ކޮވިޑް-19 ކޮންޓްރޯލް ކުރުމަށް އަޅާފައިވާ ހަރުކަށި ފިޔަވަޅުތަކަށް ބޮޑެތި ލުއިތަކެއް ރައީސުލްޖުމްހޫރިއްޔާ އިބްރާހިމް މުހައްމަދު ސާލިހު ދެއްވައިފިއެވެ.
ރައީސް އޮފީހުގައި މިހާރު ކުރިއަށްދާ ނޫސްވެރިންގެ ބައްދަލުވުމުގައި ރައީސް ސާލިހު ވިދާޅުވީ ޖުލައި މަހުގެ އެއްވަނަ ދުވަހުން ފެށިގެން ބޮޑެތި ލުއިތަކެއް ދޭން ނިންމާފައިވާ ކަމަށެވެ.
އެގޮތުން ކާފިއުގެ ވަގުތަކީ ރޭގަނޑު 8:00ން ފަތިހު 4:00ށް ކަމަށް ރައީސް ސާލިހު ވިދާޅުވިއެވެ. ކާފިއު ނޫން ވަގުތު ހުރިހާ ވިޔަފާރިތަކެއް ހުޅުވާލަން ހުއްދަ ދީފައިވާ ކަމަށާއި، ކާފިއު ނޫން ގަޑިތަކުގައި ފާހާއި ނުލާ ކޮންމެ މީހަކަށް ބޭރަށް ނުކުމެ އުޅެވޭނެ ކަމަށް ރައީސް ވިދާޅުވިއެވެ. އަދި ކާފިއުގެ ނޫން ވަގުތުގައި ކެފޭ/ ރެސްޓޯރެންޓްތަކުން ޑައިނިންގެ ޚިދުމަތް ދެވޭނެ ކަމަށް ވެސް އެމަނިކުފާނު ވިދާޅުވިއެވެ.
ހަވީރު ހަތަރަކުން ފެށިގެން އަނެއް ދުވަހުގެ ހެނދުނު އަށަކާ ހަމައަށް ކާފިއު އިއުލާންކޮށްފައިވާއިރު، އެނޫން ގަޑިތަކުގައި ބޭރުގައި އުޅެވެނީ ފުލުހުން ދޫކުރާ ވަކި ހުއްދައަކާއި، ވަޒީފާގެ ގޮތުންނާއި މަސައްކަތުގެ ގޮތުން ލިބޭ ވަކި ޚާއްސަ ހުއްދައެއްގެ ދަށުންނެވެ. ކާފިއު ނޫން ގަޑިތަކުގައި ވެސް ބޭރުގައި އުޅުމުގެ ހުއްދަ އޮންނަނީ ކޮންމެ ގޭބީސީއަކުން ދެ މީހަކަށެވެ. އެއީ ވެސް މީހަކަށް ހަތަރު ގަޑި އިރުގެ އުސޫލުން ދެމީހުން ވެސް ދެ ދަންފަޅިއަކަށް ބަހައިގެންނެވެ. އެ ހުއްދައިގައި ވެސް ޒަރޫރީ ބޭނުންތަކަށް ނޫނީ ނުނިކުތުމަށް ވަނީ އިލްތިމާސްކޮށްފައެވެ.
މެއި މަހުގެ ކުރީކޮޅުން ފެށިގެން މާލެ ސަރަހައްދާއި މުޅި ރާއްޖޭގައި ކޮވިޑް ކޭސްތައް އިތުރުވެފައިވާއިރު މެއި މަހުގެ ފަހު ހަފުތާއާ ޖެހެންދެން ވެސް 1،000ން މަތިން ކޮންމެ ދުވަހަކު ވެސް ކޭސްތައް ރިޕޯޓުކުރިއެވެ. އޭގެ ސަބަބުން މާލެ ސަރަހައްދުގައި ރައްކާތެރިކަމުގެ ފިޔަވަޅުތައް ވަރުގަދަ ކުރީ މެއި މަހުގެ 26 ވަނަ ދުވަހުއެވެ.
ކޭސްތައް މިހާރު ރިޕޯޓުކުރެވޭ މިންވަރު ވަރަށް ބޮޑުތަނުން މަދުވުމާއެކު ވިޔަފާރިތަކަށް ބޮޑެތި ލުއިތަކެއް ދޭން ނިންމި ނަމަވެސް ސަރުކާރު އޮފީސްތަކާއި، ސްކޫލްތަކާއި ޕާކު ތަކާއި މައިޒާންތައް އަދި ކުޅިވަރު ކުޅޭ ތަންތަން ހުޅުވާލުމުގެ ހުއްދަ އަދި ދީފައެއްނުވެއެވެ.
