ދެކުނު އެމެރިކާގެ އެންމެ ޝަރަފުވެރި ފުޓްބޯޅަ މުބާރާތް ކަމަށްވާ ކޮޕާ އެމެރިކާގައި އަންގާރަ ދުވަހުގެ ފަތިހު ކުޅުނު މެޗުން ޕެރަގުއޭ ބަލިކޮށް މުބާރާތުގެ ކުއާޓާ ފައިނަލަށް އާޖެންޓީނާ ދަތުރުކޮށްފިއެވެ.
ބްރެޒިލުގައި ކުރިއަށްދާ މި މުބާރާތުގައި ކުޅުނު ތިންވަނަ މެޗުން ޕެރަގުއޭ އަތުން އާޖެންޓީނާ މޮޅުވީ 1-0 ގެ ނަތީޖާއަކުންނެވެ.
މި މެޗުގައި އާޖެންޓީނާއިން މޮޅު ކުޅުމެއް ދެއްކިއިރު، މެޗުގެ ވަރަށް ކުރީކޮޅު އެ ގައުމުން ވަނީ ލީޑު ނަގާފައެވެ. މެޗު ފަށައިގެން 10 ވަނަ މިނެޓުގައި އެންހެލް ޑި މާރިއާ ދިން ބޯޅައަކުން މި ލަނޑު އެ ގައުމަށް ކާމިޔާބުކޮށްދިނީ އަލެހަންދްރޯ ގޯމޭޒެވެ. އަދި އޭގެ ފަހުންވެސް އާޖެންޓީނާާއަށް ވަނީ ލަނޑު ޖަހަން ރަނގަޅު ފުރުސަތުތަކެއް ލިބި ބޭކާރުވެފައެވެ.
މި މޮޅާއެކު ގްރޫޕް އޭގެ އެއްވަަނައިގައި އާޖެންޓީނާ އޮތީ ކުޅުނު ތިން މެޗުން ހަތް ޕޮއިންޓާއެކުއެވެ. ދެވަނައިގައި އޮތީ ތިން މެޗުން ފަސް ޕޮއިންޓް ހޯދާފައިވާ ޗިލީއެވެ. ހޯމަ ދުވަހުގެރޭ ޗިލީ އާއި އުރުގުއޭ ބައްދަލުކުރި މެޗު ނިމުނީ 1-1 ގެ ނަތީޖާއަކުން އެއްވަރުވެގެންނެވެ.
ޕެރަގުއޭ ބަލިކޮށް އާޖެންޓީނާ ކުއާޓާއަށް ދަތުރުކުރިއިރު، މީގެ ކުރިން އެންމެ ފަހުގެ ޗެމްޕިއަން ބްރެޒިލްލާއި ޗިލީވެސް ވަނީ ކުއާޓާގެ ޖާގައެއް ކަށަވަރުކޮށްފައެވެ.
