ރައްޔިތުންގެ މަޖިލީހުގެ ޖަލްސާތައް ބަލާ މީހެއްގެ ލޮލުގައި ހަމަ ޔަގީނުން ވެސް އަޅައިގަންނާނެ އަދި ސަމާލުކަން ލިބޭނެ އެއް މެންބަރަކީ ކާށިދޫ ދާއިރާގެ މެންބަރު އަބްދުﷲ ޖާބިރެވެ. މެންބަރު ޖާބިރުގެ ވާހަކަތަކަށް ގިނަ ބައެއްގެ ސަމާލުކަން ލިބެމުންދާއިރު އޭނާ ތުރުކުރައްވާ ކޯޓުން ފެށިގެން އަޅުއްވާ އައިނަށް ބަލާލިޔަސް ސްޓައިލާއި ސްމާޓުކަން ދައްކުވައިދެއެވެ.

މެންބަރު ޖާބިރަކީ އަބަދުވެސް ސްޓައިލާއި ސްމާރޓް ކަމަށް ލޯބި ކުރައްވާ ބޭފުޅެއްކަން ދޭހަވެގެންދާ އެއްކަމަކީ ކޮންމެ ދުވަހެއްގެ ޖަލްސާގައިވެސް ކޯޓުފަޓުލޫނު ތުރުކުރައްވާތީއެވެ. އެހެން މެންބަރުން ޚާއްސަ ދުވަސްތަކުގައި ކޯޓު ތުރުކުރައްވާއިރު ޖާބިރު އަބަދުވެސް ހުންވަނީ ކޯޓުފަޓުލޫނުގައެވެ. އެންމެ ޚާއްސަ އެއްކަމަކީ ކޯޓުގެ ކުލަތަކެވެ. ކަޅު ކޯޓުގެ ބަދަލުގައި މެންބަރު ފެނިގެން ދަނީ އެކި ކުލަކުލައިގެ ކޯޓު ތުރުކުރައްވާ ތަނެވެ. މެންބަރުގެ ރަތްކުލައާއި ހުދުކުލައިގެ އިތުރަށް މުށި ކުލައާއި ނޫކުލައިގެ ކޯޓުތައް ގިނަ ބައެއްގެ ސަމާލުކަން އަތުލައިގަތެވެ.

މިހާރު ކުރިއަށް ދާ އޮންލައިން ޖަލްސާތަކުގައި ވެސް މެންބަރު ޖާބިރު ހެދުންއަޅުއްވަނީ މި ދެންނެވި ފަދައިންނެވެ. ކޮންމެ ދުވަހަކުވެސް ވީޑިއޯ ޖެއްސެވުމަށްފަހު ވާހަކަ ދައްކަވާއިރު ހުންނަވަނީ ވަރަށްވެސް ރަސްމީކޮށް ޖަލްސާއަށް ނުހަނު ތައްޔާރުވެގެންނެވެ. ޖާބިރު ވިދާޅުވެފައިވަނީ ޑްރެސް ކޯޑު ބަހައްޓަވަނީ ކުރަމުންދާ ރަސްމީ މަސައްކަތާއި އެއްގޮތަށް ކަމަށެވެ. ރައްޔިތުން ތަމްސީލު ކުރަން އެބައިމީހުން ހޮވާ އެންމެ މަތީ ވެރިޔާގެ ގޮތުގައި އެ މީހާ ގިރުއާނު ނެތް ޓީޝާޓެއް ލައިގެން، މުންޑުގަނޑެއް އަނދެގެން ދިޔައިމާ އެކަން ހަމަނުޖެހޭނެ ކަމަށެވެ. \

ކާށިދޫ ދާއިރާގެ މެންބަރު ހުންނަވާންވާނީ އިއްޒަތްތެރި މެންބަރެއްގެ ފުރިހަމަ ޑްރެސްކޯޑުގައި ކަމަށް ވިދާޅުވެފައިވެއެވެ. އެއީ ކާށިދޫ ދާއިރާގެ މެންބަރު ތަފާތުވާ ސަބަބުކަމަށްވެސް ވިދާޅުވެފައިވެއެވެ. ޖާބިރު ވިދާޅުވާ ގޮތުގައި ރައްޔިތުންގެ މަންދޫބެއްގެ ހައިސިއްޔަތުން އޭނާ ރަމްޒުކޮށްދެނީ ރައްޔިތުންގެ އިތުރުން ރައްޔިތުންގެ މަޖިލީހުގެ ކަރާމާތެވެ. އެކަން ފެށެނީ މީހާ ލައިގެން ހުންނަ ހެދުމުން ފެށިގެން މަޖިލީހުގެ ތަޅުމުގައި ރައްޔިތުންނާއި ގައުމުގެ ހައްގުގައި ވަކާލާތު ކުރުމާއި ހިސާބުންނެވެ.

"މިއީ އިއްޒަތްތެރި މަޖިލީހެކޭ" އަބަދުވެސް ވިދާޅުވެއެވެ. ޑްރެސްކޯޑު ހަމަ އެގޮތުގައި ކުރިޔަށް ގެންދަވާނެ ކަމާއި، މަޖިލީހުގެ ކަރާމާތާއި އިއްޒަތްތެރި ކަމާއި ހައިބަތު އެހެން ބަޔަކަށް ނޭނގުމަކީ ކާށިދޫ ދާއިރާގެ މެންބަރާ ބެހޭކަމެއް ނޫންކަމަށް ވެސް ވިދާޅުވެފައި ވެއެވެ. ޖާބިރު ވިދާޅުވެފައި ވަނީ ވިސްނުމަކީ ތަހުޒީބުކޮށް މީހާ ޕްރެޒެންޓު ކޮށްދިނުން ކަމަށެވެ.

ބައެއް ފަހަރު މަޖިލީހަށް ކޯޓުފަޓުލޫނު ލައިގެންދާ ހަމައެކަނި މީހާއަށް ވާތީ އުނދަގޫވާ ކަމަށް ވެސް ވިދާޅުވިއެވެ. އެހެން ބޭފުޅުން ކޯޓު ތުރުނުކުރައްވަނީ ކީއްވެގެންތޯ ހިތަށްއަރާ ކަމަށާ ބައެއް ފަހަރު ފިހާރައެއް ހުޅުވުމަށް ފަހު ކުއްޔަށް ކޯޓު ދޫކުރަން ޚިޔާލު ކުރައްވާ ކަމަށް ވެސް ވިދާޅުވިއެވެ. ހުރިހާ ބޭފުޅުން ވެސް ކޯޓު ތުރުކުރައްވާ ހިތްވާ ކަމަށާއި ނަމަވެސް ކެރިވަޑައިނުގަންނަވަނީ ކަމަށް ޖާބިރު ވިދާޅުވިއެވެ. ކޮންމެއަކަސް ޖާބިރުގެ ހެދުން އެޅުއްވުމުން ދޭހަކޮށްދެނީ މެންބަރަކީ ފެޝަނަށް ލޯބި ކުރައްވާ އަދި ސްޓައިލަށް ބައްލަވާ ބޭފުޅެއްކަމެވެ.

ފާއިތުވި 2020 ވަނަ އަހަރު ބޭއްވުނު 19 ވަނަ މަޖިލީހުގެ އެ އަހަރުގެ ތިން ވަނަ ދައުރުގެ 20 ވަނަ ޖަލްސާގައި ވެސް މެންބަރު ވަނީ ގިނަ ދިވެހި ރައްޔިތުންގެ ސަމާލުކަން ހޯއްދަވާފައެވެ. އެގޮތުން އެދުވަހު ތުރުކުރައްވައިގެން ހުންނެވި ކޯޓުގެ އިތުރުން އަޅައިގެން ހުންނެވީ ވަރަށް ވެސް ޒަމާނީ އައިނެކެވެ. އެ ޖަލްސާގައި ބަހުސް ކުރައްވަމުން މެންބަރު ވަނީ އައިނާ ނުބެހުމަށް އެދިވަޑައިގެންފައެވެ.

މީގެއިތުރުންވެސް މިހާރު ކުރިއަށްދާ އޮންލައިން ޖަލްސާތަކުގައި މެންބަރުގެ އިންނަވާ ލޮކޭޝަންތަކުގެ ވާހަކައަކީ ގިނަ ބައެއްގެ ސަމާލުކަން ހޯދާފައިވާ ވާހަކައެކެވެ. އެއްފަހަރު ކުޅިއެއްގެ ކައިރިން މެންބަރު ފެނިއްޖެނަމަ އަނެއްފަހަރު ފެންނާނީ ގޮނޑުދޮށަކުންނެވެ. މިހުރިހާ ކަމަކުންވެސް މެންބަރު އެވިދާޅުވާ ޕްރެޒެންޓޭޝަނުގެ ފުރިހަމަކަން ފެނިގެން ދެއެވެ. މިހުރިހާ ކަމަކަށް ބަލާއިރު މެންބަރު ޖާބިރަކީ 19 ވަނަ ރައްޔިތުންގެ މަޖިލީހުގެ އެންމެ ސްޓައިލިޝް މެންބަރު ކަމަށް ބުނުން ދޮގަކަށް ނުވާނެއެވެ.