ދާންދޫގެ މޮނިޓަރިންގ އުވާލައި، އާންމު ހާލަތަށް
8 ޖުލައި 2021 | ބުރާސްފަތި 12:49މޮނިޓަރިންގގެ ހާލަތަށް ގެނެވުނީ 12 މެއި ގައި
ގއ. ދާންދޫ
ކޮވިޑް-19ގެ ކޭހެއް ފެނި މޮނިޓަރިންގގެ ހާލަތަށް ގެނައި ގއ. ދާންދޫގެ މޮނިޓަރިންގ އުވާލައި، އާންމު ހާލަތަށް ގެނެސްފިއެވެ.
ހެލްތް ޕްރޮޓެކްޝަން އެޖެންސީ (އެޗްޕީއޭ)އިން ބުނީ ކޮވިޑް-19ން ރައްކާތެރިވުމުގެ ގޮތުން އާންމު ސިއްހަތު ރައްކާތެރިކުރުމުގެ ގާނޫނުގެ 12 ވަނަ މާއްދާގެ ދަށުން ބަލަން ކަނޑައެޅުނު ކަންކަން ބެލުމުން، މޮނިޓަރިންގ ހާލަތު އިތުރަށް ދަމަހައްޓަން ޖެހޭ ސަބަބެއް މިވަގުތު ނެތް ކަމަށެވެ.
ދާންދޫ މޮނިޓަރިންގެ ހާލަތަށް ގެނެވުނީ 12 މެއި 2021 ގައެވެ.
ކޮވިޑް-19އާ ގުޅިގެން ދާންދޫގެ ޖުމްލަ 2088 މީހުންގެ އާބާދީގެ ތެރެއިން ރަށުގައި ދިރިއުޅޭ މީހުން މިބައްޔަށް ޓެސްޓު ކުރުމަށްޓަކައި 1262 ސާމްޕަލް ނަގާފައިވެއެވެ. އޭގެ ތެރެއިން 416 މީހުން ބައްޔަށް ޕޮޒިޓިވްވެ، 4 މީހަކު ބަލީގައި ނިޔާވެފައިވެއެވެ.
ބަލި ކޮންޓްރޯލް ކުރުމަށް ހަރުކަށި ފިޔަވަޅުތައް އަޅައި، ކުރެވުނު މަސައްކަތްތަކުގައި ރައްޔިތުންގެ ފަރާތުން ވަރަށް ބޮޑު އެއްބާރުލުމެއް ލިބިފައިވާކަން އެރަށުގެ ކައުންސިލުން ފާހަގަކުރެއެވެ. ކުރެވުނު މަސައްކަތްތަކުން ބަލި ކޮންޓްރޯލް ކުރެވި މޮނިޓަރިންގ ހާލަތު އުވާލުމާ ގުޅިގެން އެރަށުގެ ކައުންސިލުން ބުނީ، ކޮވިޑްގެ ހާލަތާ ގުޅިގެން އަޅާފައިވާ ފިޔަވަޅުތައް އުވާލި ނަމަވެސް ރަށަށް ލަފާ ފުރާ ބޯޓުފަހަރުތަކުން ގެންނަ މުދާ ބޭލުމާއި މުދާ އެރުވުމުގައި ހަމަޖައްސާފައިވާ އިންތިޒާމްތަކުގެ ތެރެއިން އެކަން ކުރަން ޖެހޭ ކަމަށެވެ. އަދި ކަރަންޓީނު ކުރެވޭ ގޮތަށް ރަށަށް އައިސް ތިބޭ އެންމެހައި ފަރާތްތަކުން ކަރަންޓީނުގެ އުސޫލާ އެއްގޮތަށް އަމަލު ކުރަމުން ގެންދިއުމާއި، ބޭރަށް ނުކުމެ އުޅުމުގައި މާސްކް އެޅުމަށް ކައުންސިލުން އިމްތިމާސްކޮށްފައިވެއެވެ.
