ދުވީ ގައުމީ ޓީމެއް ނޫން، ލައިގެން ތިބީ ގައުމީ ޖާޒީއެއްވެސް ނޫން: މަޚްލޫފް

ގައުމީ އަންހެން އެތުލެޓިކްސް ޓީމު އުޅުނީ ތަމްރީނެއްގައި، އެއީ ބައިނަލްއަގުވާމީ މުބާރާތެއް ނޫން ކަމަށް މި ވަގުތު ސަސްޕެންޝަނުގައި ހުންނެވި ކުޅިވަރާ ބެހޭ ވަޒީރު އަޙްމަދު މަޚްލޫފް ވިދާޅުވެއްޖެއެވެ.

މަޚްލޫފް މިހެން ވިދާޅުވިއިރު، އިންޑިއާގެ ނެޝަނަލް އިންޓަ ސްޓޭޓް ސީނިއާ އެތުލެޓިކްސް ޗެމްޕިއަންޝިޕުގައި ރާއްޖޭގެ ޖާޒީ ލައިގެން އިންޑިއާގެ އަންހެން އެތުލީޓަކު ދުވެގެން އެކަމުގެ ފާޑުކިޔުން އެތުލެޓިކްސް އެސޯސިއޭޝަން އޮފް މޯލްޑިވްސްއަށް ވަނީ އަމާޒުވެފައެވެ.

ބުދަ ދުވަހުގެރޭ ކުރެއްވި ޓްވީޓެއްގައި މަޚްލޫފް ވިދާޅުވީ ބައިނަލްއަގުވާމީ މުބާރާތްތަކުގައި އެ ގައުމެއްގެ ރަށްވެހިކަން ނެތް ރައްޔިތެއް ފިޔަވައި އެހެން ގައުމެއްގެ ރައްޔިތަކަށް ވާދަނުކުރެވޭނެ ކަމަށެވެ. އަދި އެ ފުރުސަތު ދެނީ ހަމައެކަނި އައިސީސީން ކަމަށާއި، އެގޮތަށް ފުރުސަތު ދެނީ ދުނިޔޭގައި ކްރިކެޓް ކުރިއަރުވަން ކުރާ ކަމެއްގެ ގޮތަށް ކަމަށްވެސް ވިދާޅުވިއެވެ. އެގޮތުން އެންމެ ކުރީއްސުރެ ރާއްޖޭގެ ކްރިކެޓް ޓީމުން އައިސީސީގެ މުބާރާތްތަކުގައި ގަވާއިދާ އެއްގޮތަށް ރާއްޖޭގައި ދިރިއުޅޭ ބިދޭސީ ކުޅުންތެރިން، އެހެން ގައުމުތަކެކޭ އެއްފަދައިން ހިމަނާ ކަމަށްވެސް ވިދާޅުވިއެވެ.

މަޚްލޫފް ވިދާޅުވީ އެތުލެޓިކްސް ޓީމު އުޅުނީ ތަމްރީނެއްގައި ކަމަށާއި، އެއީ ބައިނަލްއަގުވާމީ އިދާރާއެއްގެ މުބާރާތެއް ނޫން ކަމަށެވެ. އަދި އެ މުބާރާތުގައި ރާއްޖޭގެ އެތުލީޓުން ބައިވެރިވެ ތަމްރީންތައް ލިބުމަކީ ކުރިއަށް ތާވަލުކޮށްފައި ހުރި ގައުމީ ޓީމުން ވާދަކުރާ ބައިނަލްއަގުވާމީ މުބާރާތްތަކަށް ލިބޭނެ ކުރިއެރުމެއް ކަމަށާއި، އެތުލެޓިކްސް ޓީމުގައި އެހެން ގައުމެއްގެ އެތުލީޓަކު ހިމެނުމަށް ދިމާވި ސަބަބަކީ ޓީމުން އެއް ކުއްޖަކު ކޮވިޑް-19 އަށް ޕޮޒިޓިވްވުން ކަމަށްވެސް ވިދާޅުވިއެވެ.

އަދި ވިދާޅުވީ އެ މުބާރާތުގައި ދުވީ ގައުމީ ޓީމު ނޫން ކަމަށާއި، އަދި ލައިގެންތިބީ ގައުމީ ޖާޒީއެއް ނޫން ކަމަށް މައުލޫމާތު ލިބިފައިވާ ކަމަށެވެ. އަދި މިއީ ސަސްޕެންޝަނުގައި ހުރުމުން ރަސްމީ ހައިސިއްޔަތުން ބުނާ ވާހަކައެއް ނޫން ކަމަށް އެ ޓްވީޓުގައި މަޚްލޫފް ވަނީ ވިދާޅުވެފައެވެ.

މި މަހު 25 އިން 29 އަށް އިންޑިއާގައި ކުރިއަށްދިޔަ މި މުބާރާތުގައި ބައިވެރިވާން ރާއްޖޭން ހަތަރު އެތުލީޓަކު އިންޑިއާއަށް ދިޔައިރު، އޭގެ ތެރެއިން އެއް އެތުލީޓަކު ވަނީ ކޮވިޑަށް ޕޮޒިޓިވްވެފައެވެ. އެއާއެކު މި މުބާރާތުގައި ރާއްޖެއިން ބައިވެރިވީ އިންޑިއާ އެތުލީޓަކު ޓީމުގައި ހިމަނައިގެންނެވެ. އެ މުބާރާތުގައި އިންޑިއާގެ އެތުލީޓު ބޭނުންކޮށްފައިވަނީ ރާއްޖޭގެ ގައުމީ ޕްރެކްޓިސް ޖާޒީއެވެ.

"ރާއްޖެ.އެމްވީ" އަށް ދެއްވި އިންޓަވިއުއެއްގައި އެތުލެޓިކްސް އެސޯސިއޭޝަނުގެ ރައީސް މުޙައްމަދު ތޮލާލް ވިދާޅުވީ ޓީމުގައި އިންޑިއާގެ އެތުލީޓަކު ހިމެނުމަށް ނިންމީ މުބާރާތް އިންތިޒާމުކުރާ ފަރާތްތަކާ ވާހަކަ ދެއްކުމަށްފަހު ކަމަށާއި، އެ ނިންމުން ނިންމީ ރާއްޖޭން މި މުބާރާތުގައި ބައިވެރިވާން ދިޔަ ދުވުންތެރިންނަށް ފުރުސަތު ގެއްލުނަ ނުދިނުމަށް ކަމަށްވެސް ވިދާޅުވިއެވެ.

އިންޑިއާގެ މުބާރާތުގައި ރާއްޖޭގެ ފިރިހެން ރިލޭ ޓީމުވެސް ވާދަކުރިއެވެ. މި އަހަރުގެ އިންޑިއަން ސްޓޭޓް ޗެމްޕިއަންޝިޕްގައި ރާއްޖޭން ވާދަކުރިއިރު، މި މުބާރާތުގައި 2014 އަދި 2019 ވަނަ އަހަރުވެސް ރާއްޖޭން ވަނީ ވާދަކޮށްފައެވެ. މިފަހަރު މުބާރާތުގައި ސްރީ ލަންކާ، ބަންގްލަދޭޝް، ބޫޓާން އަދި ކަޒަކިސްތާނުންވެސް ވަނީ ވާދަކޮށްފައެވެ.