ރާއްޖެއިން މިހާތަނަށް 184،000ށް ވުރެ ގިނަ މީހުން ވެކްސިންގެ ދެވަނަ ޑޯޒް ޖަހައިފި
މާލެ ސަރަހައްދުން 98 މީހަކު ވެކްސިންގެ ފުރަތަމަ ޑޯޒް ޖަހާފައިވޭ
ކޮވިޑް-19 ވެކްސިން
ރާއްޖެއިން މިހާތަނަށް 184,000 ވުރެ ގިނަ މީހުން ވެކްސިންގެ ދެވަނަ ޑޯޒް ޖަހައިފިއެވެ.
ހެލްތު ޕްރޮޓެކްޝަން އެޖެންސީ (އެޗްޕީއޭ)ގެ ތަފާސްހިސާބުތައް ދައްކާ ގޮތުން 184،865 މީހުން މިހާތަނަށް ވަނީ ވެކްސިންގެ ދެވަަނަ ޑޯޒް ޖަހާފައެވެ. އަދި ވެކްސިންގެ ފުރަތަމަ ޑޯޒް ޖަހާފައިވަނީ ޖުމްލަ 315،620 މީހުންނެވެ.
ފާއިތުވެދިޔަ 24 ގަޑިއިރުގެ ތެރޭގައި މާލެ ސަރަހައްދުން 98 މީހަކު ވެކްސިންގެ ފުރަތަމަ ޑޯޒް ޖަހާފައިވާއިރު އަތޮޅު ތެރެއިން ވެކްސިންގެ ފުރަތަމަ ޑޯޒް ޖަހާފައިވަނީ 125 މީހުންނެވެ. މިއާއެކު އަދި ވެކްސިންގެ ދެވަަނަ ޑޯޒް މާލެ ސަރަހައްދުން 199 މީހުން ޖަހާފައިވާއިރު އަތޮޅު ތެރެއިން 454 މީހަކު ވަނީ ދެވަނަ ޑޯޒް ޖަހާފައެވެ.
ރާއްޖޭގައި މިހާރު ޖަހަމުން އަންނަނީ ކޮވިޝީލްޑް ވެކްސިނާއި، ފައިޒަރ ވެކްސިން، އަދި ސިނޮފަރމް ވެކްސިނެވެ. މީގެތެރެއިން ކޮވިޝީލްޑް ވެކްސިންގެ ދެވަނަ ޑޯޒް ޖެހުން މާލެ ސަރަހައްދުގައި މެއި މަހުގެ 2 ވަނަ ދުވަހުން ފެށިގެން ވަނީ މެދުކަނޑާލާފައެވެ.
މާލެ ސަރަހައްދުގައި އުމުރުން 18 އަހަރާ 60 އަހަރާ ދެމެދުގެ މީހުންނަށް ސިނޮފަރމް ވެކްސިންގެ ފުރަތަމަ ޑޯޒާއި ދެވަނަ ޑޯޒް ޖަހަމުން އަންނައިރު، މާލެއާއި ވިލިމާލެ އަދި ހުޅުމާލެ ހިމެނޭހެން 6 ސެންޓަރެއްގައި ވެކްސިން ދިނުން ކުރިއަށްދެއެވެ. އަދި ގޭގެއަށް ގޮސްގެން ވެކްސިން ދިނުމަށް 2 މޮބައިލް ޓީމް އަންނަނީ ހަރަކާތްތެރި ވަމުންނެވެ. މީގެއިތުރުން އަތޮޅުތަކުގައި 193 ސެންޓަރުން އަންނަނީ ވެކްސިންދެމުންނެވެ.
