ރާއްޖޭގައި ބަރުލަމާނީ ނިޒާމަށް ޖާގައެއް ނެތް: ރައީސް މައުމޫން
ރާއްޖޭގެ ހާލަތާ އެންމެ ގުޅޭ، ރާއްޖެއަށް އެންމެ ފައިދާހުރި ވެރިކަމުގެ ނިޒާމަކީ ރިޔާސީ ނިޒާމު
އެމްއާރްއެމްގެ ލީޑަރު އަދި ކުރީގެ ރައީސް މައުމޫން ޢަބްދުލް ޤައްޔޫމް
ދިވެހިރާއްޖޭގައި ބަރުލަމާނީ ނިޒާމަށް ޖާގައެއް ނެތް ކަމަށް އެމްއާރްއެމްގެ ލީޑަރު އަދި ކުރީގެ ރައީސް މައުމޫން ޢަބްދުލް ޤައްޔޫމް ވިދާޅުވެއްޖެއެވެ.
ރާއްޖެއަށް އެންމެ އެކަށީގެންވަނީ "ބަރުލަމާނީ ނިޒާމުތޯ ނުވަތަ ރިޔާސީ ނިޒާމުތޯ" ބަހުސް ގަދަވެފައިވާ މިދަނޑިވަޅުގައި މައުމޫން ވިދާޅުވީ ދިވެހިރާއްޖޭގެ ހާލަތާ އެންމެގުޅޭ، ރާއްޖެއަށް އެންމެ ފައިދާހުރި ވެރިކަމުގެ ނިޒާމަކީ ރިޔާސީ ނިޒާމު ކަމަށެވެ. ދިވެހި ރައްޔިތުންގެ ބޮޑު އަޣްލަބިއްޔަތަކުން ނިންމާފައިވަނީ ވެސް ހަމަ ރިޔާސީ ނިޒާމުކަން ފާހަގަކުރެއްވިއެވެ. އަދި ވިދާޅުވީ ބަރުލަމާނީ ނިޒާމަށް ރާއްޖޭގައި ޖާގައެއް ނެތް ކަަމަށާއި، އެކަން ވަރަށް ސާފު ކަމަށެވެ.
ރައީސް މައުމޫނު މިހެން ވިދާޅުވެފައިވާއިރު، ހޯމަ ދުވަހު ރޭ ބޭއްވި "އާސްކް ސްޕީކަރ"ގެ ތިން ވަނަ ޕްރޮގްރާމްގައި، ވެރިކަމުގެ ނިޒާމު ބަރުލަމާނީ ނިޒާމަށް ބަދަލުކުރުމުގައި އޮތް ހުރަހަކީ ކޮބައިތޯ އާއި، ރައީސް ޞާލިޙު އެކަމަށް ދެކޮޅު ހައްދަވާފައިވާތީ، އެކަމާ ގުޅޭގޮތުން އާންމުންގެ މީހަކު ކުރި ސުވާލަކަށް ޖަވާބު ދެއްވަމުން ރައްޔިތުންގެ މަޖިލީހުގެ ރައީސް، ރައީސް މުޙައްމަދު ނަޝީދު ވިދާޅުވީ ރައީސް ޞާލިޙު އެކަމަށް ފާޅުގައި ދެކޮޅު ހައްދަވާފައި ނުވާކަމަށެވެ. އަދި ރައީސް ޞާލިޙާ އެމަނިކުފާނާ ދެމެދު މާބޮޑު ހަސަދަވެރިކަމެއް އޮތްކަމަށް ބަޔަކު ދެކޭ ސަބަބެއް ވިސްނިވަޑައިނުގަންނަވާ ކަމަށާއި، ހާލަތަށް ބަލާއިރު ރައީސް އެގޮނޑީގައި އިންނަވައި މިކަންކަން ތަހުގީގުކުރުމަކީ ފަސޭހަކަމަކަށް ނުވާނެކަމަށް ވިދާޅުވިއެވެ. އަދި އެމަނިކުފާނު ދެކެވަޑައިގަންނަވާ ގޮތުގައި ދެން ރާއްޖޭގައި ރިޔާސީ އިންތިޚާބެއް ނޯންނާނެކަމަށް ވިދާޅުވިއެވެ. އަދި ބަރުލަމާނީ ނިޒާމު ގެނައުމުގައި އުންމީދުކުރަނީ ރައީސް ޢަބްދުﷲ ޔާމީނާއެކު ނިޒާމު ބަދަލުކުރެވޭނެކަމަށް ކަމަށް ނަޝީދު ވިދާޅުވިއެވެ.
ރާއްޖޭގައި ވެރިކަން ހިންގުމަށް އެންމެ ރަނގަޅު ނިޒާމަކީ ބަރުލަމާނީ ނިޒާމުކަމަށް ނަޝީދު އަބަދުވެސް ގަބޫލުކުރައްވާއިރު، މިހާރު އޮތް ރިޔާސީ ނިޒާމު ބަދަލުކުރެއްވުމުގެ މަސައްކަތް ކުރައްވާނީ ރައީސް ޞާލިޙާ މަޝްވާރާކުރެއްވުމަށްފަހު ކަމަށް ރައީސް ނަޝީދު ވަނީ އެކިފަހަރުމަތިން ވިދާޅުވެފައެވެ.
މީގެ އިތުރުން ރާއްޖޭގައި އޮތް ރިޔާސީ ނިޒާމު ބަރުލަމާނީ ނިޒާމަކަށް ބަދަލުކޮށް، ބޮޑުވަޒީރަށް ވެވަޑައިގަންނަވަން ބޭނުންފުޅުވާކަން މިއަހަރުގެ އޭޕްރީލް މަހުގެ ތެރޭގައި ނަޝީދު ވަނީ ރައީސް ޞާލިޙަށް ދަންނަވާފައެވެ. ނަޝީދު ރައީސް ސާލިހަށް ކުރެއްވި މެސެޖެއްގައި ވިދާޅުވެފައި ވަނީ ރާއްޖޭގައި ބަރުލަމާނީ ނިޒާމެއް ގާއިމުކުރުމާ ގުޅޭގޮތުން މަޝްވަރާކުރައްވަން ބޭނުންފުޅުވާ ކަމަށާއި، ސަރުކާރު ހިންގުމުގައި އެއްފަރާތެއްގައި ހުންނަވަން އެމަނިކުފާނު ބޭނުންފުޅު ނުވާކަމަށެވެ. އަދި ބޭނުންފުޅުވަނީ ބޮޑުވަޒީރަށްވެ ގައުމު ހިންގުމުގެ އެންމެ ކުރީ ސަފުގައި ހުންނަވަން ކަމަށް ވަނީ ވިދާޅުވެފައެވެ.
ނަޝީދުގެ މެސެޖުގައި އެމަނިކުފާނު ވަނީ 2023 ވަނަ އަހަރުގެ ރިޔާސީ އިންތިޚާބު ނުބާއްވައި އެއަހަރު ރާއްޖޭގެ ވެެރިކަން ކުރާ ނިޒާމު ބަރުލަމާނީއަށް ބަދަލުކޮށް، ރައްޔިތުންގެ މަޖިލީހުން ސަރުކާރު އެކުލަވާލުމަށް ވެސް ހުށައަޅުއްވާފައެވެ. އަދި 2024 ވަނަ އަހަރުގެ މަޖިލީސް އިންތިޚާބާ ކުރިމަތިލާއިރު، ރާއްޖޭގެ ރައީސުލްޖުމްހޫރިއްޔާ އަކީ ގާނޫނުގައިވާގޮތަށް މަޖިލީހުން ކަނޑައަޅާ ބޭފުޅަކަށް ހަދަން ބޭނުންފުޅުވާ ކަމަށް ވެސް ނަޝީދު ވަނީ ވިދާޅުވެފައެވެ.
ނަމަވެސް ރައީސް ޞާލިޙު ވިދާޅުވީ ރާއްޖޭގައި ބާއްވާނީ ބަރުލަމާނީތޯ ނުވަތަ ރިޔާސީ ނިޒާމުތޯ ނިންމާނީ ރައްޔިތުންގެ ވޯޓުން ކަމަށެވެ. އަދި އެއީ އެމަނިކުފާނަށް ނިންމެވޭނެ ކަމެއް ނޫން ކަމަށެވެ.
