ކ. މާލެ
|
17 ޖޫން 2021 | ބުރާސްފަތި 20:44
ހުޅުމާލެ ދެވަނަ ފިޔަވަހީގައި ސަރުކާރުން ކުރިއަށް ގެންދާ ބޯހިޔާވަހި ކަމުގެ މަޝްރޫއު
ހުޅުމާލެ ދެވަނަ ފިޔަވަހީގައި ސަރުކާރުން ކުރިއަށް ގެންދާ ބޯހިޔާވަހި ކަމުގެ މަޝްރޫއު
ރާއްޖެއެމްވީ
ހުޅުމާލޭ 11 ޕްލޮޓްގައި ފްލެޓް އެޅުން
ހުޅުމާލޭގެ 11 ޕްލޮޓްގައި އަޅާ ފުލެޓްތައް - އަތްފޯރާ ބޯހިޔާވަހިކަމަކަށް ކޮށާލެވޭ މަގެއް
 
މި މަޝްރޫއަކީ ދިވެހި އަމިއްލަ ކުންފުނިތަކަށް ހަވާލުކުރާގޮތަށް ކުރިއަށް ގެންދާ މަޝްރޫއެއް
 
މި މަޝްރޫއުއަށް ޝައުގުވެރިކަން ފާޅުކޮށް 57 ފަރާތަކުން ޕްރޮޕޯސަލް ހުށަހަޅާފައިވޭ
 
މި މަޝްރޫއުގައި ވެސް 60 އިންސައްތަ އަކީ އެފޯޑަބަލް ކެޓެގަރީގެ ގޮތުގައި ހެދުމަށް ޝަރުތުކޮށްފައިވޭ

ހުޅުމާލެ ފުރަތަމަ އަދި ދެވަނަ ފިޔަވަހީގެ 11 ޕްލޮޓެއްގައި ފްލެޓް އެޅުމުގެ މަޝްރޫއުގެ ދަށުން މިހާރު ބާޒާރުގައި ހުރި އަގަށްވުރެ ހެޔޮއަގެއްގައި ބޯހިޔާވަހިކަން ފޯރުކޮށްދެވޭނެ ކަމަށް އެޗްޑީސީގެ ޑެޕިއުޓީ މެނޭޖިން ޑިރެކްޓަރު އަޙްމަދު އާތިފް ވިދާޅުވެއްޖެއެވެ.

މި މަޝްރޫއަކީ ދިވެހި އަމިއްލަ ކުންފުނިތަކަށް އަމާޒުކޮށްގެން، ހުޅުމާލޭގެ ދެ ފިޔަވަހީގައި ހިމެނޭ 11 ބިމެއްގައި ކުރިއަށް ގެންދާ ބޯހިޔާވަހިކަމުގެ މަޝްރޫއުއެކެވެ. މި މަޝްރޫއުއަށް ޝައުގުވެރިކަން ފާޅުކޮށް 57 ފަރާތަކުން ޕްރޮޕޯސަލް ހުށަހަޅާފައި ވާކަމަށް އެޗްޑީސީން މައުލޫމާތު ދެއެވެ.

'ރާއްޖެއެމްވީ' އަށް ދެއްވި ޚާއްސަ ބަސްދީގަތުމެއްގައި އާތިފް ވިދާޅުވީ މި ހުރިހާ ޕްރޮޕޯސަލްތަކެއް ވެސް އިވެލުއޭޓް ކުރުމުގެ މަސައްކަތް މިހާރު ކުރަމުން ދާކަމަށެވެ. އަދި ޕްރޮޕޯސަލް ހުށަހަޅާފައިވާ ފަރާތްތަކުން ހުށަހަޅާފައިވާ އަގުތަކަކީ މިހާރު ބާޒާރުގައި ފްލެޓް ވިއްކަން ހުރި އަގުތަކަށްވުރެ ހެޔޮ އަގުތަކެއް ކަމަށް އާތިފް ވިދާޅުވިއެވެ.

މިހުރިހާ ޕްރޮޕޯސަލްތަކެއްގެ ވެސް އިވެލުއޭޝަން މަސައްކަތް މިހާރު ދަނީ ކުރަމުން. ދެން ޕެންޑަމިކާ ގުޅިގެން އިވެލުއޭޝަންއަށް ކޮންމެވެސް ވަރެއްގެ މަޑުޖެހުންތަކެއް އައި. އަޅުގަނޑުމެންގެ ބައެއް ސްޓާފުން ޕޮޒިޓިވް ވުމާ ގުޅިގެން. މި މަޝްރޫއުއަށް ޕްރޮޕޯސަލް ހުށަހަޅާފައިވާ ފަރާތްތަކުން ޔުނިޓް ވިއްކަން ހުށަހަޅާފައިވާ އަގުތަކަށް ބަލާއިރު މިހާރު ބާޒާރުގައި ފްލެޓް ވިއްކަން ހުރި އަގުތަކަށްވުރެ ހެޔޮ އަގުތަކެއްކަން ފާހަގަކޮށްލަން.
އެޗްޑީސީގެ ޑެޕިއުޓީ މެނޭޖިން ޑިރެކްޓަރު އަޙްމަދު އާތިފް

މި މަޝްރޫއު ރޭވިފައި ވާގޮތުން ކޮންމެ ކުންފުންޏަކަށް ވެސް ދޫކުރަނީ އެއް ޕްލޮޓެވެ.  އެހެން ކަމުން ކުރިމަތިލީ ފަރާތްތަކުގެ ތެރެއިން ތަފާތު 11 ޑިވެލޮޕަރަކަށް ފުރުސަތު ލިބިގެން ދާނެކަމަށް އާތިފް ވިދާޅުވިއެވެ. އާތިފް ވިދާޅުވީ މަޝްރޫއުގެ އަމާޒަކީ މިހާރު ބާޒާރުގައި ހުރި އަގުތަކަށްވުރެ ހެޔޮ އަގެއްގައި ބޯހިޔާވަހިކަން ފޯރުކޯށްދިނުން ކަމަށާއި، އެ މަގުސަދު ހާސިލުވާނެ ކަމަށް ފެންނަމުން ދާކަމަށެވެ.

އެޗްޑީސީގެ ޑެޕިއުޓީ މެނޭޖިން ޑިރެކްޓަރު އަޙްމަދު އާތިފް 'ރާއްޖެއެމްވީ' އަށް ޚާއްސަ ބަސްދީގަތުމެއް ދެއްވަނީ

މި މަޝްރޫއުގެ ދަށުން ބައެއް ޕްލޮޓްތަކުގައި 10 ބުރިއަށް އިމާރާތްކުރުމަށް ނިންމާފައި ވާއިރު އަނެއްބައި ޕްލޮޓްތަކުގައި އިމާރާތް ކުރަން ހަމަޖެހިފައިވަނީ ހަބުރީގެ އިމާރާތެވެ. މިފަދަ އެހެން މަޝްރޫއުތަކެކޭ އެއްފަދައިން މި މަޝްރޫއުގައި ވެސް 60 އިންސައްތަ އަކީ އެފޯޑަބަލް ކެޓެގަރީގެ ގޮތުގައި ހެދުމަށް ޝަރުތުކޮށްފައި ވާކަމަށް އާތިިފް ވިދާޅުވިއެވެ. އަދި މި މަޝްރޫއަކީ ޑިވެލޮޕަރުންގެ އަމިއްލަ ޚަރަދުގައި ކުރިއަށްގެންދާ މަޝްރޫއަކަށް ވުމުން ވަކި އިންސައްތައެއް އޯޕަން މާކެޓްގައި ވިއްކޭގޮތަށް ކަނޑައަޅާފައި ވާކަމަށް އާތިފް ވިދާޅުވިއެވެ.

މީގަ އަމާޒުކުރެވިފަ އިނި ކުރީގަ ވެސް އަޅުގަނޑުމެން މި ފޯމިއުލޭޓްކުރާގޮތަށް 60 ޕަސެންޓަކީ އެފޯޑަބަލް ކެޓެގަރީގަ ވިއްކަން ޖެހޭ ގޮތަށް ކޮންޑިޝަންކޮށްފަވާ ޕްލޮޓްތަކެއް. މީގަ ބޮޑަށް ހިމެނޭނީ މެދު ފަންތީގެ ހައުސިން. ދެން ޑިވެލޮޕަރުންގެ އޯން ފައިނޭންސްގަ ކުރާ ޕްރޮޖެކްޓެއް ކަމަށް ވީމަ ވަކި ޕަސެންޓޭޖެއް އޯޕަން މާކެޓުގަ ވިއްކުމަށް ވެސް ވަނީ ކަނޑައެޅިފަ.
އެޗްޑީސީގެ ޑެޕިއުޓީ މެނޭޖިން ޑިރެކްޓަރު އަޙްމަދު އާތިފް

މި މަޝްރޫއުގެ ކޮންޓްރޯލް ޕްރައިޒްގެ އަގަކަށް ބަލާފައި ވަނީ އެންމެ ގިނަވެގެން އަކަފޫޓަކަށް 2400 ރުފިޔާއެވެ. އެހެން ނަމަވެސް މިހާރު ޕްރޮޕޯސަލް ލިބިފައިހުރީ މިއަށްވުރެ ހެޔޮ އަގުގައި ކަމަށް އެޗްޑީސީން ބުނެއެވެ.

އާތިފް ވިދާޅުވީ އަމާޒަކީ މި މަސް ނިމުމުގެ ކުރިން މަޝްރޫއުގެ އިވެލުއޭޝަން މަސައްކަތް ނިމުން ކަމަށެވެ. އަދި އިވެލުއޭޝަންގެ މަސައްކަތް ނިމި، މަޝްރޫ ހަވާލުކުރެވޭތާ 60 ދުވަހުގެ ތެރޭގައި މަސައްކަތް ފަށަން ޖެހޭ ގޮތަށް ކަނޑައަޅާފައި ވާކަމަށް އާތިފް ވިދާޅުވިއެވެ. އެގޮތުން މިއަހަރުގެ ތެރޭގައި މަޝްރޫއުގެ އަމަލީ މަސައްކަތް ފެށޭވަރު ވާނެ ކަމަށް ވިދާޅުވިއެވެ.

އަލަށް ހަވާލުކުރުމަށް ހަމަޖެހިފައިވާ 11 ޕްލޮޓުގެ މަޝްރޫއުގެ އިތުރުން ވެސް، ބޯހިޔާވަހިކަމުގެ ގިނަ މަޝްރޫއު ތަކެއް މިހާރު ވެސް ކުރިއަށް ދާކަން އާތިފް ފާހަގަކުރެއްވިއެވެ. އެގޮތުން 355 ހައުސިން ޔުނިޓް އެޅުމަށް މީގެ ކުރިން 4 ކޮންޓްރެކްޓަރަކާ ހަވާލުކުރެވިފައި ވާކަމަށް ވިދާޅުވިއެވެ. މި މަޝްރޫއަކީ ވެސް މެދުފަންތީގެ ބޯހިޔާވަހިކަމަށް އަމާޒުކޮށްގެން ކުރިއަށް ގެންދެވޭ މަޝްރޫއެއް ކަމަށް އާތިފް ވިދާޅުވިއެވެ. ހުޅުމާލެ ފުރަތަމަ ފިޔަވަހީގައި އަޅާ މި ހައުސިން ޔުނިޓްތަކުން 900 އަކަފޫޓުގެ ތިން ކޮޓަރީގެ ޔުނިޓެއް 1.8 މިލިއަން ރުފިޔާއަށް ލިބޭނެ ކަމަށް ވެސް އާތިފް ވިދާޅުވިއެވެ.

އެންމެ ފަހުން އަޕްޑޭޓް ކުރީ: 3 ހަފްތާ ކުރިން
ރިވިއު ކުރީ: ޙުސައިން މަޚްތޫމް
0%
75%
0%
25%
0%
0%
ކޮމެންޓް
18 ޖޫން 2021 | ހުކުރު 15:02
އެޓޮމް
ހުސްކަރުދާސް ފުލެޓް މީހުން ދިރިއުޅެން ނުލިބޭ