އަދުލު އިންސާފުގެ މައްޗަށް ގާއިމްވެފައިވާ ޢަދާލަތު ޕާޓީގެ އަސާސްތަކާ ހިލާފު ނުވެ ސަރުކާރު ހިންގާ ކޯލިޝަންގެ ބައިވެރިއެއްގެ ހައިސިއްޔަތުން ސަރުކާރާއި އެކު ގުޅިގެން މަސައްކަތްކުރުމުގެ ގާބިލްކަން، ޢަދާލަތު ޕާޓީގައި އެބަހުރި ކަމަށް އެޕާޓީގެ ލީޑަރ އަދި ހޯމް މިނިސްޓަރ ޝައިޚް ޢިމްރާން ޢަބްދުﷲ ވިދާޅުވެއްޖެއެވެ.

ޢަދާލަތު ޕާޓީއަށް 10،000 މެމްބަރުން ހަމަކުރުމުގެ ރަސްމީ މަސައްކަތް ފެށުމަށް ހޯމަ ދުވަހުގެ ރޭ ބޭއްވި ރަސްމިއްޔާތެއްގައި ވާހަކަދައްކަވަމުން ޢިމްރާން ވިދާޅުވީ، ރަނގަޅު ސަރުކާރެއް އުފެދިގެން އަންނާނީ ކޯލިޝަނެއްގެ ތެރެއިން ކަމަށެވެ. އެކަން ގަބޫލުކުރަން ޖެހޭ ކަމަށާއި، ފާއިތުވި ތިން އިންތިޚާބުން ވެސް ފެނުނު މަންޒަރަކީ އެއީ ކަމަށެވެ. އަދި ރާއްޖޭގައި މިހާރު އެންމެ މުހިންމު ކަމަކީވެސް ކޯލިޝަނަކަށް އެކި ވިސްނުމުގެ ޕާޓީތައް ގުޅިގެން މަސައްކަތް ކުރުން ކަމަށެވެ.

ޢިމްރާން ވިދާޅުވީ ކޯލިޝަންއަކާ އެއްކޮށް މަސައްކަތްކުރާއިރު ވިސްނަން ޖެހޭ ގިނަ ކަންތައްތަކެއް ހުންނާނެ ކަމަށެވެ. އެގޮތުން ކޯލިޝަންގެ އެހެން ބައިވެރިންނަށް ދޭން ޖެހޭ ދޫތަކާއި، ހިފަހައްޓަން ޖެހޭ ކަންތައްތަކެއް ވެސް ހުންނާނެ ކަމަށެވެ. މިގޮތުގެ މަތިން ދޭން ޖެހޭ އެއްބާރުލުން ދީގެން ސިޔާސީ ޕާޓީތަކުން ގުޅިގެން މަސައްކަތްކޮށް ރާއްޖޭގެ ހުރިހާ ރައްޔިތުންނާއި މުޅި ގައުމުގެ މަސްލަހަތު ހިމާޔަތްކުރެވޭ ގޮތަށް މަސައްކަތް ކޮށްގެން ނޫނީ ރާއްޖެ އަށް ފާގަތި މުސްތަގުބަލެއް ނެތްކަމަށް އެމަނިކުފާނު ވިދާޅުވިއެވެ.

ޢިމްރާން ވިދާޅުވީ އެގޮތަށް މަސައްކަތްކުރި ނަމަވެސް ކޮންމެ ޕާޓީއަކުން ވެސް އެ ޕާޓީއެއްގެ އަސާސްތަކުގައި ހިފަހައްޓަން ޖެހޭނެ ކަމަށެވެ. އަދި ރާއްޖޭގެ ހުރިހާ ސިޔާސީ ލީޑަރުން ވެސް ކުރަންވީ ކަމަކީ އެގޮތަށް އެންމެން އެކީ ގުޅިގެން ގައުމުގެ މުސްތަގުބަލަށްޓަކައި މަސައްކަތްކުރުމުގެ ރޫހުގައި ހުރިހާ ރައްޔިތުންނަށް ފައިދާ ހޯދައިދިނުން ކަމަށެވެ. އަދި އެ ނޫން ގޮތަކަށް ރާއްޖޭގެ ރައްޔިތުންނަށް މިނިވަންކަމާއި ރައްކާތެރިކަން ނުލިބޭނެ ކަމަށެވެ.

މިނިސްޓަރ ޢިމްރާން ވިދާޅުވީ ވިދާޅުވީ 2012 ވަނަ އަހަރު އަލަށް ޕާޓީއާ ހަވާލުވެވަޑައިގެންނެވި އިރު ޕާޓީގެ މެމްބަރުންގެ އަދަދު ވަރަށް ދަށް ކަމަށެވެ. ނަމަވެސް ކުޑަ ދުވަސްކޮޅެއްގެ މަސައްކަތުން އޭރު ވެސް ޕާޓީގެ މެމްބަރުން ހަމަކުރީ ކަމަށާއި، އޭގެ ފަހުން ރާވައިގެން ބަޔަކު ކުރި ކަމެއްގައި 2015ވަނަ އަހަރު ޕާޓީގެ މެމްބަރުން މަދުކުރި ނަމަވެސް އަނެއްކާ ވެސް ޕާޓީ ކޮޅަށް ތެދުވި ކަމަށެވެ.