އެމްޓީސީސީގެ ދަށަށް ބަހުގެ ޚިދުމަތް ބަދަލުކުރުމަށް މި މަސް ނިމޭއިރު އެއްބަސްވުމުގައި ސޮއި ކުރެވޭނެ- އެމްޕީއެލް
ފުރަތަމަ ދެ މަސް ދުވަސް ވަންދެން ބަހުގެ ޚިދުމަތްދިނުމުގެ މަސައްކަތް ކުރަމުންދާނީ އެ ދެ ކުންފުނި ގުޅިގެން
ގްރޭޓަރ މާލެ ބަސް ޓަރނމިނަލް
ގްރޭޓާ މާލޭ ޓްރާންސްޕޯޓު ލިންކުގެ ތެރެއިން މާލެ އާއި ހުޅުމާލެއާ ދެމެދު މިހާރު މޯލްޑިވްސް ޕޯޓްސް ލިމިޓެޑް (އެމްޕީއެލް)ން ކުރިއަށް ގެންދާ އާންމު ބަސް ދަތުރުގެ ޚިދުމަތް މޯލްޑިވްސް ޓްރާންސްޕޯޓު އެންޑް ކޮންޓްރެކްޓިންގ ކޮމްޕެނީ (އެމްޓީސީސީ)ގެ ދަށަށް ބަދަލު ކުރުމުގެ މަސައްކަތުގެ ދަށުން ޖޫން މަސް ނިމުމުގެ ކުރިން އެއްބަސްވުމުގައި ސޮއި ކުރެވޭނެ ކަމަށް އެމްޕީއެލްގެ ސީއީއޯ ޝާހިދު އަލީ ވިދާޅުވެއްޖެއެވެ.
ޝާހިދު ވިދާޅުވީ މި މަސައްކަތުގެ ދަށުން މިހާރު ކުރެވެމުންދަނީ އެމްޓީސީސީއާ އެކު ޓްރާންސްފަރ އެގްރިމަންޓް ފައިނަލައިޒްކުރުމުގެ މަސައްކަތް ކަމަށެވެ.
އަދި މި އެއްބަސް ވުމުގައި ސޮއިކޮށް ފުރަތަމަ ދެ މަސް ދުވަސް ވަންދެން މި ކަންކަން ބަލަމުން ދާނީ އަދި ބަހުގެ ޚިދުމަތްދިނުމުގެ މަސައްކަތް ކުރަމުންދާނީ އެ ދެ ކުންފުނި ގުޅިގެން ކަމަށެވެ. އަދި ފުރަތަމަ ދެ މަހަށް ފަހު ބަހުގެ ޚިދުމަތް ދެމުން ދާނީ އެމްޓީސީސީން އެކަނި ކަމަށެވެ.
މި ސަރުކާރުން އެމްޓީސީސީގެ ދަށަށް ގްރޭޓާ މާލޭ ޓްރާންސްޕޯޓު ލިންކުގެ ތެރެއިން މާލެ އާއި ހުޅުމާލެއާ ދެމެދު ކުރިޔަށް ގެންދާ އާންމު ބަސް ދަތުރުގެ ޚިދުމަތް ބަދަލުކުރަން ނިންމާފައިވަނީ އެމްޓީސީސީ އަކީ ދަތުރުފަތުރުގެ ޚިދުމަތަށް ޚާއްސަ ކުންފުންޏަކަށް ވުމުންނެވެ. ހުޅުމާލޭގެ އެތެރޭގެ ބަސް ދަތުރުތަކާއި ހުޅުމާލެ އާއި ހުޅުލެއާ ދެމެދު ކުރާ ބަސް ދަތުރުގެ ޚިދުމަތް ވެސް ދެމުންދަނީ އެމްޓީސީސީންނެވެ.
