރު، ޕޮޒިޓިވްވެފައިވަނީ 78 މީހުންނެވެ.

ޕޮޒިޓިވްވި 78 މީހުންގެ ތެރޭގައި ހިމެނެނީ މާލެ ސަރަހައްދުން ޕޮޒިޓިވްވި 28 މީހުންނާއި، ރަށްރަށުން ޕޮޒިޓިވްވި 34 މީހުންނާއި، އަދި ރިސޯޓްތަކުން ޕޮޒިޓިވްވި 16 މީހުންނެވެ.

ރާއްޖޭގައި މިހާތަނަށް ކޮވިޑަށް ޕޮޒިޓިވްވި މީހުންގެ ޖުމްލަ އަދަދު ވަނީ 75،071ށް އަރާފައެވެ. މީގެ ތެރެއިން 72،349 މީހަކު ވަނީ ބަލިން ރަނގަޅުވެފައެވެ.

ކޮވިޑް-19ށް ފަރުވާ ހޯދަމުން ދިޔަ އިތުރު މީހަކު ހޮނިހިރު ދުވަހުގެ ރޭ ދަންވަރު ވަނީ ނިޔާވެފައެވެ.

އެޗްޕީއޭއިން ބުނީ ށ. ކޮވިޑް މެނޭޖްމަންޓް ފެސިލިޓީގައި ފަރުވާ ހޯދަމުން ދިޔަ މީހަކު ހޮނިހިރު ދުވަހުގެ ރޭ ދަންވަރު 3:05 ހާއިރު ނިޔާވެފައިވާ ކަމަށެވެ. އެއީ 59 އަހަރުގެ އަންހެނެއް ކަމަށް އެޗްޕީއޭއިން ބުނެއެވެ. އެއާއެކު ރާއްޖެއިން މިހާތަނަށް ކޮވިޑް ޖެހިގެން ނިޔާވި މީހުންގެ ޖުމުލަ އަދަދު މިވަނީ 214ށް އަރާފައެވެ.