ކޮޕާ އެމެރިކާގެ ތިންވަނަ ކޮލަމްބިއާއަށް

ދެކުނު އެމެރިކާގެ އެންމެ ޝަރަފުވެރި ފުޓްބޯޅަ މުބާރާތް ކަމަށްވާ ކޮޕާ އެމެރިކާގައި ހޮނިހިރު ދުވަހުގެ ފަތިހު ކުޅުނު މެޗު ކާމިޔާބުކޮށް، މުބާރާތުގެ ތިންވަނަ ކޮލަމްބިއާއިން ހޯދައިފިއެވެ.

މުބާރާތުގެ ތިންވަނަ ހޮވުމަށް ކުޅުނު މެޗުގައި ކޮލަމްބިއާއާ ދެކޮޅަށް ނުކުތީ ސެމީ ފައިނަލް މެޗުގައި ބްރެޒިލް އަތުން 1-0 ގެ ނަތީޖާއަކުން ބަލިވި ޕެރޫއެވެ. ކޮލަމްބިއާ މި މެޗުގައި ވާދަކުރަން ޖެހުނީ ސެމީގެ މެޗުގައި ޕެނަލްޓީގައި އާޖެންޓީނާ އަތުން 3-2 ގެ ނަތީޖާއަކުން ބަލިވުމުންނެވެ.

ހޮނިހިރު ދުވަހުގެ ފަތިހު ކުޅުނު ތިންވަނަ ހޮވާ މެޗު ކޮލަމްބިއާއިން ކާމިޔާބުކޮށްފައިވަނީ ފަހު ވަގުތު 3-2 ގެ ނަތީޖާއަކުންނެވެ.

ބްރެޒިލުގެ އެސްޓާޑިއޯ ނަސިއޮނާލުގައި ކުޅުނު މި މެޗުގައި އެންމެ ފުރަތަމަ ލަނޑު ޖަހާ ލީޑު ނެގީ ޕެރޫންނެވެ. ފުރަތަމަ ހާފުގެ ފަހު މިނެޓުގައި މި ލަނޑު އެ ޓީމަށް ކާމިޔާބުކޮށްދިނީ ޔޮޝިމާރް ޔަޓޮންއެވެ. އެކަމަކު ދެވަނަ ހާފު ފަށައިގެން ހަތަރުވަނަ މިނެޓުގައި ހުއާން ކުއަޑްރާޑޯ ވަނީ ކޮލަމްބިއާއަށް ނަތީޖާ އެއްވަރުކޮށްދީފައެވެ.

ފޯރިގަދަ ކުޅުމެއް ފެނިގެންދިޔަ މި މެޗުގައި ކޮލަމްބިއާއިން ފަހަތުން އަރައި ލީޑު ނަގާފައިވަނީ މެޗުގެ 66 ވަނަ މިނެޓުގައެވެ. މި ލަނޑު އެ ޓީމަށް ކާމިޔާބުކޮށްދިނީ ލުއިސް ޑިއާޒެވެ. އެކަމަކު މެޗު ނިމެން ހަ މިނެޓަށް ވެފައި ވަނިކޮށް ޖިއަންލޫކާ ލަޕަޑޫލާ ވަނީ ޕެރޫއަށް ނަތީޖާ އެއްވަރުކޮށްދީފައެވެ. މި މެޗުން ކޮލަމްބިއާ މޮޅުވީ މެޗުގެ އިތުރު ވަގުތުގައި ލުއިސް ޑިއާޒް ކާމިޔާބުކޮށްދިން ލަނޑާއެކުއެވެ.

މި މޮޅާއެކު ކޮލަމްބިއާއިން ކޮޕާ އެމެރިކާގެ ތިންވަނަ ހޯދިއިރު، މުބާރާތުގެ ފައިނަލް މެޗުގައި ވާދަކުރާނީ ބްރެޒިލާއި އާޖެންޓީނާއެވެ. އެ މެޗު ކުޅޭނީ އާދީއްތަ ދުވަހުގެ ފަތިހުއެވެ.