ޕެނަލްޓީ ނުޖެހުނު ފަހުން އެމްބާޕޭގެ ލޮލަކަށް ނިންޖެއް ނާދޭ!

ޔޫރޯ 2020 ގެ ދެވަނަ ބުރުގައި ސްވިޓްޒަލެންޑާ ދެކޮޅަށް ކުޅުނު މެޗުގެ ފަހު ޕެނަލްޓީ ނާކާމިޔާބުވި ފަހުން ލޮލަށް ނިދި ނާންނަ ކަމަށް ފްރާންސްގެ ޒުވާން ތަރި ކީލިއަން އެމްބާޕޭ ބުނެފިއެވެ.

މި އަހަރުގެ ޔޫރޯގައި އެންމެ ވިދާލާނެ ކަމަށް ބެލެވުނު އެއް ކުޅުންތެރިއަކީ އެމްބާޕޭއެވެ. އެކަމަކު މި މުބާރާތަކީ އެމްބާޕޭއަށް ނާކާމިޔާބު މުބާރާތެކެވެ. އެގޮތުން މި މުބާރާތުގައި ފްރާންސްއިން ކުޅުނު ހަތަރު މެޗުގައިވެސް އެމްބާޕޭއަށް ލަނޑެއް ޖެހިފައެއް ނުވެއެވެ. އަދި މި ފަހަރުގެ މުބާރާތުން ދުނިޔޭގެ ޗެމްޕިއަނުން ކެޓީ ސްވިޓްޒަލެންޑާ ދެކޮޅަށް ކުޅުނު ދެވަނަ ބުރުގެ މެޗުގައި އެމްބާޕޭގެ އަތުން ގެއްލުނު ޕެނަލްޓީގެ ސަބަބުންނެވެ. އެއާއެކު އެމްބާޕޭއަށް ވަނީ ގިނަ ބައެއްގެ ފާޑުކިޔުން އަމާޒުވެފައެވެ.

ދާދި ދިން އިންޓަވިއުއެއްގައި އެމްބާޕޭ ބުނީ ސްވިޓްޒަލެންޑް މެޗުގެ ފަހު ޕެނަލްޓީ އޭނާ ޖެހީ ކުޅުންތެރިންގެ އެދުމުގެ މަތިން ކަމަށެވެ. އަދި ޕެނަލްޓީ ޖެހީ އިތުބާރާއެކުގައި ކަމަށާއި، އެކަމަކު ޕެނަލްޓީ ނާކާމިޔާބުވި ފަހުން މިހާތަނަށް އޭނާއަށް ރަނގަޅަށް ނުނިދޭ ކަމަށެވެ. އަދި މިއީ އޭނާ އެންމެ ލޯބިވާ ކުޅިވަރުގައި އަންނާނެ ހާލަތެއްކަން އެނގޭ ކަމަށާއި، އެކަމަށް ފްރާންސްގެ ސަޕޯޓަރުންގެ ކިބައިން މާފަށް އެދޭ ކަމަށްވެސް ވަނީ ބުނެފައެވެ.

މީގެ އިތުރުން މި އިންޓަވިއުގައި އެމްބާޕޭ ވަނީ އޭނާގެ މުސްތަގުބަލާ ގުޅޭގޮތުންވެސް ވާހަކަދައްކާފައެވެ. އެމްބާޕޭ ބުނީ އޭނާ ކުރިއަށް އޮތް ސީޒަނުގައި ކުޅޭނެ ޓީމެއް އަދި ކަނޑަނާޅާ ކަމަށާއި، އެކަމަކު ކުރިއަށް އޮތް ދުވަސްތަކުގެ ތެރޭގައި އެކަން އިއުލާން ކުރާނެ ކަމަށެވެ. އެމްބާޕޭ މިހެން ބުނިއިރު، ސްޕެއިންގެ ގަދަ ބާރު ރެއާލް މެޑްރިޑުން އަންނަނީ އޭނާގެ ސޮއި ހޯދަން މަސައްކަތް ކުރަމުންނެވެ.

މި ފަހަރުގެ ޔޫރޯގައި އެމްބާޕޭއަށް އެންމެ އެދެވޭ ކުޅުން ނުދެއްކުނު ނަމަވެސް، ފްރާންސްއިން 2018 ވަނަ އަހަރު ފީފާ ވޯލްޑް ކަޕް ކާމިޔާބުކުރިއިރު، އޭރު އުމުރުން 19 އަހަރުގެ އެމްބާޕޭ ވަނީ ތަފާތު މޮޅު ކުޅުމެއް ދައްކާފައެވެ. އަދި އެ މުބާރާތުގެ އެންމެ މޮޅު ޒުވާން ކުޅުންތެރިޔާގެ މަގާމުވެސް އެމްބާޕޭއަށް ލިބުނެވެ.