ދުނިޔޭގެ އާބާދީ ދުވަސް ފާހަގަ ކުރަމުންދާއިރު..

ކޮންމެ އަހަރެއްގެވެސް ޖުލައި މަހުގެ 11ވަނަ ދުވަހަކީ ދުނިޔޭގެ އާބާދީ ދުވަހެވެ. މިދުވަހަކީ ދުނިޔެއިން ލިބެންހުރި ވަސީލަތްތަކާ ނުބައްދަލު މިންވަރަކަށް އާބާދީ އިތުރުވުމުގެ ސަބަބުން ނުކުންނަ މައްސަލަތަކާއި އަދި ނުކުންނާނޭ މައްސަލަތަކަށް މީސްތަކުން އަހުލުވެރިކޮށް، އާބާދީ ކޮންޓްރޯލް ކުރުމަށް ހިތްވަރުދީ ބާރު އެޅުމަށްޓަކައި އދ އިސްވެ އޮވެގެން ދުނިޔޭގެ ހުރިހާ ގައުމެއްގައިވެސް ފާހަގަ ކުރަމުންދާ ވަރަށް މުހިއްމު ދުވަހެކެވެ. މިދުވަސް ފާހަގަ ކުރަމުން އަންނަނީ 11 ޖުލައި 1987ން ފެށިގެންނެވެ. އެ ތާރީޚަކީ ދުނިޔޭގެ އާބާދީ 5 ބިލިޔަނަށް އެރިކަމަށް އަންދާޒާ ކުރެވޭ ދުވަހެވެ. އޭގެފަހުން ފާއިތުވެގެންދިޔަ 34 އަހަރުގެ ތެރޭގައި ދުނިޔޭގެ އާބާދީއަށް 2.7 ބިލިޔަން މީހުން އިތުރުވެއްޖެއެވެ. މިވަގުތު ދުނިޔޭގެ އާބާދީކަމުގައި ބެލެވޭ އަދަދަކީ 7.7 ބިލިޔަނެވެ.

ރާއްޖޭގައިވެސް މިދުވަސް ކޮންމެ އަހަރަކު އަންނަނީ ފާހަގަ ކުރަމުންނެވެ. ރާއްޖޭގެ އާބާދީއަކީ ދުނިޔެއަށް ނިސްބަތްކުރާއިރު އެއްވެސް އެއްޗަކަށް ނުވި ނަމަވެސް ރާއްޖެއިން ލިބެންހުރި ވަސީލަތްތަކާއި ރާއްޖޭގެ ހާލަތަށް ނިސްބަތްކުރާއިރު އެކަށޭނަ މިންވަރަށްވުރެ ރާއްޖޭގެ އާބާދީ ބޮޑެވެ. ދާއިމީގޮތަކަށް ރާއްޖޭގައި ދިރިއުޅޭ ބިދޭސީންވެސް ހިމަނައިގެން މިވަގުތު ރާއްޖޭގެ އާބާދީ އުޅެނީ ބައިމިލިޔަނުގައެވެ. އެއީ މީގެ 110 އަހަރު ކުރިން އައްސުލްޠާން މުޙައްމަދު ޝަމްސުއްދީން ތިންވަނައިގެ ރަސްކަމުގެ ކުރީކޮޅު ބޯހިމަނައިގެން ރާއްޖޭގެ އާބާދީކަމަށް ރިކޯޑު ކުރެވިފައިވާ އަދަދަށްވުރެ ގާތްގަޑަކަށް 8 ގުނަ އިތުރު އަދަދެކެވެ.

އާބާދީ ކޮންޓްރޯލް ކުރުމަށް ހިތްވަރު ދިނުމުގެ ގޮތުން އާބާދީ ތައުލީމުގެ ނަމުގައި މީސްތަކުން ހޭލުންތެރިކުރުމުގެ ޕްރޮގްރާމެއްވެސް ރައީސް މައުމޫނުގެ ދައުރުގައި ރާއްޖޭގެ ކަންކޮޅުތަކުގައި ވަރަށް ފުޅާކޮށް ވަނީ ހިންގިފައެވެ. އާބާދީ އެވޯޑުގެ ނަމުގައި ރަށްރަށަށް އެވޯޑު ދިނުންވެސް އެދައުރުގައި ކުރިއަށް ގެންދެވުނެވެ. ރާއްޖެއަކީ ރަށްތައް ކުދިވެފައި ވަސީލަތްތައް މަދުވެފައި އަދި ކާނާގެ ބާވަތްތައް މައިގަޑުގޮތެއްގައި ބޭރުން ގެންނަ ގައުމަކަށްވާތީ އާބާދީ އިތުރުވުމުގެ ގޮންޖެހުމަކީ ރާއްޖެއަށް ކުރިމަތިވެފައިވާ ވަރަށް ބޮޑު ގޮންޖެހުމެކެވެ.

ރާއްޖޭގެ އަސްލު ހާލަތު ދެނެގަތުމާއި ރާއްޖޭގެ ޖޯގްރަފީގެ ވަނަވަރުގެ ތަސްވީރެއް ކުރަހައިލުމުގެ ޚިޔާލާއި ފިކުރު އެންމެ ފުރަތަމަ އުފަންވެގެން އައީ އައްސުލްޠާން މުޙައްމަދު މުޢީނުއްދީން އެއްވަނައިގެ ދައުރުގައެވެ. އެރަދުން ރަސްކަން ކުރެއްވީ މީލާދީން 1799 ވަނަ އަހަރުން ފެށިގެން 1835 ވަނަ އަހަރާ ހަމައަށެވެ. އެއީ ވަރަށް ދިގު ދައުރެކެވެ. ރާއްޖޭގެ ރަށްރަށާއި ފަރުފަރާއި އަތޮޅުތަކާއި ކަނޑުފަޅުގެ ޗާޓެއް ފުރަތަމަ ވުޖޫދުވެގެން އައީ އެ ރަސްކަމުގައެވެ.

ހަމައެހެންމެ ރަދުންނަށް ވަރުވާ ދައްކާން ތިބި ދިވެހީންގެ އަދަދާއި އެމީހުންގެ ކެރިފޯރުންތެރިކަމާއި މިކަންކަމުގެ މައުލޫމާތު އެއްކޮށް ބެލެހެއްޓުމުގެ ޚިޔާލު އުފަންވެގެން އައީވެސް އެ ދައުރުގައެވެ. ފަހަރުގައި މިކަންކަމުގެ ޚިޔާލު އުފެދުމަށް މެދުވެރިވީ ސަބަބަކީ މަޝްހޫރު ކޭލަކުނު ތަޅާލި ބޮޑު ވިއްސާރަ ކަމަށް ވެދާނެއެވެ. އެއީ ވަރަށް ބޮޑު ގުދުރަތީ ކާރިސާއެކެވެ. ގިނަ ރަށްތަކެއް ފަޅުވެގެންދިޔަ ކާރިސާއެކެވެ. އެކަން ހިނގީވެސް މުޢީނުއްދީނުގެ ރަސްކަމުގެ ދައުރުގައެވެ.

އެދުވަސްވަރު އެއްކުރި މައުލޫމާތުގެ ކަރުދާހެއް ނުވަތަ ޗާޓެއް މިއަދު އެއްވެސްތާކުން ފެންނާކަށް ނެތެވެ. ރާއްޖޭގެ އާބާދީއާމެދު ކިރިޔާވެސް އަލިކަމެއް ލިބެން އޮތީ ކުރިން ދެންނެވިހެން އައްސުލްޠާން މުޙައްމަދު ޝަމްސުއްދީން ތިންވަނައިގެ ރަސްކަމުގައި 1911ވަނަ އަހަރު އެއްކުރެވުނު މައުލޫމާތެވެ. އޭގައި ބުނާގޮތުން ރާއްޖޭގެ އާބާދީއަކީ 72237 އެވެ. މަސައްކަތްކުރާ ފިރިހެނުންގެ 40 އިންސައްތަ ކަމުގައިވި 14386 ފިރިހެނުންނަކީ މަސްވެރިންނެވެ. އަންހެނުންގެ 34 އިންސައްތަ ކަމުގައިވި 10486 މީހުންނަކީ ބޮނބިތަޅައި ރޯނުވެށުމުގެ މަސައްކަތް ކުރާ މީހުންނެވެ. މިއިން އެނގެނީ ދިވެހިންނަކީ ހީވާގި މުރާލި މަސައްކަތްތެރި ބައެއްކަމެވެ. އެދުވަސްވަރު ރާއްޖޭގެ އެންމެ ބައިމަދު ރަށެއްގެ ގޮތުގައި ރިކޯޑް ކުރެވިފައިވަނީ 28 މީހުން ތިބި އަރިއަތޮޅު މަޑޫގައްޔެވެ. މިހާރު އެއީ މީހުން ދިރިނޫޅޭ ރަށެކެވެ.

ގެދޮރަށް ބަލާއިރު މުޅި ރާއްޖޭގައި އޭރު ހުރީ 13781 ގެ ކަންވެސް ފާހަގަކޮށްފައިވެއެވެ. ވެރިރަށް މާލެއާއި ރާއްޖޭގެ ހުރިހާ ރަށެއްގައި ހުރިހާ ގެއެއްގެ ރަޖިސްޓަރީ ހަދަން ފެށުނީ މީގެ 60 ވަރަކަށް އަހަރު ކުރިން 1 ޖަނަވަރީ 1959ގަައެވެ. އެއީ އިބްރާހީމް ނާޞިރުގެ ބޮޑުވަޒީރު ކަމުގައި، އަދި އައްސުލްޠާން މުޙައްމަދު ފަރީދު އެއްވަނައިގެ ރަސްކަމުގަައެވެ. ހުރިހާ ރަށެއްގައި އިދާރާތައް ގާއިމު ކުރެވުނީވެސް އަދި ވިހާ-މަރުވާ، އަދި މިނޫންވެސް އިދާރީ ހިސާބުކިތާބު ދުވަހުން ދުވަހަށް ލިޔެ ބަލަހައްޓަން ފެށުނީވެސް އެ ތާރީޚުގައެވެ.