މިމައްސަލަ ހައްލު ކުރުމަށްޓަކައި މުއައްސަސާތަކުން އިތުރަށް މަސައްކަތް ކުރަންޖެހޭ
މަސްތުވާތަކެތީގެ އޮޕަރޭޝަނެއް
މަސްތުވާތަކެތީގެ މައްސަލަތައް މީސްމީޑިއާގައި އާންމުވުމާއެކު، އެފަދަ ކަންތައްތައް ހައްލުކުރުމުގެ ބަދަލުގައި އާންމު ރައްޔިތުން، މަސްތުވާތަކެތި ބޭނުންކުރާ ފަރާތްތަކަށް އަނިޔާދޭކަން ފާހަގަކުރެވިފައި ވާކަމަށް ހިއުމަން ރައިޓްސް ކޮމިޝަން އޮފް ދަ މޯލްޑިވްސް (އެޗްއާރްސީއެމް) އިން ބުނެފިއެވެ.
ރާއްޖެޓީވީގެ 'ފަލަސުރުޚީ' ޕްރޮގްރާމްގައި ވާހަކަ ދައްކަވަމުން އެޗްއާރްސީއެމްގެ ކޮމިޝަނަރު ޝިފާތު އަބްދުއްރައްޒާގް ވިދާޅުވީ މުޖުތަމައުގައި މަސްތުވާތަކެތީގެ މައްސަލަތައް ގިނަވުމަކީ ވަރަށް ބޮޑު ކަންބޮޑުވުމެއް ކަމަށެވެ. އަދި މަސްތުވާތަކެތީގެ ވަބާގައި ޖެހިފައި ތިބޭ މީހުންނަށް މަސްތުވާތަކެތިން އަރައިގަތުމަށް ނޭޝަނަލް ޑްރަގް އޭޖެންސީއާއި އެހެނިހެން ފަރާތްތަކުގެ އެހީތެރިކަން ވަރަށް ބޮޑަށް ބޭނުން ވާނެ ކަމަށް ޝިފާތު ވިދާޅުވިއެވެ.
ޝިފާތު ވިދާޅުވީ މަސްތުވާތަކެތި ބޭނުންކުރުމުގެ މައްސަލަތަކުގެ މައުލޫމާތު ސޯޝަލް މީޑިއާގައި އާންމުވުމާއެކު ދެން ފެނިގެން ދަނީ އެފަދަ ފަރާތްތަކަށް އާންމުން އަނިޔާދޭތަން ކަމަށެވެ. އެގޮތުން މިސްކިތްތަކުގައި މަސްތުވާތަކެތި ބޭނުން ކުރާ މީހުންގެ ޚަބަރު މީސްމީޑިއާގައި އާންމުވުމާއެކު، އެ މީހުންނަށް އަނިޔާކުރިތަން ފެނިގެން ދިޔަކަން ފާހަގަކުރެއްވިއެވެ.
ޝިފާތު ވިދާޅުވީ މުޖުތަމައުގެ ތެރެއިން މި ފަދަ ކަންކަން ފެނިގެން ދިޔުމަކީ އިންސާނިއްޔަތުކަމާ ޚިލާފުކަމެއް ކަމަށެވެ. އަދި މިފަދަ ކަންކަމަށްހައްލެއް ހޯދުމުގައި މުޅި ސިސްޓަމްގެ ތެރެއިން ވެސް ބޮޑެތި ހައްލުތަކެއް ގެންނަން ޖެހޭ ކަމަށް ވިދާޅުވިއެވެ.
މިމައްސަލަ ހައްލު ކުރުމަށްޓަކައި މުއައްސަސާތަކުން އިތުރަށް މަސައްކަތް ކުރަންޖެހޭ ކަމަށް ޝިފާތު ވިދާޅުވިއެވެ. އަދި ޑްރަގްއޭޖެންސީ ފަދަ މުއްސަސާއެއްގެ މައްސަލަ ސީދާ ހުށަހެޅިފައިނެތްކަމުގައި ވިޔަސް އެޗްއާރްސީއެމްގެ މަސައްކަތުގެ ތެރެއިން އެކަންކަން ބަލަމުންދާކަމަށް ވިދާޅުވިއެވެ.
