ހޯމަ ދުވަހު ވެކްސިން ޖެހި މީހުންގެ އަދަދު ހާހަކަށް ވެސް ނާރާ

ހޯމަ ދުވަހު ރާއްޖޭގައި ކޮވިޑް-19ގެ ވެކްސިން ޖެހި މީހުންގެ އަދަދު އެއް ހާހަށް ވެސް ނާރާކަމަށް ހެލްތު ޕްރޮޓެކްޝަން އެޖެންސީގެ ތަފާސްހިސާބުތައް ދައްކައިފިއެވެ.

އެޗްޕީއޭ އިން އެންމެ ފަހުން އާންމުކޮށްފައިވާ މައުލޫމާތުތައް ދައްކާގޮތުން ހޯމަ ދުވަހު ވެކްސިން ޖަހާފައި ވަނީ 948 މީހުންނެވެ. އެއީ ވެކްސިންގެ ފުރަތަމަ ޑޯޒް ޖެހި 207 މީހުންނާއި ދެ ވަނަ ޑޯޒް ޖެހި 741 މީހުންނެވެ.

Advertisement

މާލެ ސަރަހައްދުން ހޯމަ ދުވަހު ވެކްސިން ޖަހާފައި ވަނީ 404 މީހުންނެވެ. އެއީ ފުރަތަމަ ޑޯޒް ޖެހި 104 މީހުންނާއި ދެ ވަނަ ޑޯޒް ޖެހި 300 މީހުންނެވެ. އަތޮޅު ތެރެއިން ވެކްސިން ޖަހާފައި ވަނީ 544 މީހުންނެވެ. އެއީ ފުރަތަމަ ޑޯޒް ޖެހި 103 މީހުންނާއި ދެ ވަނަ ޑޯޒް ޖެހި 441 މީހުންނެވެ.

މިއާއެކު ރާއްޖެއިން ވެކްސިންގެ ފުރަތަމަ ޑޯޒް ޖެހި މީހުންގެ އަދަދު މި ވަނީ 316،704 އަރާފައެވެ. އަދި ވެކްސިންގެ ދެ ޑޯޒް ފުރިހަމަ ކޮށްފައިވަނީ 189،529 މީހުންނެވެ.

ޖުލައި މަހުގެ ތެރޭގައި ރާއްޖެއަށް ބޭނުންވާ ވެކްސިންގެ ޑޯޒްތައް ލިބިގެންދާނެ ކަމަށް ހެލްތު މިނިސްޓަރ އަހްމަދު ނަސީމް ވިދާޅުވެފައިވާއިރު، ސަރުކާރުން މިހާރު އެންމެ ބޮޑަށް މަސައްކަތްކުރަނީ ފައިސާ ދައްކާފައިވާ އެސްޓްރަޒެނެކާ ކޮވިޑް ވެކްސިން ޑޯޒްތައް ރާއްޖެ ގެނައުމަށެވެ. އޭގެ އިތުރުން ރަޝިއާގެ ސްޕަޓްނިކްވީ ހޯދުމުގެ މަސައްކަތް ވެސް ކުރަމުންދާއިރު، އެމެރިކާއިން ވަނީ އެގައުމުން ވެކްސިން ފޯރުކޮށްދޭން ނިންމާފައިވާ ގައުމުތަކުގެ ލިސްޓުގައި ރާއްޖެ ހިމަނާފައެވެ.

ރާއްޖޭގެ ކޮވިޑް-19 ވެކްސިނޭޝަން ޕްރޮގްރާމް ފެބްރުއަރީ 1 ވަނަ ދުވަހު ފަށާފައިވާއިރު، އެންމެ ފުރަތަމަ ރާއްޖޭގައި ބޭނުންކުރުމުގެ ހުއްދަ ދީފައި ވަނީ ކޮވިޝީލްޑް ވެކްސިނަށެވެ. އޭގެ އިތުރުން ބައޯއެންޓެކް އަދި ފައިޒަރ ގުޅިގެން އުފައްދާފައިވާ ކޮވިޑް-19 ވެކްސިނާއި، ޗައިނާގެ ސިނޮފަރމް ކުންފުނީގެ ކޮވިޑް ވެކްސިނާއި، އެސްޓްރަޒެނެކާ ކުންފުނީގެ ކޮވިޑް ވެކްސިންގެ އިތުރުން، ސްޕަޓްނިކްވީ، މޮޑާނާގެ ކޮވިޑް ވެކްސިން، އަދި ޖޯންސަން އެންޑް ޖޯންސަންގެ ވެކްސިން ބޭނުންކުރުމުގެ ހުއްދަ ރާއްޖެއިން ވަނީ މިހާރު ދީފައެވެ.