ޝާފިއުއަށާއި އޭނާގެ އާއިލާއަށް އަނިޔާކޮށް ހުތުރު ބަހުން މުއާމަލާތްކޮށްފައި ނުވާނެ ކަަމަށް ފުލުހުން ބުނެފިއެވެ.

ޝާފިއު އޭނާގެ އަނބިމީހާ އާއި ދަރިންނާއެކު އަފްޣާނިސްތާނުގެ ނަންގަރްހާރު ޕްރޮވިންސުން ހައްޔަރުކޮށްފައިވާ މައްސަލައާ ގުޅިގެން ބުރާސްފަތި ދުވަހުގެ ރޭ ފުލުހުން ނެރުނު ނޫސްބަޔާނެއްގައި ބުނެފައިވަނީ، ޝާފިއުއަށާއި އޭނާގެ އާއިލާއަށް އަނިޔާކޮށް ހުތުރު ބަހުން މުއާމަލާތްކޮށްފައިވާ ކަމަށް ބުނެ ސޯޝަލް މީޑިއާގައި ފަތުރަމުންދާ ވާހަކަތަކަކީ ހަގީގަތާ ޚިލާފު ވާހަކަތަކެއް ކަމަށެވެ. އަދި މި މައްސަލައާ ގުޅިގެން ފުލުހުން ކޮށްފައިވާ އެއްވެސް މަސައްކަތެއްގެ ތެރެއިން އިންސާނީ ހައްގަށާއި ކަރާމަތަށް އުނިކަން އަތުވެދާނެ އެއްވެސް ކަމެއް ކޮށްފައިނުވާނެ ކަމަށް ފުލުހުން ބުންޏެވެ.

ފުލުުހުން ބުނީ ޝާފިއުއާއި އޭނާގެ އަނބިމީހާ އާއި ހަތަރު ދަރިން ހައްޔަރުކޮށްފައިވާކަމުގެ މައުލޫމާތު އިންޓަރޕޯލް މެދުވެރިކޮށް 18 ނޮވެމްބަރު 2018ގައި އެ އިދާރާއަށް ލިބިފައިވާ ކަމަށާއި، އެ މައުލޫމާތު ލިބުމާއެކު އަފްޣާނިސްތާނުގެ ކަމާ ގުޅުންހުރި އިދާރާތަކާއި ގުޅިގެން ފުލުހުންގެ ޓީމެއް 2019ވަނަ އަހަރުގެ ފެބުރުއަރީ މަހުގައި އަފްޣާނިސްތާނަށް ގޮސްފައިވާ ކަމަށެވެ. އެކަންކަމާ ގުޅޭ ތަފްސީލުތައް 2019 ޑިސެމްބަރު 03 ވަނަ ދުވަހު އާންމުކޮށްފައި ވާނެކަމަށެވެ. އަދި ޝާފިއު އާއި އޭނާގެ އާއިލާގެ މައްޗަށް އަފްޣާނިސްތާނުގެ ކަމާބެހޭ އިދާރާއިން އުފުލާފައިވާ ދައުވާ ސާބިތުވާކަަމަށް ކަނޑައަޅައި އެ ގައުމުގެ ކޯޓުން ހުކުމްކޮށްފައި ވާކަމުގެ މައުލޫމާތު ވެސް އެ ނޫސްބަޔާނުގައި އާންމުކޮށްފައިވާ ކަމަށް ފުލުހުން ބުންޏެވެ.

ފުލުހުން އިތުރަށް ބުނީ ސޯޝަލް މީޑިއާ މެދުވެރިކޮށް ސަލާމަތީ ޚިދުމަތްތަކާއި ގާނޫނު ތަންފީޒުކުރާ އިދާރާތަކާއި އެ އިދާރާތަކުގެ ވަކިވަކި މުވައްޒަފުންނާމެދު މީހުންގެ މެދުގައި ނަފްރަތު އުފައްދައި، އެ މުވައްޒަފުންގެ ފުރާނަ ނުރައްކަލަށް ހުށަހެޅޭ ގޮތަށް ހަގީގަތާ ހިލާފު ވާހަކަތައް ދައްކައި، ސޯޝަލް މީޑިއާގައި ވަކިވަކި ޕޯސްޓުތައް ކުރަމުންދާ މީހުންގެ މައްސަލަތަކާއި، އެފަދަ ހަގީގަތާ ޚިލާފު ވާހަކަތަކަށް ހިތްވަރުދޭ ފަރާތްތަކުގެ މައްސަލަތައް ތަހުގީގުކޮށް އެމީހުންނާމެދު އެޅެން އޮތް އެންމެ ހަރުކަށި ފިޔަވަޅު އަޅާނެ ކަމަށެވެ.