ރާއްޖޭގައި އިއުލާނުކޮށްފައިވާ ސިއްހީ ކުއްލި ނުރައްކަލުގެ އިތުރު 1 މަހަށް ދިގު ދަންމާލައިފިއެވެ.
އޮގަސްޓް މަހުގެ ނިޔަލަށް ސިއްހީ ކުއްލި ނުރައްކަލުގެ ހާލަތު ދިގުދަންމާލިކަން ހާމަކޮށް ހެލްތު މިނިސްޓަރު އަޙުމަދު ނަސީމް ސޮއިކުރައްވައި ނެރުއްވާފައިވާ ގަރާރުގައި ވަނީ، ރާއްޖޭގައި އަދިވެސް ކޮވިޑް-19 ފެތުރުމުގެ ނުރައްކާ އެބަ އޮތް ކަމަށާއި، އެހެންކަމުން އެ ނުރައްކާ ކުޑަކުރުމަށާއި އާންމު ރައްޔިތުންގެ ސިއްހަތާއި ރައްކާތެރިކަން ކަށަވަރުކުރުމަށްޓަކައި ޚާއްސަ ފިޔަވަޅުތަކެއް އަޅަންޖެހޭކަމަށް ޑިރެކްޓަރ ޖެނެރަލް އޮފް ޕަބްލިކް ހެލްތު ލަފާދެއްވާފައިވާކަމަށެވެ. އެހެންކަމުން 12 މާޗު 2020 ގައި ރާއްޖޭގައި އިއުލާނުކޮށްފައިވާ އާންމު ސިއްހަތުގެ ކުއްލި ނުރައްކަލުގެ ހާލަތު 2021 އޯގަސްޓް 2 ގެ ނިޔަލަށް އިތުރުކޮށްފައިވާ ކަމަށެވެ.
ކޮވިޑް19 އާ ގުޅިގެން ރާއްޖޭގައި ސިއްހީ ކުއްލި ނުރައްކަލުގެ ހާލަތު އިއުލާނުކުރީ 12 މާޗު 2020 ގައެވެ. ކޮވިޑް19 އާ ގުޅިގެން ޑިރެކްޓަރ ޖެނެރަލް އޮފް ޕަބްލިކް ހެލްތަށް ލިބިގެންވާ ބާރުތައް ތަންފީޒުކުރައްވަމުން ގެންދަވަނީ އާންމު ސިއްހަތު ރައްކާތެރިކުރުމުގެ ގާނޫނުގެ ދަށުންނެވެ.
ރާއްޖޭގައި ކޮވިޑް-19ގެ ހާލަތު މެއި މަހު ވަނީ މިއިން ދުވަހަކު ގޯސްނުވާ މިންވަރަށް ގޯސްވެފައެވެ. އެއާއެކު ކޮވިޑް ފެތުރުން ކޮންޓްރޯލްކުރުމަށް އެޅިފިޔަވަޅުތަކާއެކު މިހާރު ވަނީ ކޭސްތައް ފެންނަ މިންވަރު ދަށްކުރެވިފައެވެ. އެހެންކަމުން ފިޔަވަޅުތަކަށްވެސް ވަނީ ލުއިތައްދޭން ފަށާފައެވެ.
ރާއްޖޭގައި މިހާތަނަށް އައިއިރު ކޮވިޑް ޖެހުނު މީހުންގެ އަދަދު 74،074ށް އަރައެވެ. މިވަގުތު ފަރުވާދެމުން އަންނަނީ 3359 މީހުންނަށެވެ. މީގެތެރެއިން 23 މީހަކަށް އަންނަނީ ހޮސްޕިޓަލްގައި އެޑްމިޓްކޮށްގެން ފަރުވާދެމުންނެވެ. މިހާތަނަށް 213 މީހަކު ވަނީ މިބަލީގައި ނިޔާވެފައެވެ.
