ހުޅުމާލެ ދެވަނަ ފިޔަވަހީގައި އައު ސްކޫލެއް އަޅަން ރަޝީދު ކާޕެންޓްރީއާ ހަވާލުކޮށްފި
27 ޖޫން 2021 | އާދީއްތަ 16:56މި މަސައްކަތް 18 މަސްދުވަހުގެ ތެރޭގައި ނިންމަންޖެހޭ
އައު ސްކޫލް އިމާރަތްކުރުމަށް ރަޝީދު ކާޕެންޓްރީއާ ހަވާލުކުރުމުގެ ތެރެއިން
ހުޅުމާލެ ދެވަނަ ފިޔަވަހީގައި އައު ސްކޫލެއް އަޅަން ރަޝީދު ކާޕެންޓްރީ އެންޑް ކޮންސްޓްރަކްޝަން ޕްރައިވެޓް ލިމިޓެޑްއާ ހަވާލުކޮށްފިއެވެ.
މިމަސައްކަތް ހަވާލުކުރުމަށް އެޑިއުކޭޝަން މިނިސްޓްރީއިން ވަނީ ރަޝީދު ކާޕެންޓްރީއާއެކު އެއްބަސްވުމެއްގައިވެސް ސޮއިކޮށްފައެވެ. އެޑިއުކޭޝަން މިނިސްޓްރީގައި ބޭއްވި ރަސްމިއްޔާތެއްގައި މިކަމުގެ އެއްބަސްވުމުގައި ސޮއިކުރެއްވީ އެމިނިސްޓްރީގެ ސްޓޭޓް މިނިސްޓަރ އަޙްމަދު ރިޔާޒާއި ރަޝީދު ކާޕެންޓްރީގެ މެނޭޖިން ޑިރެކްޓަރ އަޙްމަދު ރަޝީދެވެ. މި މަސައްކަތް 18 މަސްދުވަހުގެ ތެރޭގައި ނިންމަންޖެހޭނެކަމަށް އެޑިއުކޭޝަން މިނިސްޓްރީއިން ބުނެއެވެ. 243 މިލިަޔަނަށްވުރެ ގިނަ ރުފިޔާ މިމަޝްރޫޢަށް ޚަރަދުވެއެވެ. އެޑިއުކޭޝަން މިނިސްޓްރީން ބުނީ މި މަސައްކަތަކީ ކޮންޓްރެކްޓަރ ފައިނޭންސްގެ އުސޫލުން 5 އަހަރަށް ބަހާލައިގެން ރިފައިނޭންސް ކުރާގޮތަށް ހަވާލުކުރާ މަޝްރޫޢެއް ކަމަށެވެ.
އައު ސްކޫލެއް އަޅަން ރަޝީދު ކާޕެންޓްރީއަށް ހަވާލުކޮށްފައިވާއިރު، މިދިޔަ ފެބުރުއަރީ މަހުގެ ތެރޭގައިވެސް ވަނީ ހުޅުމާލެ ދެވަން ފިޔަވަހީގައި ސްކޫލެއް ހަދަން ބަޔަކާ ހަވާލުކޮށްފައެވެ. ފަޟީލަތުއްޝައިޚު ޙުސައިން ޞަލާޙުއްދީނުގެ ހަނދާނުގެ މައްޗަށް ބިނާކޮށް "ޞަލާޙުއްދީން ސްކޫލު"ގެ ނަމުގައި ހަދާ މިސްކޫލް ހަދަން ހަވާލުކޮށްފައިވަނީ އަމީން ކޮންސްޓްރަކްޝަން ޕްރައިވެޓް ލިމިޓެޑާއެވެ.
އެޑިއުކޭޝަން މިނިސްޓްރީން ބުނެފައިވަނީ ހުޅުމާލޭގެ ދެވަނަ ފިޔަވަހީގައި ޢިމާރާތް ކުރުމަށް ހަމަޖެހިފައިވަނީ 4 ސްކޫލް ކަމަށެވެ. މީގެތެރެއިން 3 ސްކޫލަކީ ކޮންޓްރެކްޓަރ ފައިނޭންސް، ޑިޒައިން އެންޑް ބިލްޑް އުސޫލުން ހަދާ ސްކޫލްތަކެވެ. އަނެއް ސްކޫލަކީ ބޭރު ފަރާތަކުން ތަރައްގީކުރާ އިންޓަރނޭޝަނަލް ސްކޫލެކެވެ. މި ހުރިހާ ސްކޫލްތަކަކީވެސް 6 ބުރީގެ ޢިމާރާތްތަކެކެވެ. މިއިން ކޮންމެ ސްކޫލެއްގައި ގްރޭޑް 1އިން 10އަށް ކިޔަވައިދިނުމަށްވަނީ ހަމަޖެހިފައެވެ. މިއީ 1،000އާ 1،200އާ ދެމެދުގެ ކުދިންގެ ޖާގައިގެ ސްކޫލްތަކެއްކަމަށް އެޑިއުކޭޝަން މިނިސްޓްރީން ބުނެއެވެ.
