ކްރިސްޓަލް ޕެލަސްގެ ކޯޗުކަމާ ފްރާންސްގެ ލެޖެންޑް ޕެޓްރިކް ވިއެރާ ހަވާލުވެއްޖެއެވެ.

ޕެލަސްގެ ކޯޗުގެ މަގާމު ހުސްވީ މި ނިމުނު ސީޒަނަށްފަހު އެ ޓީމުގެ ކޯޗުކަން އުމުރުން 73 އަހަރުގެ ރޯއީ ހޮޖްސަން ދޫކޮށްލުމުންނެވެ. އެއާއެކު އާދީއްތަ ދުވަހުގެ ވަގުތެއްގައި ޕެލަސްއިން ވަނީ އެ ޓީމުގެ ކޯޗުގެ މަގާމަށް މެޗަކުން ބަލިނުވެ އާސެނަލާއެކު 2004 ވަނަ އަހަރު އިނގިރޭސި ޕްރިމިއާ ލީގު ކާމިޔާބުކުރި ކެޕްޓަން، އުމުރުން 45 އަހަރުގެ ވިއެރާ ހަމަޖައްސާފައެވެ. އޭނާ ޕެލަސްއާ ހަވާލުވީ ތިން އަހަރުގެ އެއްބަސްވުމެއްގެ ދަށުންނެވެ.

މިއީ ކޯޗިން ކެރިއަރުގައި ވިއެރާ އިރުޝާދު ދޭނެ ތިންވަނަ ޓީމެވެ. އޭނާ އެންމެ ފުރަތަމަ ކޯޗިން ކެރިއަރު ފެށީ 2016 ވަނަ އަހަރު އެމެރިކާގެ މޭޖާ ލީގުގެ ނިއު ޔޯކް ސިޓީ އެފްސީންނެވެ. އެއަށްފަހު 2018 ވަނަ ވިއެރާ ވަނީ ފްރާންސްގެ ނީސްގެ ކޯޗުކަމާ ހަވާލުވެފައެވެ.

ކޯޗެއްގެ ގޮތުގައި ވިއޭރާއަށް އަދި މިހާތަނަށް މާ ބޮޑު ކާމިޔާބީއެއް ހޯދިފައިނުވި ނަމަވެސް، އޭނާ ވަނީ ކުޅުންތެރިއެއްގެ ގޮތުގައި ގިނަ ކާމިޔާބީތަކެއް ހޯދާފައެވެ. ފްރާންސާއެކު 1998 ގެ ފީފާ ވޯލްޑް ކަޕާއި 2000 ވަނަ އަހަރުގެ ޔޫރޯ ކާމިޔާބުކުރި ވިއެރާ ކުލަބު ކެރިއަރު ފެށީ 1994 ވަނަ އަހަރު ކާންސްއިންނެވެ. އޭގެ ފަހުން އޭސީ މިލާނަށް ކުޅުމަށްފަހު އެންމެ ކާމިޔާބު ދުވަސްތައް ހޭދަކުރީ 1996 ވަނަ އަހަރުން 2005 ވަނަ އަހަރަށް އާސެނަލުގައެވެ. އެގޮތުން އާސެނަލަށް ތިން ފަހަރު ލީގު ހޯދުމުގައި އޭނާގެ ހިއްސާ ބޮޑެވެ. އަދި ފަހުން ޔުވެންޓަސް އާއި އިންޓަ މިލާނަށް ކުޅުމަށްފަހު، ވިއެރާ ކެރިއަރު ނިންމާލީ 2011 ވަނަ އަހަރު ސިޓީއަށް ކުޅުމަށްފަހުއެވެ.