އިގްތިސާދީ ވަޒީރުގެ ހައިސިއްޔަތުން އެދުމަކީ އަވަހަށް ކެފޭ ރެސްޓޯރެންޓްތަކާއި ވިޔަފާރިތައް ހުޅުވުން ކަމަށް އިކޮނަމިކް މިނިސްޓަރ ފައްޔާޒް އިސްމާއިލް ވިދާޅުވެއްޖެއެވެ.
ރެސްޓޯރެންޓް އެސޯސިއޭޝަނުން ކުރިއަށް ގެންދިޔަ އިހުތިޖާޖާއި ގުޅިގެން ރާއްޖެއެމްވީން ކުރި ސުވާލަކަށް ޖަވާބު ދެއްވަމުން މިނިސްޓަރ ފައްޔާރު ވިދާޅުވީ ރެސްޓޯރެންޓް އެސޯސިއޭޝަންގެ ބޭފުޅުން ޚިޔާލު ފާޅުކުރުމަކީ އެ ބޭފުޅުންނަށް ލިބިގެންވާ ހައްގެއް ކަމަށާއި، އެއީ މި އަމަލުކުރަމުންދާ ޑިމޮކްރަސީގައި އޮންނަ ކަމެއް ކަމަށެވެ.
މިނިސްޓަރ ވިދާޅުވީ އެބޭފުޅުންނާއި މީގެ 10 ވަރަކަށް ދުވަހު ކުރިން ވާހަކަ ދެކެވި މަޝްވަރާ ވެސް ކުރެވިފައިވާ ކަމަށެވެ.
ރައީސުލް ޖުމްހޫރިއްޔާ އެކުގައި ބައްދަލުވުމެއް ބައްވާ އެކަންކަމުގައި ސާފުކޮށް ދަންނަވާފައިވާނީ އަޅުގަނޑުމެން ލުއި ދެމުން ގެންދާ ވާހަކަ. އެ ބޭފުޅުންނަށް އެނގިވަޑައިގަންނަވާނެ ލުއިތައް ދިނުމުގެ މަސައްކަތް ކުރަމުންދާ ކަމަށް ވެސް. އެބޭފުޅުންނަށް ވެސް ގެއްލުން އަދި އެބޭފުޅުންނަށްވުރެ މާބޮޑަށް ގެއްލުން ލިބުނު ޖިމް ސެލޫން ކަހަލަ ތަންތަނަށް ވެސް. މިކަމީ ރަނގަޅުކަމެއް އޮތް ކަމެއް ނޫން. އަޅުގަނޑުމެން ހުޅުވާލާ ވަރަކަށް މީހުން މަރުވުމާއި ކަންކަން އިތުރުވާނަމަ އެއީ ސަރުކާރުން ވަރަށް ބޮޑަށް ރިއާޔަތްކުރަން ޖެހޭ ކަންކަން،އިކޮނަމިކް މިނިސްޓަރ ފައްޔާޒް އިސްމާއިލް
ކެފޭ ރެސްޓޯރެންޓްތަކަށް އެހީތެރިކަން ނުލިބޭކަމަށް ނޫސްތަކުގައި ރިޕޯޓްކޮށްފައިވާ ވާހަކައަށް ރައްދު ދެއްވަމުން މިނިސްޓަރ ފައްޔާޒު ވިދާޅުވީ ކުރީ ފަހަރު ކޮވިޑް ރިލީފްގައި 4 ރެސްޓޯރެންޓަކަށް އެކަނި ލޯން ލިބުނު ކަމަށް ރެސްޓޯރެންޓް އެސޯސިއޭޝަނާއި ހަވާލާދީ ޚަބަރު ލިޔެފައިވާތަން ދެކެވަޑައިގެންނެވި ކަމަށާއި، އެއީ ކޮންތާކުން ހޯއްދެވި މައުލޫމާތެއް ކަމެއް އެނގިވަޑައި ނުގަންނަވާ ކަމަށެވެ.
އެސްއެމްއީ ބޭންކް އެފްޑީސީ މެދުވެރިކޮށް އެކަނި ވެސް 150ށް ވުރެ ގިނަ ކެފޭ ރެސްޓޯރަންޓަށް 32 މިލިއަނަށްވުރެ ގިނަ ރުފިޔާގެ ލޯނު ދީފައިވާނީ. ދެން އަޅުގަނޑަކަށް ނޭނގޭ ކިހިނެއް ކަމެއް އެބޭފުޅުން 4 ރެސްޓޯރެންޓުގެ ވާހަކަ ގެންނެވީ. ދެން އެބޭފުޅުންނާއި އަޅުގަނޑު ވެސް މި ފަހުން އައި ލޮކްޑައުންއާއި ގުޅިގެން ބައްދަލުކޮށްފައި ޔަގީންކަން ދިނިން ކަންތައްތަކެއް ރާވަމުން ދިޔަ ކަމަށް. ދެން މިއީ ކުއްލި ކުއްލިއަކަށް ވާ ކަންތައްކަތެއް ނޫން، މީގައި ބައިވަރު ކަންތައްތަކެއް ވެސް ރާވަން ޖެހޭ. އޭގެ އިތުރުން އަޅުގަނޑުމެން ވާނެ އިއުލާންކޮށްފައި ވެސް އެސްއެމްއީ ބޭންކުން ޖުލައި 1ން ފެށިގެން އެޕްލިކޭޝަނަށް ހުޅުވާލާނެ ކަމަށް،އިކޮނަމިކް މިނިސްޓަރ ފައްޔާޒް އިސްމާއިލް
މިނިސްޓަރ ވިދާޅުވީ ޚާއްސަކޮށް ޖިމް ސެލޫން އަދި ކެފޭ ރެސްޓޯރެންޓްތަކަށް އެންމެ ބޮޑަށް އަސަރު ކުރި ފަރާތްތަކަށް އިސްކަމެއް ދީގެން ކަންކަން ކުރައްވާނެ ކަމަށެވެ. އަދި އެ ހުރިހާ ވާހަކައެއް އެބޭފުޅުންނަށް އެނގިވަޑައިގަންނަވާނެ ކަމަށާއި، އެބޭފުޅުން އިހްތިޖާޖަކަށް ދާންޖެހުނު ސަބަބެއް އެނގިވަޑައި ނުގަންނަވާ ކަމަށެވެ. މިނިސްޓަރ ވިދާޅުވީ އުނދަގޫތަކެއް ނެތް ވާހަކައެއް ނޫން ކަމަށާއި، އެހެންނަމަވެސް އެކަމާއި މަޝްވަރާތަކެއް ކުރެވި އެކަމާއި އެބޭފުޅުންނަށް ވެސް ކަންތައްތަކެއް ކޮށްދޭނެ ވާހަކަ ވަރަށް ސާފުކޮށް ދަންނަވާފައިވާނެ ކަމަށެވެ.
މާދަން ނޫން އަނެއް ދުވަހު ލުއިތަކެއް ދިނުމުގެ މަޝްވަރާރަކާއި އުއްމީދުތަކެއް ލިބިފައިވާ ވާހަކަ އަޅުގަނޑުމެން ވާނީ ދަންނަވާފައި. މާދަން ލުއި ލިބުނީމައި އެކަމާއި ގުޅުވަންކަމެއް ވެސް ނޭނގެ އެކަން ކުރައްވަނީ. އިހުތިޖާޖު ކުރުމަކީ މައްސަލައެއް ނޫން. ސަރުކާރުން މިދަނީ ކުރެވެން ހުރި ހުރިހާކަމެއް ކުރަމުން. ސަރުކާރަށް މިކަމުގައި އެންމެ ބޮޑު ގެއްލުމެއް އޮތީ ކޮވިޑްގެ ސަބަބުން. ދެން މިކަމުގައި ކުރެވެން ހުރި ހުރިހާކަމެއް އަޅުގަނޑުމެން މިދަނީ ކުރަމުން. އެންމެ އިސްކަމެއް ދޭނީ ދިވެހި ރައްޔިތުންގެ ފުރާނަ ނުރައްކަލުން ސަލާމަތްކުރުން،އިކޮނަމިކް މިނިސްޓަރ ފައްޔާޒް އިސްމާއިލް
މިނިސްޓަރ ވިދާޅުވީ އިހުތިޖާޖަށް ނުކުތުމުގެ ކުރިން އެވާހަކަ މިނިސްޓަރާއި ހިއްސާ ނުކުރައްވާ ކަމަށާއި، އިހުތިޖާޖު ކުރާ ވާހަކަ ފެނުނީ ޓްވީޓަކުން ކަމަށެވެ. އަދި މީގެ ކުރިން ވެސް އެބޭފުޅުންނާއި ބައްދަލުވި ނަމަވެސް އެފަދަ ވާހަކައެއް ނުދައްކާ ކަމަމަށެވެ. އަދި މީގެ 10 ވަރަކަށް ދުވަސް ކުރިން އޮންލައިންކޮށް ކެފޭ ރެސްޓޯރެންޓްތަކާއި ވެސް މަޝްވަރާ ކުރެވުނު ކަމަށެވެ. އެގޮތުން ފިނޭންސް މިނިސްޓަރާއި ވެސް ވާހަކަ ދެކެވުނު ކަމަށާއި، އެބޭފުޅުން ބޭނުންވަނީ އިންޑައިނިންގ ވަގުތުން ވަގުތަށް ހުޅުވާލަން ކަމަށެވެ. އެހެންނަމަވެސް މެޑިކަލް ޑޮކްޓަރުންގެ ލަފަށް ބިނާކޮށް ތަންތަން ހުޅުވަމުން ދާ ކަމަށާއި، އެއީ އެކަން ކުރެވެން އޮންނަ ގޮތް ކަމަށް މިނިސްޓަރ ވިދާޅުވިއެވެ.
މިނިސްޓަރ ވިދާޅުވީ އިގްތިސާދީ ވަޒީރުގެ ހައިސިއްޔަތުން ވެސް ރަނގަޅީ ވީހާވެސް އަވަހަކަށް ތަންތަން ހުޅުވާލައިގެން އާންމު ވިޔަފާރިތަކަށް ފައިސާ ވަނުން ކަމަށާއި، އެކަމުގެ ސަބަބުން ވަޒީފާ އުފެދި ދައުލަތަށް ޓެކްސް ވެސް ވަނުން ކަމަށެވެ. އެހެންނަމަވެސް މިއީ މިނިސްޓްރީގެ ކޮންޓްރޯލްގައި އޮތް ކަމެއް ނޫން ކަމަށާއި، އިންސާނުންގެ ފުރާނަ ރައްކާ ކުރަން ސަރުކާރުން ވާންޖެހޭ ގުރުބާނީއެއް ނުވެ ވާކަށް ވެސް ނެތް ކަމަށެވެ.
