ކޮވިޑް-19ގެ އައު ވޭރިއަންޓް ކަމަށްވާ ޑެލްޓާ ވޭރިއަންޓަށް، ވެކްސިންތަކުން ކުރާ އަސަރު 8 ގުނަ ދަށްކަމަށް ދިރާސާއަކުން ދައްކައިފިއެވެ.
އިންޑިއާގެ ސައިންސްވެރިންނާއި ކެމްބްރިޖް އިންސްޓިޓިއުޓް އޮފް ތެރަޕިއުޓިކް އިމިއުނޮލޮޖީ އެންޑް އިންފެކްޝަސް ޑިޒީސްގެ ސައިންސްވެރިން ގުޅިގެން ވަނީ ކޮވިޑް-19ށް އުފައްދާފައިވާ ވެކްސިންތައް ޑެލްޓާ ވޭރިއަންޓާ ދެކޮޅަށް މަސައްކަތްކުރާ މިންވަރު ދެނެގަތުމަށްޓަކައި ޚާއްސަ ދިރާސާއެއް ކުރިއަށް ގެންގޮސްފައެވެ. މިދިރާސާގައި އިންޑިއާގެ ތިން ސެންޓަރެއްގައި މަސައްކަތްކުރާ 100ށް ވުރެ ގިނަ ސިއްހީ ޚިދުމަތްތެރިން ވަނީ ބައިވެރިވެފައެވެ. އޭގެ ތެރޭގައި ދިއްލީގެ ސަރ ގަންގާ ރާމް ހޮސްޕިޓަލްގެ ސިއްހީ ޚިދުމަތްތެރިންވެސް ހިމެނެއެވެ.
އިންޑިއާ އިން އެންމެ ފުރަތަމަ ފެނުނު ޑެލްޓާ ވޭރިއަންޓަކީ ކޮވިޑްގެ އެހެން ވޭރިއަންޓްތަކަށްވުރެ އަވަހަށް ފެތުރޭ ވޭރިއަންޓެއް ކަމަށާއި ވެކްސިންތަކުން ޑެލްޓާ ވޭރިއަންޓަށް ކުރާ އަސަރު ދަށްކަމަށް ދިރާސާއިން ދައްކާ ކަމަށް ސައިންސްވެރިން ބުނެއެވެ. އިންޑިއާގައި ޑެލްޓާ ވޭރިއަންޓްގެ ކޭސްތައް ގިނަވެގެން ދިއުމުގެ ފަހަތުގައި ވަނީ، ކުރިން ބައްޔަށް ޕޮޒިޓިވްވި ނަމަވެސް އަދި ވެކްސިން ޖެހި ނަމަވެސް، އެއިން ޑެލްޓާ ވޭރިއަންޓާ ދެކޮޅަށް ކުރާ އަސަރު ދަށްވުން ކަމަށް ދިރާސާގެ ނަތީޖާ ދައްކައެވެ. އަދި ދިރާސާގެ ނަތީޖާ ދައްކާގޮތުން، ޑެލްޓާ ވޭރިއަންޓަކީ އިނގިރޭސި ވިލާތުން ފެނުނު ކޮވިޑް ވޭރިއަންޓަށްވުރެ ފަސޭހައިން ފެތުރޭ ވޭރިއަންޓެކެވެ.
ވެކްސިންގެ ދެ ޑޯޒް ފުރިހަމަކޮށްފައިވާ މީހުންނަށް ކޮވިޑް-19 ޖެހި ހާލު ސީރިއަސް ވަނީ މަދު ފަހަރަކު ކަމަށާއި، ނަމަވެސް އިންޑިއާގެ ހޮސްޕިޓަލްތަކުން ރިޕޯޓްކުރާ ޑެލްޓާ ވޭރިއަންޓްގެ ކޭސްތަކުގެ ތެރޭގައި ވެކްސިންގެ ދެ ޑޯޒް ފުރިހަމަކޮށްފައި ތިބި މީހުން ހިމެނޭ ކަމަށާއި، ވެކްސިން ޖެހިނަމަވެސް ބައްޔާ ދެކޮޅަށް އަޅާ ފިޔަވަޅުތައް ރަނގަޅަށް އެޅުން މުހިންމު ކަމަށް ސައިންސްވެރިން ފާހަގަކުރެއެވެ. ނަމަވެސް ގިނަ އަދަދެއްގެ ބަޔަކު ވެކްސިން ޖަހައިފި ނަމަ ޑެލްޓާ ވޭރިއަންޓް ފެތުރުން ކޮންޓްރޯލް ކުރެވޭނެ ކަމަށާއި ވޭރިއަންޓުން ކުރާ އަސަރުވެސް ދަށް ކުރެވޭނެ ކަމަށްވެސް ސައިންސްވެރިން ވަނީ ބުނެފައެވެ. އެގޮތުން ވެކްސިންގެ ޑޯޒްތައް ފުރިހަމަކުރުމުން، ހޮސްޕިޓަލްގައި އެޑްމިޓްކޮށްގެން ފަރުވާދޭން ނުޖެހޭނެ ކަމަށާއި ހާލު ސީރިއަސްވުމުގެ ފުރުސަތު ކުޑަކަން ވަނީ ފާހަގަކޮށްފައެވެ.
އިންޑިއާއިން ފެނުނު ޑެލްޓާ ވޭރިއަންޓް މިހާރު ދުނިޔޭގެ އެކި ކަންކޮޅުތަކަށް ފެތުރިގެން ގޮސްފައިވާއިރު، މިވޭރިއަންޓުގެ ނުރައްކާ ބޮޑުކަމަށް މާހިރުން އަންނަނީ ބުނަމުންނެވެ.
