ޔޫކްރޭން ބަލިކޮށް އޮސްޓްރިއާ ދެވަނަ ބުރަށް

ޔޫކްރޭން ބަލިކޮށް ޔޫރޯ 2020 ގެ ދެވަނަ ބުރަށް އޮސްޓްރިއާ ދަތުރުކޮށްފިއެވެ.

ބުކަރެސްޓްގެ ނެޝަނަލް އެރީނާގައި ކުޅުނު ގްރޫޕް ސީގެ މެޗުން އޮސްޓްރިއާ މޮޅުވީ 1-0 ގެ ނަތީޖާއަކުންނެވެ. އެއާއެކު އޮސްޓްރިއާ ވަނީ ދެވަނަ ޓީމުގެ ގޮތުގައި ދެވަނަ ބުރުގެ ޖާގައެއް ކަށަވަރުކޮށްފައެވެ. މިއީ އޮސްޓްރިއާއިން ޔޫރޯގެ ދެވަނަ ބުުރުގައި ކުޅޭނެ ފުރަތަމަ ފަހަރެވެ. އެ ޓީމުން ދެވަނަ ބުރުގައި ކުޅޭނީ ގްރޫޕް އޭގެ އެއްވަނަ ހޯދި އިޓަލީއާއެވެ.

ހޯމަ ދުވަހުގެރޭ ކުޅުނު މެޗު ފަށައިގެން ދެ ޓީމުގެ ފަރާތުން ހަމަހަމަ ކުޅުމެއް ފެނުނު ނަމަވެސް، ފުރަތަމަ ހާފުގައި ޔޫކްރޭނަށް ނުރައްކާތެރި ހަމަލާއެއް އޮސްޓްރިއާގެ ގޯލަށް ފޮނުވާލެވިފައެއް ނުވެއެވެ. އެކަމަކު މި ހާފުގައި އޮސްޓްރިއާއިން ވަނީ ލީޑު ނަގާފައެވެ. މެޗުގެ 21 ވަނަ މިނެޓުގައި މި ލަނޑު އެ ޓީމަށް ކާމިޔާބުކޮށްދިނީ ކްރިސްޓޯފް ބައުމްގާޓްނާއެވެ.

މި މޮޅާއެކު ދެވަނަ ބުރުގެ ޖާގައެއް އޮސްޓްރިއާއަށް ލިބުނުއިރު، މިއީ 1954 ވަަނަ އަހަރުގެ ފީފާ ވޯލްޑް ކަޕަށް ފަހު އޮސްޓްރިއާއިން ބޮޑު މުބާރާތުގެ ނޮކައުޓް މެޗެއްގައި ކުޅޭ ފުރަތަމަ ފަހަރެވެ.

މީގެ އިތުރުން ހޯމަ ދުވަހުގެރޭ ކުޅުނު މެޗުން މޮޅުވެ ނެދަލެންޑްސްއިން ވަނީ ގްރޫޕް ސީގެ އެއްވަނަ ހޯދާފައެވެ. ސައްތައިން ސައްތަ ރިކޯޑަކާއެކު ނެދަލެންޑްސްއިން ދެވަނަ ބުރަށް ދަތުރުކުރިއިރު، ހޯމަ ދުވަހުގެރޭ ނޯތު މެސެޑޯނިއާ އަތުން އެ ޓީމު މޮޅުވީ 3-0 ގެ ނަތީޖާއަކުންނެވެ.

ޔޯހަން ކްރައިފް އެރީނާގައި ކުޅުނު މެޗުގެ 24 ވަނަ މިނެޓުގައި ނެދަލެންޑްސްއިން ވަނީ ލީޑު ނަގާފައެވެ. މި ލަނޑު އެޓީމަށް ކާމިޔާބުކޮށްދިނީ މެމްފިސް ޑިޕާއިއެވެ. އަދި މެޗުގެ ދެވަނަ ހާފުގައި ނެދަލެންޑްސްއިން އެ ޓީމުގެ އެޓޭކުތައް އިތުރަށް ވަރުގަދަކުރިއިރު، މެޗުގެ 51 ވަނަ މިނެޓުގައި ޑިޕާއީގެ އެހީތެރިކަމާއެކު ޖިއޮޖީނިއޯ ވައިނަލްޑަމް ވަނީ އެ ޓީމުގެ ލީޑު ފުޅާކޮށްދީފައެވެ. އަދި އޭގެ ހަ މިނެޓު ފަހުން ވައިނަލްޑަމް ވަނީ ނެދަލެންޑްސްގެ ތިންވަނަ ލަނޑު ޖަހާފައެވެ.

މި ނަތީޖާއާއެކު ގްރޫޕް ސީގެ އެއްވަނަ ނެދަލެންޑްސްއަށް ލިބުނީ ކުޅުނު ތިން މެޗުންވެސް މޮޅުވެ ނުވަ ޕޮއިންޓާއެކުއެވެ. ދެވަނައިގައި އޮތް އޮސްޓްރިއާއަށް ތިން މެޗުން ހަ ޕޮއިންޓް ލިބިފައިވާއިރު، ޔޫކްރޭން ތިންވަނައިގައި އޮތީ ތިން މެޗުން ތިން ޕޮއިންޓާއެކުއެވެ. އަދި މި މުބާރާތުގައި މުޅިން އަލަށް ކުޅުނު ނޯތު މެސެޑޯނިއާ މުބާރާތުން ކެޓިއިރު، އެ ޓީމަށް ޕޮއިންޓެއް ލިބިފައެއް ނުވެއެވެ.