ރިޒް ކާޓަން ބުރޭންޑުން ރާއްޖޭގައި ހުޅުވާފައިވާ ފުރަތަމަ ރިސޯޓުކަމުގައިވާ ރިޒް ކާޓަން މޯލްޑިވްސް ފަރި އައިލެންޑްސް ރިސޯޓް ހުޅުވައިފިއެވެ.

މިރިސޯޓް ތަރައްގީކޮށްފައިވަނީ މާލެ އަތޮޅުގައެވެ. ފަރި އައިލެންޑްސް ރިސޯޓަކީ 100 ކޮޓަރީގެ ރިސޯޓެކެވެ. މި ރިސޯޓުގައި އެއް ކޮޓަރީގެ ވިލާތަކާއި ތިން ކޮޓަރީގެ ވިލާތައް ހުރެއެވެ. އަދި ތަފާތު އެކި ކަހަލަ ކެއުން ލިބޭ ރެސްޓޯރެންޓުތަކާއި، ރިޒް ކާޓަންގެ ސްޕާގެ ޚިދުމަތުގެ އިތުރުން ޕްރައިވެޓް ޕޫލްތައް ހުރެއެވެ.

އެންމެ މަތީ ފަންތީގެ މި ރިސޯޓުގެ ޕްރައިވެޓް ޕޫލަކާއެކު ތަރައްގީކޮށްފައިވާ އެއްކޮޓަރީގެ އޯޝަން ވިއު ވިލާއަކަށް ޗުއްޓީ ހޭދަކޮށްލުމަށް ރެއަކަށް 1800 ޑޮލަރު ހޭދަވާނެއެވެ. އަދި ޕްރައިވެޓް ޕޫލަކާއެކު ހުންނަ ދެ ކޮޓަރީގެ ބީޗު ވިއު ވިލާއެއްގައި ޗުއްޓީ ހޭދަކޮށްލުމަށް ރެއަކަށް 7399 ޑޮލަރު ހޭދަވާނެއެވެ.

ރާއްޖޭގެ ތާރީޚާއި އާދަކާދައާ ގުޅުވައި ރޫމްތައް ޑިޒައިންކޮށްފައިވަނީ ކުރީގެ ޝާހީ ދަރުބާރު ހުންނަ ގޮތަށެވެ. އެގޮތުން ކޮންމެ ރޫމަކަށް ބަޓްލަރެއްގެ ގޮތުގައި އަންނާނީ އަރިސް މީހާއެވެ.

ރިޒް ކާޓަން މޯލްޑިވްސް، ފަރި އައިލެންސް ރިސޯޓަކީ ސިންގަޕޫރުގެ ޕޮންޓިއާކް ކުންފުނިން އިންޓަރގްރޭޓަޑް ރިސޯޓު ކޮންސެޕްޓަށް ތަރައްގީކޮށްފައިވާ ފަރި އައިލެންޑްސްގެ އެއް ރިސޯޓެވެ. މިތަނުގައި ފަތުރުވެރިންނަށް ހިދުމަތްދޭ ތިން ރިސޯޓެއް ތަރައްގީކޮށްފައިވެއެވެ. އެގޮތުން ދުނިޔޭގެ އެންމެ ބޮޑު ހޮޓާ ޗެއިން ކަމަށްވާ މެރިއޮޓް އިންޓަނޭޝަނަލްގެ ބްރޭންޑެއް ކަމަށްވާ ރިޒް ކާޓަންގެ ރިސޯޓުގެ އިތުރުން، ކަޕެލާ ހޮޓެލްސް އެންޑް ރިސޯޓްސް އިން ހިންގުމަށް ހަމަޖެހިފައިވާ ރިސޯޓަކާއި ޕެޓީނާ ހޮޓެލްސް އެންޑް ރިސޯޓްސްއިން ހިންގުމަށް ހަމަޖެހިފައިވާ ރިސޯޓެއް ފަރި އައިލެންޑްސްގައި ހިމެނެއެވެ.