ޔޫރޯ 2020 ގެ ދެވަަނަ ބުރުގެ ކުޅުން ހޮނިހިރު ދުވަހުގެރޭ ފަށާއިރު، ފުރަތަމަ މެޗުގައި ބައްދަލުކުރާނީ ގްރޫޕް އޭ ގެ ދެވަނަ ޓީމު ވޭލްސް އާއި ގްރޫޕް ބީ ގެ ދެވަނަ ޓީމު ޑެންމާކެވެ.

ގްރޫޕް އޭ ގެ ދެވަނަ ޓީމުގެ ގޮތުގައި ވޭލްސް ދެވަނަ ބުރަށް ދަތުރުކުރިއިރު، ގްރޫޕް ސްޓޭޖުގައި ކުޅުނު ފުރަތަމަ މެޗުގައި ވޭލްސް ވަނީ ސްވިޓްޒަލެންޑްއާ 1-1 ގެ ނަތީޖާއަކުން އެއްވަރުވެފައެވެ. އެކަމަކު ދެވަނަ މެޗުގައި ތުރުކީ އަތުން 2-0 ގެ ނަތީޖާއަކުން މޮޅުވި ނަމަވެސް، ގްރޫޕްގެ ފަހު މެޗުގައި އިޓަލީ އަތުން ވޭލްސް ވަނީ ބަލިވެފައެވެ. އެއާއެކު ވޭލްސް ދެވަނަ ބުރަށް ދަތުރުކުރީ ކުޅުނު ތިން މެޗުން ލިބުނު ހަތަރު ޕޮއިންޓާއެކުއެވެ.

މީގެ އިތުރުން ޑެންމާކުން ދެވަނަ ބުރަށް ދަތުރުކުރީ ރަޝިއާގެ މައްޗަށް ތާރީޚީ މޮޅެއް ހޯދައިގެންނެވެ. އެގޮތުން ޑެންމާކުން މި މުބާރާތުގައި ކުޅުނު ފުރަތަމަ މެޗުން ފިންލެންޑް އަތުން 1-0 ގެ ނަތީޖާއަކުން ބަލިވިއިރު، ދެވަނަ މެޗުން ވަނީ ބެލްޖިއަމް އަތުން 2-1 ގެ ނަތީޖާއަކުން ބަލިވެފައެވެ. އެކަމަކު ޑެންމާކުން ވަނީ ކުޅުނު ފަހު މެޗުގައި ރަޝިއާގެ މައްޗަށް 4-1 ގެ ނަތީޖާއަކުން ކުރި ހޯދާ ދެވަނަ ބުރުގެ ޖާގައެއް ކަށަވަރުކޮށްފައެވެ. އެއާއެކު ޑެންމާކަކީ ޔޫރޯގެ ތާރީޚުގައި ފުރަތަމަ ދެ މެޗުން ބަލިވެ، ފަހު މެޗު ކާމިޔާބުކޮށް ދެވަނަ ބުރުން ޖާގަ ހޯދި ފުރަތަމަ ޓީމެވެ. ގްރޫޕް ބީ ގައި ހިމެނުނު ޑެންމާކާއި، ފިންލެންޑް އަދި ރަޝިއާއަށްވެސް ތިން ޕޮއިންޓް ލިބުނުއިރު، ޑެންމާކަށް ކުރި ލިބުނީ ފައިދާ ލަނޑުގެ ތަފާތުންނެވެ.

ޑެންމާކް މެޗުގެ ކުރިން ވާހަކަދައްކަމުން ވޭލްސްގެ ކޯޗު ރޮބާޓް ޕޭޖް ބުނީ ޑެންމާކުން މިހާތަނަށް މެޗަކަށްފަހު މެޗެއް ރަނގަޅު ކުރަމުން އައި ކަމަށާއި، އަދި އެ ޓީމަކީ އެޓޭކުތަކުގައި އިދިކޮޅު ޓީމަށް ނުރައްކާކުރާ ޓީމެއް ކަމަށެވެ. އަދި ދެވަނަ ބުރުގައި ޑެންމާކާ ދެކޮޅަށް ނުކުންނައިރު، ވޭލްސްއިން މި މުބާރާތުގައި ދެވެން އޮތް އެންމެ ދުރަށް ދާން ބޭނުންވާ ކަމަށާއި، އެކަމުގައި ވޭލްސްގެ ކުޅުންތެރިންނަށް އިތުބާރު އެބައޮތް ކަމަށްވެސް ބުންޏެވެ. އަދި މިހާތަނަށް ވޭލްސްގެ ކެޕްޓަން ގެރެތު ބޭލްގެ ފަރާތުން ފެނުނު ކުޅުމާއި، ލީޑަޝިޕުވެސް ފާހަގަކޮށްލެވޭ ކަމަށްވެސް ޕޭޖް ބުންޏެވެ.

ޑެންމާކުގެ ކޯޗު ކެސްޕަ ހިލްމަންޑް ބުނީ އެ ޓީމަކީ މި މުބާރާތުގައި ސަޕްރައިސިންގް ޓީމެއް ކަމަށް ގިނަ ބަޔަކު ދެކޭ ކަމަށާއި، އެހެންކަމުން އެގޮތުގައި ކުރިއަށްދާން ބޭނުންވާ ކަމަށެވެ. އަދި ވޭލްސްއާ ދެކޮޅަށް ނުކުންނަން ޑެންމާކުން ވަރަށް ރަނގަޅަށް ތައްޔާރުވެފައިވާ ކަމަށްވެސް ހިލްމަންޑް ބުންޏެވެ.

ޔޫރޯ 2020 ގެ ލޯކަލް އެކްސްކްލޫސިވް ބްރޯޑްކާސްޓިން ރައިޓްސް ރާއްޖެޓީވީން ނަގާފައިވުމާއެކު، މި މެޗު ދިވެހި ރައްޔިތުންނާ ހަމައަށް ރާއްޖެޓީވީން ވަގުތުން ގެނަސްދޭނެއެވެ. އަދި ރާއްޖެ.އެމްވީ ވެބްސައިޓުންވެސް މި މެޗު ސްޓްރީމްކުރާނެއެވެ.

މެޗުގެ ކުރިން މައިލޯ ޔޫރޯ ފޯރި ޝޯ 20:00 ގައި ރާއްޖެޓީވީން ގެނެސްދޭއިރު، މި ޝޯ ހުށަހަޅާނީ ރާއްޖެޓީވީގެ ހެޑް އޮފް ސްޕޯޓްސް ހުސެއިން ފަރިޔާޒެވެ. ފަރިޔާޒާއެކު އެނަލިސްޓުންގެ ގޮތުގައި ބައިވެރިވާނީ އިސްމާޢީލް ޒަރިޔަންދު އާއި މުޙައްމަދު ނިޒާމް (ނިޒާމްބެ) އެވެ.

ވޭލްސް އާއި ޑެންމާކް ބައްދަލުކުރާ މެޗު ފަށާނީ ހޮނިހިރު ދުވަހުގެރޭ ރާއްޖެ ގަޑިން 21:00 ގައެވެ.