މާލޭގެ ކޭސްތައް 35ށް ވެއްޓުނު އިރު އަތޮޅު ތެރޭގެ ކޭސްތައް 4 ގުނަ އިތުރު
މިއީ ފާއިތުވި 2 މަހާއި 4 ދުވަސް ފަހުން މާލެ ސަރަހައްދުން އެންމެ މަދުން ކޭސްތައް ރިޕޯޓްކުރި ދުވަސް
ކޮވިޑް-19އާ ގުޅިގެން ފްރަންޓްލައިންގައި މަސައްކަތް ކުރާ އާރުއާރުޓީންގެ ބައެއް
2 މަސް ދުވަހަށްފަހު މާލެ ސަރަހައްދުން ފެނުނު ކޭސްތަކުގެ އަދަދު 50ން ދަށުން ރިޕޯޓްކޮށްފިއެވެ.
ހެލްތް ޕްރޮޓެކްޝަން އެޖެންސީ (އެޗްޕީއޭ)އިން އާންމުކުރި ތަފާސް ހިސާބުތައް ދައްކާގޮތުން ވޭތުވެދިޔަ 24 ގަޑިއިރު މާލެ ސަަރަހައްދުން ރިޕޯޓްކޮށްފައިވަނީ 35 ކޭސްއެވެ. ނަމަވެސް އަތޮޅު ތެރެއިން ރިޕޯޓްކުރި ކޭސްތައް މާލެއާއި އަޅާ ބަލާއިރު 4 ގުނަ އިތުރެވެ.
އެޗްޕީއޭއިން އާންމުކޮށްފައިވާ ތަފާސް ހިސާބުތައް ދައްކާގޮތުން، އާދީއްތަ ދުވަހުގެ އިރުއޮއްސި 6:00ން ހޯމަ ދުވަހުގެ އިރުއޮއްސި 6:00އާ ހަމައަށް ނެގި 5،269 ސާމްޕަލްގެ ތެރެއިން ޕޮޒިޓިވްވެފައިވަނީ 253 ސާމްޕަލެވެ. އެއީ މާލެ ސަރަހައްދުން ޕޮޒިޓިވްވި 35 މީހުންނާއި، އަތޮޅު ތެރެއިން ޕޮޒިޓިވްވި 164 ސާމްޕަލެވެ. މީގެ އިތުރުން ރިސޯޓްތަކުން 3 މީހުން، ތަރައްގީކުރަމުން އަންނަ ރަށަކުން 43 މީހުން، އަދި ސިނާއީ މަސައްކަތް ކުރާ ރަށަކުން 8 މީހުން ވަނީ ޕޮޒިޓިވްވެފައެވެ.
ހޯމަ ދުވަހު ޕޮޒިޓިވްވި 253 މީހުންނާއެކު ރާއްޖެއިން ކޮވިޑް ޖެހުނު މީހުންގެ އަދަދު ވަނީ 72،149ށް އަރާފައެވެ. އެކްޓިވް ކޭސްގެ ގޮތުގައި 4،784 ކޭސް ހޯމަ ދުވަހު ރިޕޯޓްކޮށްފައިވާ އިރު، މީގެ ތެރެއިން 44 މީހަކަށް އަންނަނީ ހޮސްޕިޓަލުގައި އެޑްމިޓްކޮށްގެން ފަރުވާ ދެމުންނެވެ. މި ބަލީގައި މިހާތަނަށް ރާއްޖެއިން 206 ނިޔާވެފައިވެއެވެ.
ފާއިތުވި 24 ގަޑި އިރު 769 މީހަކު ބަލިން ރަނގަޅުވެ ޖުމްލަ ބަލިން ރަނގަޅުވި މީހުންގެ އަދަދު ވަނީ 67،148ށް އަރާފައެވެ.
