ރާއްޖެއިން ޕޮޒިޓިވް އަދަދު 127ގައި، މާލެއިން 26 މީހުން
މާލެއިން ޕޮޒިޓިވްވީ 26 މީހުން
ފުލުހުން- ލޮކްޑައުން ތެރޭގައި ހަރަކާތްތެރި ވަނީ
މުޅި ރާއްޖެއިން އާދީއްތަ ދުވަހު ކޮވިޑް-19ށް ޕޮޒިޓިވްވީ 127 މީހުން ކަމަށް ހެލްތު ޕްރޮޓެކްޝަން އެޖެންސީ (އެޗްޕީއޭ)ގެ ތަފާސްހިސާބުތަކުން ދައްކައިފިއެވެ.
އެޗްޕީއޭއިން އާންމުކުރި ތަފާސްހިސާބުތަކުން ދައްކާގޮތުން މި 127 މީހުންގެ ތެރެއިން މާލެއިން ޕޮޒިޓިވްވީ 26 މީހުންނެވެ. އަދި އަތޮޅުތެރެއިން 79 މީހުން ޕޮޒިޓިވްވެފައިވާއިރު، ރިސޯޓުތަކުން ޕޮޒިޓިވްވި 6 މީހުންގެ އިތުރަށް، ތަރައްގީކުރަމުން އަންނަ ރަށްރަށުން 3 މީހަކާއި އިންޑަސްޓްރިއަލް ރަށްރަށުން 13 މީހަކު ޕޮޒިޓިވްވެފައިވެއެވެ.
މިއާއެކު މުޅި ރާއްޖެއިން ޕޮޒިޓިވްވި މީހުންގެ ޖުމްލަ އަދަދު ވަނީ 74،351ށް އަރާފައެވެ. އޭގެ ތެރެއިން 70،889 މީހުން ރަނގަޅުވެފައެވެ. މިހާރު ފަރުވާދެމުން އަންނަނީ 3،237 މީހުންނަށެވެ. އަދި 21 މީހުންނަށް އެޑްމިޓްކޮށްގެން ފަރުވާދެމުން އަންނަ އިރު، 213 މީހުން ވަނީ މި ބަލީގައި ނިޔާވެފައެވެ.
ކޮވިޑް-19ގެ ކޭސްތައް މާލެ ސަރަހައްދުގައި ދަށްވެފައި މިވަނީ ކޮވިޑްގެ ހަތަރުވަނަ ރާޅަކަށް ފަހުއެވެ. މި މޭ މަހު ބިންދާލި ހަތަރުވަނަ ރާޅުގައި ކޭސްތަކުގެ އަދަދު 1000ން މައްޗަށް ވެސް ދިޔައެވެ. އެއާއެކު އެޗްޕީއޭއިން އެޅި ހަރުކަށި ފިޔަވަޅުތަކަކަށް ފަހު ކޭސްތަކުގެ އަދަދު މަދުވެފައިވާއިރު މިހާރު ވަނީ ފިޔަވަޅުތަކަށް ލުއިދީފައެވެ. އެގޮތުން ހަވީރު ހަތަރަކުން ފެށިގެން އޮތް ކާފިއު މިހާރު ރޭގަނޑު 8ން އަނެއް ދުވަހުގެ ފަތިހު 4ށް ބަދަލުކޮށްފައިވާއިރު ކާފިއު ނޫން ގަޑިތަކުގައި ކެފޭ/ރެސްޓޯރަންޓުތަކުން ޑައިން-އިން ޚިދުމަތް ދިނުމުގެ ހުއްދަވެސް ވަނީ ދީފައެވެ.
މީގެ އިތުރަށް ކާފިއު ނޫން ގަޑިތަކުގައި އެއްވެސް ފާހަކާ ނުލައި ބޭރުގައި އުޅުމުގެ ހުއްދަވެސް ދީފައިވާއިރު ކެފޭ/ރެސްޓޯރަންޓުތަކާއި ފިހާރަތަކަށް 24 ގަޑި އިރު ޑެލިވަރީގެ ޚިދުމަތް ދިނުމަށް ވެސް ވަނީ ހުޅުވާލާފައެވެ.
