ފޭސް 3 ގެ ނަތީޖާތައް 90 އިންސައްތަ ކާމިޔާބުކަމަށް ދައްކާ - ނޮވަވެކްސް

އެމެރިކާގެ ބައޯޓެކްނޮލޮޖީ ކުންފުނި ނޮވަވެކްސްގެ ކޮވިޑް ވެކްސިންގެ އަސަރު 90.4 އިންސައްތައަށް އަސަރުކުރާކަމަށް ފޭސް 3 ގެ މަރުހަލާއިން ދައްކައިފިއެވެ.

ނޮވަވެކްސްއިން ބުނެފައިވަނީ އެމެރިކާއާއި މެކްސިކޯގައި ކުރިއަށްގެންދިޔަ ފޭސް 3 ގެ ޓެސްޓުގެ މަރުހަލާތައް ކާމިޔާބު ކަމަށާއި، މިހާތަނަށް ވެކްސިންގެ އަސަރު 90.4 އިންސައްތައަށް ކުރަމުންދާ ކަމަށް މަރުހަލާތަކުން ދައްކާ ކަމަށެވެ. މީގެ އިތުރުން ވެސް ޓްރައަލްގެ އިތުރު ދިރާސާތައް ދަނީ ކުރަމުންނެވެ. ނަމަވެސް ވެކްސިންގެ އަަސަރުކުރާ މިންވަރު ރަނގަޅު ކަމަށާއި އެއްވެސް މައްސަލައެއް ދިމާނުވާ ކަމަށް ނޮވަވެކްސްގެ ރިސަރޗް އެންޑް ޑިވެލަޕްމަންޓުގެ ހެޑް ޑރ. ގްރެގޮރީ ގްލެން ވަނީ ވިދާޅުވެފައެވެ. އޭނާ ވިދާޅުވީ ތަފާތު އާބާދީތަކަށް އަދި ތަފާތު ވޭރިއަންޓް ފެތުރެމުންދާ ދުވަސްވަރެއްގައި ކުރިއަށް ގެންދިޔަ ޓްރައަލް ކާމިޔާބު ކަމަށެވެ.

ޑިސެމްބަރު މަހު ފެށި ޓްރައަލްގައި މިހާތަނަށް 29،960 މީހުން އެމެރިކާގެ 113 ސިޓީންނާއި މެކްސިކޯގެ 6 ސިޓީއަކުން ބައިވެރިވެފައިވެއެވެ. ބައެއް ވޮލެންޓިއަރުންނަށް ފުރަތަމަ ޑޯޒް ދިނުމަށްފަހު 21 ދުވަހުގެ މުއްދަތަކަށްފަހު ދެވަނަ ޑޯޒް ވެސް ވަނީ ދީފައެވެ. އަދި ވެކްސިންގެ ސަބަބުން ބޮޑެތި ސައިޑް އިފެކްޓްތަކެއް ނުފެނުނު ނަމަވެސް އާންމުކޮށް ފެންނަ އަލާމާތްތައް ފެނުނު ކަމަށެވެ.

ނޮވަވެކްސްއިން ބުނެފައިވަނީ ވެކްސިންގެ އަސަރު ރަނގަޅުކަމަށާއި، މި ޓްރައަލްތަކުގައި ބައިވެރިވި ކޮވިޑަށް ޕޮޒިޓިވް މީހުންގެ ފަރާތުން ވެސް ބޮޑެތި އަލާމާތްތަކެއް ނުފެންނަ ކަމަށެވެ. މި ޓެސްޓް މަރުހަލާގައި ކޮވިޑަށް ޕޮޒިޓިވް 77 މީހަކު ހިމެނޭ ކަމަށް ނޮވަވެކްސްއިން ބުނެއެވެ.