މެއި މަހު ރާއްޖެ އެތެރެކުރި މުދަލުގެ އަގު 105 އިންސައްތަ އިތުރު
މެއި މަހު ދައުލަތަށް ވަނީ 238 މިލިއަން ރުފިޔާ ލިބިފައި
ރާއްޖޭގެ މައި މުދާ އުފުލާ ބަނދަރު
މިއަހަރުގެ މެއި މަހު ރާއްޖެއަށް އިމްޕޯޓް ކުރެވުނު މުދަލުގެ ސީ.އައި.އެފް އަގު 2020 ވަނަ އަހަރުގެ މެއި މަހާ އަޅައި ބަލާއިރު 105 އިންސައްތަ އިތުރުވެފައި ވާކަމަށް މޯލްޑިވްސް ކަސްޓަމްސްގެ ތަފާސް ހިސާބުތަކުން ދައްކައިފިއެވެ.
ކަސްޓަމްސް އިން އާންމުކޮށްފައިވާ ތަފާސްހިސާބުތައް ދައްކާގޮތުން ފާއިތުވި އަހަރުގެ މެއި މަހު ރާއްޖެއަށް 1.6 ބިލިއަން ރުފިޔާގެ މުދާ އިމްޕޯޓްކޮށްފައިވާއިރު، މި އަހަރުގެ މެއި މަހު އިމްޕޯޓްކޮށްފައި ވަނީ 3.2 ބިލިއަން ރުފިޔާގެ މުދަލެވެ. އަދި ފާއިތުވި މެއި މަހު 117 މިލިއަން ރުފިޔާ ދައުލަތަށް ލިބިފައިވާއިރު، މި އަހަރުގެ މެއި މަހު މިއަދަދު ވަނީ 238 މިލިއަން ރުފިޔާއަށް އިތުރުވެފައެވެ. މިއީ 104 އިންސައްތައިގެ އިތުރުވުމެކެވެ.
ފާއިތުވި މަހު ރާއްޖެއަށް އެންމެ ގިނައިން މުދާ އެތެރެކޮށްފައިވާ ގައުމުތަކަކީ އިންޑިއާ، އޮމާން އަދި ޔޫއޭއީއެވެ. އިންޑިއާ އިން 449 މިލިއަން ރުފިޔާގެ މުދާ އެތެރެކޮށްފައިވާއިރު އޮމާން އިން 431 މިލިއަން ރުފިޔާގެ މުދާ އަދި ޔޫއޭއީއިން 377 މިތިއޯން ރުފިޔާގެ މުދާ ވަނީ އެތެރެކޮށްފައެވެ.
މެއި މަހު ރާއްޖެއިން އެކްސްޕޯޓްކޮށްފައި ވަނީ 333 މިލިއަން ރުފިޔާގެ މުދަލެވެ. މިއީ ފާއިތުވި އަހަރުގެ މި މުއްދަތުގައި އެކްސްޕޯޓްކުރި 174 މިލިއަން ރުފިޔާގެ މުދަލާ އަޅާބަލާއިރު، 91 އިންސައްތަ ދަށް އަދަދެކެވެ. މެއި މަހު އެކްސްޕޯޓްކުރި މުދަލުގެ 80 އިންސައްތަ ތައިލޭންޑަށް އެކްސްޕޯޓްކޮށްފައިވާއިރު، ޖަރުމަނުވިލާތައް އެކްސްޕޯޓްކޮށްފައި ވަނީ 5 އިންސައްތައެވެ. އަދި އިނގިރޭސިވިލާތަށް 4 އިންސައްތައެވެ.
ތަފާސްހިސާބުތައް ދައްކާގޮތުން މެއި މަހު 14،689 ޑިކްލެރޭޝަން ވަނީ ޕްރޮސެސްކޮށްފައެވެ. މިދިޔަ އަހަރު މި އަދަދު ހުރީ 4،685 ގައެވެ.
ކްލިއަރެންސް ދެވުނު އުޅަނދުތަކުގެ ތަފާސް ހިސާބަށް ބަލާއިރު ރާއްޖޭން ބޭރުން އައިސްފައިވާ 40 އުޅަނދަކަށް މިދިޔަ އަހަރުގެ އޭޕްރީލް މަހު ކްލިއަރެންސް ދީފައި ވެއެވެ. މި އަހަރު އެ އަދަދު ހުރީ 101 ގައެވެ. ހަމައެއާއެކު, ރާއްޖެއިން ފުރާފައިވާ 56 އުޅަނދަކަށް މިދިޔަ އަހަރު ކްލިއަރެންސް ދީފައި ވާއިރު މި އަހަރުގެ މެއި މަހު 118 އުޅަނދަކަށް ކްލިއަރެންސް ދީފައި ވެއެވެ.
މިއަހަރުގެ މެއި މަހު ރޯޔަލްޓީގެ ގޮތުގައި 1.1 މިލިއަން ރުފިޔާ ވަނީ ދައުލަތަށް ލިބިފައެވެ.
