އަޅުގަނޑުގެ ވެސް އެދުމަކީ އަވަހަށް ކެފޭ ރެސްޓޯރެންޓްތައް ހުޅުވާ ވިޔަފާރި ކުރެވޭނެ މަގު ފަހިވުން – ފައްޔާޒު
މީގެ 10 ދުވަސް ކުރިން ރެސްޓޯރެންޓް ހިންގާ ފަރާތްތަކާއި ބައްދަލުކުރެއްވި
އިކޮނަމިކް މިނިސްޓަރ ފައްޔާޒު އިސްމާއިލް - ރެސްޓޯރެންޓް ހިންގާ ފަރާތްތަކުގެ ކަންބޮޑުވުމަށް ހައްލު އަންނާނެކަމަށް މިނިސްޓަރ ވިދާޅުވި
އިގްތިސާދީ ވަޒީރުގެ ހައިސިއްޔަތުން އެދުމަކީ އަވަހަށް ކެފޭ ރެސްޓޯރެންޓްތަކާއި ވިޔަފާރިތައް ހުޅުވުން ކަމަށް އިކޮނަމިކް މިނިސްޓަރ ފައްޔާޒް އިސްމާއިލް ވިދާޅުވެއްޖެއެވެ.
ރެސްޓޯރެންޓް އެސޯސިއޭޝަނުން ކުރިއަށް ގެންދިޔަ އިހުތިޖާޖާއި ގުޅިގެން ރާއްޖެއެމްވީން ކުރި ސުވާލަކަށް ޖަވާބު ދެއްވަމުން މިނިސްޓަރ ފައްޔާރު ވިދާޅުވީ ރެސްޓޯރެންޓް އެސޯސިއޭޝަންގެ ބޭފުޅުން ޚިޔާލު ފާޅުކުރުމަކީ އެ ބޭފުޅުންނަށް ލިބިގެންވާ ހައްގެއް ކަމަށާއި، އެއީ މި އަމަލުކުރަމުންދާ ޑިމޮކްރަސީގައި އޮންނަ ކަމެއް ކަމަށެވެ.
މިނިސްޓަރ ވިދާޅުވީ އެބޭފުޅުންނާއި މީގެ 10 ވަރަކަށް ދުވަހު ކުރިން ވާހަކަ ދެކެވި މަޝްވަރާ ވެސް ކުރެވިފައިވާ ކަމަށެވެ.
ކެފޭ ރެސްޓޯރެންޓްތަކަށް އެހީތެރިކަން ނުލިބޭކަމަށް ނޫސްތަކުގައި ރިޕޯޓްކޮށްފައިވާ ވާހަކައަށް ރައްދު ދެއްވަމުން މިނިސްޓަރ ފައްޔާޒު ވިދާޅުވީ ކުރީ ފަހަރު ކޮވިޑް ރިލީފްގައި 4 ރެސްޓޯރެންޓަކަށް އެކަނި ލޯން ލިބުނު ކަމަށް ރެސްޓޯރެންޓް އެސޯސިއޭޝަނާއި ހަވާލާދީ ޚަބަރު ލިޔެފައިވާތަން ދެކެވަޑައިގެންނެވި ކަމަށާއި، އެއީ ކޮންތާކުން ހޯއްދެވި މައުލޫމާތެއް ކަމެއް އެނގިވަޑައި ނުގަންނަވާ ކަމަށެވެ.
މިނިސްޓަރ ވިދާޅުވީ ޚާއްސަކޮށް ޖިމް ސެލޫން އަދި ކެފޭ ރެސްޓޯރެންޓްތަކަށް އެންމެ ބޮޑަށް އަސަރު ކުރި ފަރާތްތަކަށް އިސްކަމެއް ދީގެން ކަންކަން ކުރައްވާނެ ކަމަށެވެ. އަދި އެ ހުރިހާ ވާހަކައެއް އެބޭފުޅުންނަށް އެނގިވަޑައިގަންނަވާނެ ކަމަށާއި، އެބޭފުޅުން އިހްތިޖާޖަކަށް ދާންޖެހުނު ސަބަބެއް އެނގިވަޑައި ނުގަންނަވާ ކަމަށެވެ. މިނިސްޓަރ ވިދާޅުވީ އުނދަގޫތަކެއް ނެތް ވާހަކައެއް ނޫން ކަމަށާއި، އެހެންނަމަވެސް އެކަމާއި މަޝްވަރާތަކެއް ކުރެވި އެކަމާއި އެބޭފުޅުންނަށް ވެސް ކަންތައްތަކެއް ކޮށްދޭނެ ވާހަކަ ވަރަށް ސާފުކޮށް ދަންނަވާފައިވާނެ ކަމަށެވެ.
މިނިސްޓަރ ވިދާޅުވީ އިހުތިޖާޖަށް ނުކުތުމުގެ ކުރިން އެވާހަކަ މިނިސްޓަރާއި ހިއްސާ ނުކުރައްވާ ކަމަށާއި، އިހުތިޖާޖު ކުރާ ވާހަކަ ފެނުނީ ޓްވީޓަކުން ކަމަށެވެ. އަދި މީގެ ކުރިން ވެސް އެބޭފުޅުންނާއި ބައްދަލުވި ނަމަވެސް އެފަދަ ވާހަކައެއް ނުދައްކާ ކަމަމަށެވެ. އަދި މީގެ 10 ވަރަކަށް ދުވަސް ކުރިން އޮންލައިންކޮށް ކެފޭ ރެސްޓޯރެންޓްތަކާއި ވެސް މަޝްވަރާ ކުރެވުނު ކަމަށެވެ. އެގޮތުން ފިނޭންސް މިނިސްޓަރާއި ވެސް ވާހަކަ ދެކެވުނު ކަމަށާއި، އެބޭފުޅުން ބޭނުންވަނީ އިންޑައިނިންގ ވަގުތުން ވަގުތަށް ހުޅުވާލަން ކަމަށެވެ. އެހެންނަމަވެސް މެޑިކަލް ޑޮކްޓަރުންގެ ލަފަށް ބިނާކޮށް ތަންތަން ހުޅުވަމުން ދާ ކަމަށާއި، އެއީ އެކަން ކުރެވެން އޮންނަ ގޮތް ކަމަށް މިނިސްޓަރ ވިދާޅުވިއެވެ.
މިނިސްޓަރ ވިދާޅުވީ އިގްތިސާދީ ވަޒީރުގެ ހައިސިއްޔަތުން ވެސް ރަނގަޅީ ވީހާވެސް އަވަހަކަށް ތަންތަން ހުޅުވާލައިގެން އާންމު ވިޔަފާރިތަކަށް ފައިސާ ވަނުން ކަމަށާއި، އެކަމުގެ ސަބަބުން ވަޒީފާ އުފެދި ދައުލަތަށް ޓެކްސް ވެސް ވަނުން ކަމަށެވެ. އެހެންނަމަވެސް މިއީ މިނިސްޓްރީގެ ކޮންޓްރޯލްގައި އޮތް ކަމެއް ނޫން ކަމަށާއި، އިންސާނުންގެ ފުރާނަ ރައްކާ ކުރަން ސަރުކާރުން ވާންޖެހޭ ގުރުބާނީއެއް ނުވެ ވާކަށް ވެސް ނެތް ކަމަށެވެ.
