އއ. ފެރިދޫގެ ފެނާއި ނަރުދަމާ ނިޒާމް ގާއިމުކުރުމުގެ ޢަމަލީ މަސައްކަތް ފަށައިފިއެވެ.

ފެރިދޫގެ ފެނާއި ނަރުދަމާގެ މަޝްރޫއަކީ މިނިސްޓްރީ އޮފް ނޭޝަނަލް ޕްލޭނިންގ، ހައުސިންގ އެންޑް އިންފްރާސްޓްރަކްޗަރއިން އެމް.ޑަބްލިޔު.އެސް.ސީއާ ހަވާލުކޮށްގެން ކުރިޔަށް ގެންދާ މަޝްރޫއެކެވެ. ޖުމްލަ 35 މިލިއަނަށްވުރެ ގިނަ ރުފިޔާ ޚަރަދުކޮށްގެން ކުރިޔަށް ގެންދާ މި މަޝްރޫއަކީ ފެރިދޫއަށް ކުރިމަތިވެފައިވާ ފެނާއި ނަރުދަމާ ނިޒާމަށް ހައްލެއް ހޯދައިދިނުމުގެ ގޮތުން ކުރިޔަށް ގެންދާ މަޝްރޫއެއް ކަމަށް އެމް.ޑަބްލިޔު.އެސް.ސީން ބުނެއެވެ. މި މަޝްރޫޢުގައި ހިމެނޭ ފެނުގެ ނިޒާމް ގާއިމުކުރުމުގެ މަސައްކަތުގެ ދަށުން މިހާރު ކުރިޔަށްދަނީ ފެން ޕްލާންޓް ބެހެއްޓުމަށް އިމާރާތްކުރާ އިމާރާތުގެ މަސައްކަތް ކަމަށް އެމް.ޑަބްލިޔު.އެސް.ސީއިން ހާމަކުރިއެވެ.

ބިމުގެ ބޮޑުމިނުގައި 44.2 ހެކްޓަރ ހުންނަ ފެރިދޫގައި ގާއިމުކުރެވޭ ފެނުގެ ނިޒާމުގެ މަސައްކަތުގެ ދަށުން، 6.76 ކިލޯ މީޓަރުގެ ދިގު ފެން ހޮޅީގެ މައި ނެޓްވޯރކް އެޅުމަށްވަނީ ހަމަޖެހިފައެވެ. އަދި އާރް.އޯ ފެސިލިޓީ އިމާރާތެއް ހެދުމާއި، ފެން އުފެއްދުމަށް 2 އާރް.އޯ ޕްލާންޓް ބެހެއްޓުމަށް ހަމަޖެހިފައިވާ ކަމަށް އެމް.ޑަބްލިޔު.އެސް.ސީން މަޢުލޫމާތުދިނެވެ. މީގެ އިތުރުން، ފެން ރައްކާކުރުމަށް ހަދާ 3 ތާންގީ ބެހެއްޓުމަށް ވެސް ވަނީ ހަމަޖެހިފައެވެ. މި މަޝްރޫއުގެ ދަށުން ނަރުދަމާ ނިޒާމު ގާއިމުކުރުމަށް ބޭނުންވާ ހޮޅިއާއި އެހެނިހެން ތަކެތި މިހާރުވަނީ ފެރިދޫއަށް ގެންގޮސްފައެވެ.

ފެރިދޫއަށް ކުރިމަތިވެފައިވާ ނަރުދަމާ ނިޒާމުގެ މައްސަލައަށް ހައްލެއް ހޯދައިދިނުމުގެ ގޮތުން ކުރިޔަށްދާ މި މަޝްރޫޢާއެކު، ފެރިދޫގައި 5.04 ކިލޯ މީޓަރުގެ ދިގު ނަރުދަމާގެ މައި ނެޓްވޯކެއް ގާއިމުކޮށް 1.07 ކިލޯ މީޓަރުގެ ޕަންޕިން ލައިނަކާއި، ނަރުދަމާގެ އިދާރީ އިމާރާތަކާއި، 3 ޕަންޕިންގ ސްޓޭޝަނާއި، އެއް ސީ އައުޓް ފޯލް އެޅުމަށް ވަނީ ހަމަޖެހިފައެވެ. މި މަޝްރޫޢުގެ ދަށުން ގޭގޭގައި ޖަންކްޝަން ބެހެއްޓުމުގެ މަސައްކަތާއި، ނަރުދަމާ ކަނެކްޝަން ގުޅައިދިނުމުގެ އިންތިޒާމުވެސް ހަމަޖެހިގެންދާނެކަމަށް އެމް.ޑަބްލިޔު.އެސް.ސީން ހާމަކުރިއެވެ.

ފެރިދޫއަށް ކުރިމަތިވެފައިވާ މި މައްސަލަތަކަށް ދާއިމީ ހައްލެއް ހޯދުމުގެ ގޮތުން މި މަޝްރޫއާއެކު ފެނާއި ނަރުދަމާ ނިޒާމް ހިންގާ ބެލެހެއްޓުމަށް ބޭނުންވާ ޖަނެރޭޓަރ ސެޓާއި، ވެހިކަލް އަދި ފެން ތަޙުލީލު ކުރުމަށް ބޭނުންވާ ސާމާނުވެސް ފެރިދޫ ރައްޔިތުންނަށް ދިނުމަށް ހަމަޖެހިފައިވާކަމަށް އެމް.ޑަބްލިޔު.އެސް.ސީން ބުނެއެވެ.