ކުރީގެ ޓޫރިޒަމް މިނިސްޓަރ އަލީވަހީދުގެ މައްޗަށްކުރާ ހަތް ދައުވާއެއްގެ އަޑު އެހުން ކްރިމިނަލް ކޯޓުގައި ތާވަލްކޮށްފިއެވެ.

މި އަޑުއެހުން ތާވަލްކޮށްފައިވަނީ، އާދީއްތަ ދުވަހުގެ މެންދުރުފަހު 15:00ށެވެ. އަޑުއެހުމެއް ތާވަލްކޮށްފައި މި ވަނީ ޝަރީއަތް އޮންލައިންކޮށް ކުރިއަށް ގެންދަން ނިންމި ނިންމުމާ ދެކޮޅަށް ޕްރޮސެކިއުޓާ ޖެނެރަލް އޮފީހުން ހައިކޯޓުގައި އިސްތިއުނާފުކުރި މައްސަލަ އެ ކޯޓުން ބާތިލްކޮށްފައިވަނިކޮށެވެ. މައްސަލަ ބާތިލް ކޮށްފައިވަނީ، އަލީ ވަހީދަށް ރައްދުވާގޮތަށް ހުށަހަޅާފައިވާ މައްސަަލަ ހުށަހެޅިފައިވާ ގޮތަށް އިސްތިއުނާފީ ދައުވާއެއްގެ ގޮތުގައި ކުރިއަށް ގެންދާނެ ޝަރުއީ އަދި ގާނޫނީ ހަމައެއް މިހިނދުގައި ނެތްކަމަށް ބުނެއެވެ.

ތާވަލް ކޮށްފައިވަނީ، ޢަލީ ވަހީދުގެ މައްޗަށް އުފުލާފައިވާ، ޖިންސީ އަނިޔާ ކުރުން، ރޭޕްކުރަން އުޅުން، ބޭއަދަބީ ގޮތުގައި ޖިންސީ ގުނަވަން ހާމަކުރުން، ހުއްދަނޫން ޖިންސީ މުއާމަލާތެއް ހިންގަން އުޅުން، ޖިންސީ ގޯނާކުރުން، ޖިންސީ ގޯނާ ކުރަން އުޅުން، އަދި ހުއްދަނޫން ޖިންސީ މުއާމަލާތެއް ހިންގަން އުޅުނުކަމުގެ ދައުވާގެ އަޑުއެހުމެކެވެ.

ޓޫރިޒަމް މިނިސްޓަރ ކަމުގެ މަގާމުގައި ހުންނެވި އިރު ޢަލީ ވަޙީދު އެ ވުޒާރާގެ އަންހެން މުވައްޒަފުންތަކަކަށް ޖިންސީ ފުރައްސާރަ ކުރި މައްސަލާގައި، އޭނާގެ މައްޗަށް ދައުވާ އުފުލައި، ޝަރީއަތް މިހާރު ކުރިއަށްދާއިރު، އެ މައްސަލަ ފެންމަތިވުމާއެކު ޕީޖީ އޮފީހުގެ އެދުމަށް ކޯޓުން އޭނާގެ ޕާސްޕޯޓު ހިފެހެއްޓިއެވެ. އެކަހެންނަމަވެސް ބޭސްފަރުވާއަށް ރާއްޖެއިން ބޭރަށް ވަޑައިގަތުމަށްޓަކައި، އެދިވަޑައިގަތުމުން ކޯޓު އަމުރެއްގެ ދަށުން ޕާސްޕޯޓު ދޫކުރީ ހަތަރު މަހަށެވެ. އަދި އެކަން ކުރީ އަސްޢަދު ޢަލީ (އަޑުބަރޭ) ޖާމިނުވާގޮތަށެވެ. އެހެންނަމަވެސް ހަތަރު މަސް ފާއިތުވެ، ޝަރީއަތް ފެށުނު އިރު ވެސް އޭނާ އެނބުރި ރާއްޖެއަށް ވަޑައެއްނުގަންނަވައެވެ. އަދި އެކަމުގެ ޒިންމާ އަޑުބަރޭ ވެސް ނަގާފައެއް ނުވެއެވެ.

ޢަލީ ވަޙީދުގެ މެޑިކަލް ކަންކަން ނުނިމޭކަމަށް ބުނެ އެކަމުގެ ލިޔެކިޔުންތައް ހުށަހަޅާފައިވާ ކަމަށް ބުނެ ކްރިމިނަލް ކޯޓުން ވަނީ އޭނާގެ ޝަރީއަތް އޮންލައިންކޮށް ކުރިއަށް ގެންދިއުމަށް ނިންމާފައެވެ. ނަމަވެސް އަލީ ވަހީދުގެ ބޭސްފަރުވާ ނުނިމޭ ކަމަށް ބުނެ ހުށަހެޅި ލިޔެކިޔުންތަކުން އަލީ ވަހީދު އެތަނުގައި ހުންނަން ޖެހޭ އެއްވެސް ސަބަބެއް ނެތް ކަން "ރާއްޖެ އެމްވީ"އަށް އެނގިފައިވެއެވެ. އެގޮތުން އެ ލިޔެކިޔުމުގައި ވަނީ 6 މަސް ފަހުން އޭނާ ރެގިއުލަރ ޗެކްއަޕްއަށް އަލުން ދެއްކުމަށް ކަމަށް ވެސް އެނގިފައިވެއެވެ.

ބޭސްފަރުވާ ކުރުމަށް އަލީ ވަހީދު މިވަގުތު ހުންނެވީ އިނގިރޭސިވިލާތުގައި ކަމަށްވާތީ، އެތަނަކީ ރާއްޖޭގެ އިހްތިސާސް ހިނގާ ތަނަކަށް ނުވާތީ އެތަނުގައި އަލީ ވަހީދު ހުންނަވައިގެން ޝަރީއަތް ކުރިއަށް ގެންދިއުމަށް ޕީޖީ އޮފީހުން ވަނީ އިންކާރުކޮށްފައެވެ.