ގަދަ 16 - ނެދަލެންޑްސް އާއި ޗެކް ރިޕަބްލިކުގެ ކުރިމަތިލުން

ޔޫރޯ 2020 ގެ ދެވަނަ ބުރުގައި ނެދަލެންޑްސް އާއި ޗެކް ރިޕަބްލިކް ބައްދަލުކުރާއިރު، މި މެޗަކީ ގިނަ ބަޔަކު އިންތިޒާރު ކުރަމުން އަންނަ މެޗެކެވެ.

މި މުބާރާތުގެ ދެވަނަ ބުރަށް ނެދަލެންޑްސް ދަތުރުކޮށްފައިވަނީ ގްރޫޕް ސީ ގެ އެއްވަނަ ޓީމުގެ ގޮތުގައި ސައްތައިން ސައްތަ ރިކޯޑަކާއެކުއެވެ. ނެދަލެންޑްސްއިން ކުޅުނު ފުރަތަމަ މެޗުގައި ޔޫކްރޭންގެ މައްޗަށް ކުރިހޯދީ 3-2 ގެ ނަތީޖާއަކުންނެވެ. އަދި ދެވަނަ މެޗުގައި އޮސްޓްރިއާ އަތުން 2-0 ގެ ނަތީޖާއަކުން މޮޅުވިއިރު، ފަހު މެޗުގައި ނޯތު މެސެޑޯނިއާގެ މައްޗަށް ކުރިހޯދީ 3-0 ގެ ނަތީޖާއަކުންނެވެ.

މީގެ އިތުރުން މުބާރާތުގެ ދެވަނަ ބުރަށް ޗެކް ރިޕަބްލިކް ދަތުރުކުރީ ގްރޫޕް ޑީ ގެ ތިންވަނަ ޓީމުގެ ގޮތުގައެވެ. މުބާރާތުގައި ކުޅުނު ފުރަތަމަ މެޗުން ސްކޮޓްލެންޑްގެ އަތުން ޗެކް ރިޕަބްލިކް މޮޅުވީ 2-0 ގެ ނަތީޖާއަކުންނެވެ. ދެވަނަ މެޗުގައި ކްރޮއޭޝިއާއާ 1-1 ގެ ނަތީޖާއަކުން އެއްވަރުވިރު، ތިންވަނަ މެޗުގައި އިންގްލެންޑް އަތުން ވަނީ 1-0 ގެ ނަތީޖާއަކުން ބަލިވެފައެވެ.

ޗެކް ރިޕަބްލިކް މެޗުގެ ކުރިން ނެދެލެންޑްސްގެ ކޯޗު ފްރޭންކް ޑި ބޮއާ ބުނީ މި މުބާރަތީ ނެދަލެންޑްސްއަށް ކާމިޔާބު މުބާރާތެއް ކަމަށް ގިނަ ބަޔަކު މިހާރުވެސް ދެކެމުން އަންނަ ކަމަށާއި، އެކަމަކު އެކަން ނިންމާނީ ސެމީ ފައިނަލާއި ހިސާބަށް ދަތުރުކުރެވިއްޖެ ކަމަށްވާނަމަ އެވެ. އަދި ދެވަނަ ބުރުގައި ޗެކް ރިޕަބްލިކާ ދެކޮޅަށް ނިކުންނައިރު، މި މެޗު ފަސޭހަކޮށްލައިގެން ތިބެވެން ނެތް ކަމަށާއި، މެޗުގެ ފުރަތަމަ 20 މިނެޓަކީ ނެދަލެންޑްސްއިން މެޗުގެ ކޮންޓްރޯލް ނަގަން ޖެހޭ 20 މިނެޓް ކަމަށްވެސް ވަނީ ބުނެފައެވެ.

ޗެކް ރިޕަބްލިކްގެ ކޯޗު ޔަރޯސްލާވް ޝިލްހަވީ ބުނީ މި މެޗުގައި ޗެކް ރިޕަބްލިކުގެ ކުޅުންތެރިން ޓެކްޓިކަލް ޑިސިޕްލިން ހިފަހައްޓައިގެން ކުޅެފިނަމަ ނެދަލެންޑްސް އަކީ ބަލިކުރަން އުނދަގޫ ޓީމަކަށް ނުވާނެ ކަމަށެވެ. އަދި އަމާޒަކީ ނެދަލެންޑްސް ބަލިކޮށް، ކުއާޓާ ފައިނަލުން ޖާގައެއް ހޯދުން ކަމަށްވެސް ވަނީ ބުނެފައެވެ.

ޔޫރޯ 2020 ގެ ލޯކަލް އެކްސްކްލޫސިވް ބްރޯޑްކާސްޓިން ރައިޓްސް ރާއްޖެޓީވީން ނަގާފައިވުމާއެކު، މި މެޗު ދިވެހި ރައްޔިތުންނާ ހަމައަށް ރާއްޖެޓީވީން ވަގުތުން ގެނަސްދޭނެއެވެ. އަދި ރާއްޖެ.އެމްވީ ވެބްސައިޓުންވެސް މި މެޗު ސްޓްރީމްކުރާނެއެވެ.

މެޗުގެ ކުރިން މައިލޯ ޔޫރޯ ފޯރި ޝޯ 20:00 ގައޮ ރާއްޖެޓީވީން ގެނެސްދޭއިރު، މި ޝޯ ހުށަހަޅާނީ ރާއްޖެޓީވީގެ ކުޅިވަރު ނޫސްވެރިޔާ އިސްމާޢީލް ޝާހެވެ. ޝާހާއެކި އެނަލިސްޓެއް ގޮތުގައި އިހުސާން އަބްދުލް ޣަނީ (ސާންތި) ބައިވެރިވެވަޑައިގަންނަވާއިރު، ޚާއްސަ މެހުމާނެއްގެ ގޮތުން އަޙްމަދު ޝާކިރު (ޝާކިއްޓެ) ވެސް ބައިވެރިވެވަޑައިގަންނަވާނެއެވެ.

ނެދަލެންޑްސް އާއި ޗެކް ރިޕަބްލިކް ބައްދަލުކުރާ މެޗު ފަށާނީ އާދީއްތަ ދުވަހުގެރޭ ރާއްޖެ ގަޑިން 21:00 ގައެވެ.