އަންގާރަ ދުވަހު ޕޮޒިޓިވްވީ 178 މީހުން
މާލެ ސަރަހައްދުން ޕޮޒިޓިވްވީ 43 މީހަކު
ކޮވިޑް-19 އާ ގުޅިގެން ފްރަންޓްލައިންގައި ހަރަކާތްތެރިވާ ފަރާތްތަކުން މަސައްކަތް ކުރަނީ
އަތޮޅު ތެރެއިން ޕޮޒިޓިވްވި 125 މީހުންނާއެކު އަންގާރަ ދުވަހު ރާއްޖެއިން ޕޮޒިޓިވްވީ 178 މީހުން ކަމަށް ހެލްތް ޕްރޮޓެކްޝަން އެޖެންސީ (އެޗްޕީއޭ) އިން ބުނެފިއެވެ.
އެޗްޕީއޭއިން އެންމެ ފަހުން އާންމުކޮށްފައިވާ ތަފާސް ހިސާބުތައް ދައްކާ ގޮތުން، ހޯމަ ދުވަހުގެ ހަވީރު 6ން އަންގާރަ ދުވަހުގެ 6ށް ނަގާފައިވަނީ 5199 ސާމްޕަލެވެ. މީގެ ތެރެއިން 178 މީހަކު ޕޮޒިޓިވްވި އިރު، ގިނައީ އަތޮޅު ތެރެއިން ރިޕޯޓް ކުރި ކޭސްތަކެވެ. 125 މީހަކު އަތޮޅު ތެރެއިން ޕޮޒިޓިވްވި އިރު މާލެ ސަރަހައްދުން ޕޮޒިޓިވްވީ 43 މީހުންނެވެ. ރިސޯޓްތަކުން 7 މީހަކު ޕޮޒިޓިވްވި އިރު، ތަރައްގީ ކުރަމުން އަންނަ ރަށަކުން 3 މީހަކު ވަނީ ޕޮޒިޓިވްވެފައެވެ.
އަންގާރަ ދުވަހުގެ އަދަދުތަކާއެކު ރާއްޖެއިން މިހާތަނަށް 73،660 މީހަކު ވަނީ ޕޮޒިޓިވްވެފައެވެ. އެކްޓިވް ކޭސްތައް ވަނީ 4 ހާހުން 3815ށް ވެއްޓިފައެވެ. މީގެ ތެރެއިން 27 މީހަކަށް ފަރުވާ ދެމުން އަންނަނީ އެޑްމިޓްކޮށްގެންނެވެ. 210 މީހަކު ބަލީގައި ނިޔާވެފައިވާ އިރު، 69،623 މީހަކު ވަނީ ބަލިން ރަނގަޅުވެފައެވެ.
ޖޫން 21 ވަނަ ދުވަހުން 28 ވަނަ ދުވަހަށް ޕޮޒިޓިވިޓީ ރޭޓް ހުރީ ފަސް އިންސައްތަ އިން ދަށުގައެވެ. އެގޮތުން 21 ވަނަ ދުވަހު 4.8 އިންސައްތަ، 22 ވަނަ ދުވަހު 3.2 އިންސައްތަ، 23 ވަނަ ދުވަހު 3.8 އިންސައްތަ، 24 ވަނަ ދުވަހު 4.3 އިންސައްތަ އަދި 25 ވަނަ ދުވަހު 5.1 އިންސައްތަ އަށް އެރި އިރު، 26 ވަނަ ދުވަހު ޕޮޒިޓިވިޓީ ރޭޓްހުރީ 2.6 އިންސައްތައިގަ އެވެ. އޭގެ އިތުރުން ޖޫން 27 ވަނަ ދުވަހު ޕޮޒިޓިވިޓީ ރޭޓް 4.5 އިންސައްތައިގައި ހުރި އިރު، މީގެ 30 ދުވަސް ކުރިން 17.9 އިންސައްތައިގައި ހުރި ޕޮޒިޓިވިޓީ ރޭޓް ވަނީ ޖޫން 28 ވަނަ ދުވަހު 3.1 އިންސައްތަ އަށް ދަށްވެފައެވެ. މިއީ 14.8 އިންސައްތައިގެ ދަށްވުމެކެވެ.
އޭގެ އިތުރުން މި މުއްދަތުގެ ތެރޭގައި ބަލިޖެހިގެން ހޮސްޕިޓަލްގައި އެޑްމިޓްކޮށް ފަރުވާދެމުން ދިޔަ މީހުންގެ އަދަދު ވަނީ 218އިން 27ށް ދަށަށް ގޮސްފައެވެ. އަދި މެއި މަސް ނިމި ޖޫން މަހުގެ ކުރީ ކޮޅު ރާއްޖޭގައި ކޮވިޑަށް ފަރުވާހޯދަމުން ދިޔަ އެތައް ހާސް ބަޔަކު ވަނީ ބަލިން ރަނގަޅުވެފައެވ. އެގޮތުން ޖޫން މަހުގެ ފުރަތަމަ 15 ދުވަހު އެކަނި 22،416 މީހުން ވަނީ ބަލިން ރަނގަޅުވެފައެވެ. އަދި ފާއިތުވި 30 ދުވަހުގެ ތެރޭގައި 31،000ށް ވުރެ ގިނަ މީހުން ވަނީ ބަލިން ރަނގަޅުވެފައެވެ.
