އޮސްޓްރިއާ ބަލިކޮށް ނެދަލެންޑްސް ދެވަނަ ބުރަށް

ޔޫރޯ 2020 ގެ ގްރޫޕް ސީ ގައި އޮސްޓްރިއާ ބަލިކޮށް މުބާރާތުގެ ދެވަނަ ބުރަށް ނެދަލެންޑްސް ދަތުރުކޮށްފިއެވެ.

އެމްސްޓެޑަމްގެ ޔޯހަން ކްރައިފް އެރީނާގައި ބުރާސްފަތި ދުވަހުގެރޭ ކުޅުނު މެޗުން ނެދަލެންޑްސް މޮޅުވީ 2-0 ގެ ނަތީޖާއަކުންނެވެ.

މެޗު ފަށައިގެން ނެދަލެންޑްސްއިން މޮޅަށް ކުޅުނުއިރު، އެ ޓީމުން ވަނީ މެޗުގެ 11 ވަނަ މިނެޓުގައި ލަނޑު ޖަހައި ލީޑު ނަގާފައެވެ. ލިބުނު ޕެނަލްޓީއަކުން މި ލަނޑު އެ ޓީމަށް ކާމިޔާބުކޮށްދިނީ މެމްފިސް ޑިޕާއިއެވެ. މިއީ އޭރިއާ ތެރެއިން ނެދަލެންޑްސްގެ ޑެންޒެލް ޑަމްފްރީސްއަށް އޮސްޓްރިއާގެ ކެޕްޓަން ޑޭވިޑް އަލަބާ ކުރި ފައުލަކަށް ދިން ޕެނަލްޓީއެކެވެ. މި ލަނޑަށްފަހުވެސް ޑިޕާއިއަށް ވަނީ ލަނޑު ޖަހަން ރަނުގެ ދެ ފުރުސަތެއް ލިބި ބޭކާރުވެފައެވެ.

މެޗުގެ ދެވަނަ ހާފުގައި ދެ ޓީމުގެ ފަރާތުން ހަމަހަމަ ކުޅުމެއް ފެނިގެންދިޔައިރު، މެޗުގެ 60 ވަނަ މިނެޓުގައި ނެދަލެންޑްސްގެ މަތައިސް ޑި ލީޓަށް ވަނީ ލަނޑު ޖަހަން ހުސް ފުރުސަތެއް ލިބި ބޭކާރުވެފައެވެ. އޭނާ ހުހަށްހުރެ ފޮނުވާލި ބޯޅަ އޮސްޓްރިއާގެ ގޯލްކީޕަރު ޑެނިއަލް ބަހްމަން ވަނީ ހުށިޔާރުކަމާއެކު ދިފާއުކޮށްފައެވެ. އެކަމަކު އޭގެ ހަތް މިނެޓު ފަހުން ނެދަލެންޑްސްއިން ވަނީ އިތުރު ލަނޑެއް ޖަހައި ލީޑު ފުޅާކޮށްފައެވެ. މި ލަނޑު އެ ޓީމަށް ކާމިޔާބުކޮށްދިނީ ޑަމްފްރީސްއެވެ.

މި ނަތީޖާއާއެކު ނެދަލެންޑްސްއިން ދެވަނަ ބުރުގެ ޖާގައެއް ކަށަވަރުކުރީ ކުޅުނު ދެ މެޗުންވެސް މޮޅުވެ ހަ ޕޮއިންޓާއެކުއެވެ. ގްރޫޕް ސީ ގައި ދެން ހިމެނޭ ޓީމުތައް ކަމަށްވާ އޮސްޓްރިއާ އާއި ޔޫކްރޭންއިން ތިން ޕޮއިންޓް ހޯދާފައިވާއިރު، ގްރޫޕުގެ ފުލުގައި އޮތް ނޯތު މެސެޑޯނިއާއަށް ކުޅުނު ދެ މެޗުން ޕޮއިންޓެއް ލިބިފައެއް ނުވެއެވެ.

ޔޫރޯގެ ދެވަނަ ބުރަށް ނެދަލެންޑްސް ދަތުރުކުއިރު، މިއީ 2008 ވަނަ އަހަރަށްފަހު މި މުބާރާތުގެ ދެވަނަ ބުރަށް އެ ޓީމު ދަތުރުކުރި ފުރަތަމަ ފަހަރެވެ.